Toe faaulu i luma o le faamasinoga le mataupu ia Malele

Pago Pago - AMERIKA SAMOA

Ua toe faaulu atu nei i luma o le Faamasinoga ia le mataupu e faasaga i le alii faiaoga o Senetenari Malele, lea o lo o feagai nei ma moliaga e 15, ina ua tuuaia o ia i lona tagotago i ni teineiti a’oga i se auala le talafeagai.

O le aso 3 o Aperila, 2023 na tulai ai Malele i luma o le faamasinoga mo lona uluai iloiloga, ma fuafua ai le fa’aauauina o lona iloiloga i le aso 13 o Aperila, 2023, ma o iina na faasolofua ai e le faamasinoga ia le mataupu faasaga ia Malele ae na tatala pea le avanoa e mafai ona toe faila lenei mataupu faasaga ia Malele, lea la na toe failaina e le malo i le aso na soso’o ai, le aso 14 o Aperila.

O le loia a Malele, o le susuga Marcellus Uiagalelei.

E tusa ai ma suesuega a le Samoa News, e foliga mai na mafua ona solofua e le faamasinoga le mataupu a Malele ona sa le’i fesiligia ia teineiti a’oga o lo o a’afia i lenei mataupu, e faamautu o Malele sa i totonu o le potu, i le taimi na tupu ai le faalavelave ia i latou.

E tusa ai ma faamaumauga a le faamasinoga, o lenei mataupu na tula’i mai ina ua ripotia e se teineititi a’oga vasega 7, faatasi ma lona tina, i le ofisa o leoleo, ia le tagotago atu o lenei alii faiaoga ia te ia, i se auala le talafeagai.  O nei faalavelave na tutupu mai i totonu o le aoga tulaga muamua a Pavaiai, lea sa faiaoga ai Senetenari Malele.

Sa faamatalaina e lenei teineititi a’oga i leoleo e faapea, sa faia e Malele nei tulaga ia te ia, i taimi o fai a latou vasega.

Ua ta’ua i totonu o faamaumauga a le faamasinoga e faapea, o le ulua’i taimi o lo o masalomia na tupu ai lenei mataupu, o le aso 13 o Mati, ma sa tupu lava i totonu o le potu aoga.  O lo o ta’ua i ripoti a leoleo e faapea, e tusa ai ma le faamatalaga a le teineititi aoga, sa tago atu Malele i lona puimanava, i lona lima taumatau, ma toso atu o ia ma faatu o ia i ona (Malele) tafatafa ma tagotago atu ia te ia, i se auala le talafeagai, ma fesili atu ia te ia, pe mana’o e taofi le mea o lo o ia (Malele) faia.

Ae e pei ona taua i le ripoti a leoleo, sa ta’ua e lenei teineititi, ona o lona fefe ina ne’i afaina ona maka i totonu o le vasega, o lea na ia le faia ai se tala.

O le taimi na tupu ai le faalavelave, e pei ona ta’ua i totonu o le ripoti a leoleo, sa faamatala e lenei teineititi, le toe tupu foi o le mea lea e tasi i le aso 27 o Mati, ma sa faamatalaina loa e le teineititi aoga i lona faiaoga o le ‘homeroom’, ma ripotia ai e lea faiaoga le faamatalaga a le teineititi i taitai o le aoga.

Ua ta’ua foi i totonu o ripoti a leoleo e faapea, o lo o iai ni tu’uaiga e faapea foi mai i nisi o teineiti aoga e to’a 6, o lo o tu’uaia ai lenei faiaoga, i le mea lava e tasi.  Ma sa aofia ai i totonu o le ripoti a leoleo ia faamatalaga a nei teineiti e to’a 6 ma o latou matua, lea sa suesueina e leoleo.

O lo o aofia ai foi i totonu o ripoti a leoleo ia se faamatalaga a se teineititi lea sa ia ta’ua ai le vaaia e ia ma nisi o le latou vasega mea sa tutupu, e pei ona faamatalaina e le teineititi mai i le vasega 7, lea na uluai ripotia le faalavelave.