Toe tatala faleaoga mo aoga tulaga muamua ma aoga maualuga i le teritori

Pago Pago - AMERIKA SAMOA

O aoga uma a le malo ma aoga tumaoti - aoga tulaga muamua ma aoga maualuluga - faapea ai ma le Kolisi Tuufaatasi Amerika Samoa sa toe tatala i le aso ananafi, Me aso 1, mo aoaoga i totonu o potu aoga. Ma e tatau i tamaiti aoga uma o faia a latou tui puipui o le misela. 

Peita'i, o le a tapunia pea a'oga o le ECE, ma fale tausi tamaiti - Day Care Centers se’i oo i se taimi o i luma. 

O lenei fa’aiuga,e pei ona fa’ailoa mai e se sui sinia o le malo, sa fa’alauiloa e le afioga i le Lutena Kovana, ia Talauega Eleasalo Ale, i lona tulaga o le Sui Kovana, i le taimi o le fonotaga a le kapeneta i le aoauli o le Aso Faraile na tea nei, ma sa fa’alauiloa ai faamaumauga ma fautuaga mai le Epidemiologist Dr. Scott Anesi faapea foi ma fomai mai le Matagaluega o le Soifua Maloloina ma le falema’i o le LBJ. 

Na taua e le sui o le malo lea na saunoa pu’upu’u i le Samoa News i le fa’aiuga o le vaiaso, e fa’apea, o le a una’ia pea e le Soifua Maloloina le faiga o tui puipu o le misela ina ia fa’aaofia ai fanau laiti i ECE ma nofoaga e tausi ai tamaiti e le’i atoatoa ona tui.

Ma o le faaiuga i le taimi e toe tatala ai ECE ma Day Care Centers, o le a faia i se taimi mulimuli ane e faʻatatau i le tulaga o tui puipui. 

Na faia i le potu fono a le Matagaluega o Puipuiga Faalelotoifale o le talanoaga e tuuina atu ai se tala fou i le tali atu o le misela faapea ai ma le saunia o fuafuaga mo le toe tatalaina o aoga. 

I le aoauli o le Aso Faraile ua te’a, e o’o i le afiafi o lea aso, sa fa’alauiloa ai e le Matagaluega o Aoga se faaaliga faalauaitele, e toe foi uma aoga tulagalua ma aoga maualuluga a le malo i o latou lotoa i le aso 01 o Me; a'o le ECE fa'aauau e pea a'oa'oga fa'apitoa se'ia o'o i se isi fa'aaliga.

Ina ia taofia le sosolo atili o le misela, o aoga uma a le malo ma aoga tumaoti, ECE, day care centers ma le ASCC na faatonuina e tapunia seia oo i le aso 10 o Me, ae o tamaiti aoga e faʻaogaina aʻoaʻoga virtual mo a latou vasega.

I le taimi nei, o fa'amaumauga lata mai na tu'uina mai i le aoauli o le Aso Tofi na te'a nei e le Matagaluega o le Soifua Maloloina o lo'o fa'ailoa mai ai e 50 i latou masalomia ua pesia i le misela, ae tumau pea le toalua o fanau ua fa’amaonia mai suesuega ua pesia i le misela.