Filifilia Lewis Wolman e avea ma Pulesili o kamupani uma a le aiga o Reid

Pago Pago - AMERIKA SAMOA

Ua filifilia nei e le faalapotopotoga o kamupani a le aiga o Reid, ia le susuga Lewis Wolman, lea sa avea ma pulesili o le Samoa News, e avea ma fa’auluuluga po o le Pulesili o kamupani uma o lo o i lalo o le faamalumaluga a le aiga o Reid.

E pei ona faalauiloa mai e le susuga Leone Peter E. Reid III, ua agava’a le alii o Wolman e na te tu i le foe mo le fa’aauauina o le galuega, o le ta’ita’ia lea o kamupani uma a lo latou aiga.

I le avea ai o ia ma Faatonusili, o le a tali atu Wolman i le Komiti Faafoe, e aofia ai alo ma fanau a le afioga Lealaifuaneva Peter E. Reid Jr., lea na maliu i le tausaga e 2016.

Na ta’ua e Leone, o le finagalo o le Komiti Faafoe, ia faamautuina le agai i luma o a latou kamupani, i le tautuaina o Amerika Samoa, e pei ona o latou faia i le 115 tausaga ua tuanai.

E ui ina o le a tumau pea le iai o pule eseese mo kamupani eseese i lalo o le faamalu a le aiga o Reid, ae o Wolman lea o le a avea ma pulesili i kamupani eseese.  O le a faataunuuina e ia tiute, e pei ona sa faia e le tamaitai ia Olivia C. Reid, lea ua faamautu atu nei i Hawaii e tausi si ona tina ma lona ‘aunt’.

O le masina o Iulai lea e faamoemoe, o le a faamaeaina ai lenei suiga fou ma amataina ai loa tiute o le pulesili fou ia Wolman.

Sa fa’aalia e Lewis Wolman lona mataina tele o le agaga tautua o nei kamupani e pei ona sa fausia mai e le afioga Lealaifuaneva i tausaga ua mavae.  

O le susuga Wolman sa pulea le Samoa News ma ina ua ia tuua le nusipepa, sa ia avea ma faauluuluga o Ofisa o Fesootaiga ale Blue Sky ma le ASTCA.  SA faalua ona avea o ia ma Peresetene o le Komiti o Faipisinisi i totonu o Amerika Samoa.  E le gata i lea, na tele ni tausaga sa auai ai o ia i totonu o le Aufaipese a le Arts Council a Amerika Samoa.  

O lo o faaipoipo atu o ia ia Eletise Matagi Wolman mai i le afioga o Pago Pago.

O pisinisi a le aiga o Reid, e aofia ai le Samoa Motors (Ford), le SLC lea o lo o faatauina fagu vai o le Vaimalu, GHC Reid lea o lo o faatauina atu apa inu o le Coca Cola ma le Vailima ma le ofisa vaa oloa o le Peter E. Reid Stevedoring.