TU LUA O PO MA AO

VAEGA 27

E faatalofa atu i si o tatou aiga i lenei taeao fou.  Tatou si’I faatasi le mua ma le viiga faafetai i le Tapaau i le Lagi ona o lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina.

*******************************

Na gata mai le tatou tala i le vaiaso ua mavae, o la e faia se fa’aaliga a le alii o Iosefa, e fa’aalia ai ona ia foi paoa, o lona talanoa i agaga o tagata ua maliliu.  Ma o lo o auai atu ai i lenei faaaliga ia se sui malu o le malo, le ali’I su’esu’e o JJ, aua na ta’u iai e Iosefa, e mafai ona fesoasoani lana fa’aaliga i le sailiga o le tagata na fasiotia ia Rasela ma Tina.

Sa iai foi i lea fa’aaliga ia Tavita ma Tepora ma sa le maunofo lelei ia Tavita i lona inoino i gaioiga a Iosefa o lo o fai mai i luma o le potu.

“O le matua’i pepelo lava o mea a le ali’i le la o lo o fai,” o le tala lea a Tavita.  “O lea foi la o le a  fa’ama’imau le taimi a leoleo, e fa’aalu i le tau sailiga po o ai na iai i le fale o Rasela ma le fale o Tina i po na fasiotia ai i la’ua, ae le saili po o ai moni na fasiotia i la’ua.”

Ua faataupupula atu Tepora ia Tavita ma faapea atu, “Ae o le a le mafuaaga o le a taitaisese ai e Iosefa ia leoleo ma le latou suesuega?  Aua a maua ifo e sese lana mate, e toe upuia ai lava o ia.”

“E lua lava mea o iai,” o le tali mai lea a Tavita.  “Muamua, o lo o manatu Iosefa, e le taitai lava maua e leoleo le tagata na fasiotia nei mafine e lua.  Lona lua, o lo o iloa e Iosefa se mea e uiga i le fasioti tagata ae o lo o ia taumafai e faasese leoleo.”

Na fa’ate’ia le to’alua lea i le valaau mai o se tagata ia la’ua, “Tavita ma Tepora, faatali mai lava.”  Ae la tilotilo atu i le mea o sau ai le leo, o le alii o Iosefa lea e faatopetope atu i le mea o lo o la tutu mai ai.

“Na ou lagonaina lou auai mai i le taimi o faia la’u fa’aaliga,” o le tala lea a Iosefa ia Tepora.  “Ma sa ou lagona foi, e tatau ona ou sau e tu’uina atu se lapataiga ia te oe.”

“Aisea?” o le fesili atu lea a Tavita, ae peitai sa le’i amanaia mai lana fesili e Iosefa.

“O lo o lamatia lou soifua, Tepora,” o le faamatalaga lea a Iosefa ia Tepora.

Na faateia Tepora i le tala a Iosefa ma ia a’apa atu ma u’u mai le lima o Tavita, ae o le taimi lea, ua la’a atu ai Tavita ia Iosefa.

“Afai o iai se feau taua o e fia ta’u mai Iosefa, fai mai loa, ae aua e te taumafai e fa’afefe Tepora,” o a Tavita lea.

“E faamalie atu e le mafai ona o’u faamanino atili lea tulaga.  Ae ua na o se lagona sa ou fa’alogoina a’o fai la’u fa’aaliga, o lo o lamatia lona soifua e se tagata leaga,” o le tali mai lea a Iosefa.

“Ua iloa ai iina le pepelo o au mea na e fai, o lou le iloa tonu o le mea o le a tupu ia Tepora, ae na o le tau faafefe lau mea na e fai,” o le tali atu lea a Tavita ma lona le fiafia tele.

“E na o le pau le mea e mafai ona ou ta’u atu, Tepora.  Aua e te talitonuina se tagata ua leva na lua mafuta.  E na o le pau lea o le lagona ua o’o mai ia te a’u, e lapata’ia ai oe,” o le tala lea a Iosefa.  Ae fail ana tala ma faasepasepa mata aga’i ia Tavita.

Ua liliu Iosefa ma savali ese, ae ua na o le faataupupula atu o Tavita ma lona ita tele.

“O le a le mafuaaga o lana lapataiga?” o le fesili lea a Tepora ma tilotilo atu i le mea na savali aga’i atu iai Iosefa.

“O le a sou lagona? Mata o Iosefa na fasiotia Rasela ma Tina?” o le fesili atu lea a Tepora ia Tavita.

“Ioe, ua amata ona ou masalomia le ta tama pepelo le la o le fasioti tagata,” o le tali atu lea a Tavita.

E FAIA PEA!