TU LUA O PO MA AO

VAEGA 13

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

****************************

Ua nofo sa’o ifo i luga ia Tepora ma faatau pupula atu ia Tina, ae o le taimi lea ua le toe minoi le alii o Tavita ae ua lologo ona taliga I le faamatalaga a Tina.

“O se feau mo a’u?” o le fesili lea a Tepora.  “E aumai ia ai?”

“O si ou toalua ua maliu,” o le tali mai lea a Tina.

Na pei o le malo o le aisa, le malo o le saofai sasa’o a Tepora I lena taimi ma toe fesili atu, “Fai mai e a ia Jeremy?”

“O lo’o alofa tele mai mo oe, ma o lo’o faatali mo le taimi o le a mafai ona oulua toe faatasi ai,” o le tali lea a Tina.

Ina ua faamavae ma tuumuli atu Tavita ma Tepora mai I le fale o Tina, sa le’i mautonu le mafaufau o Tavita i le le toe pisa o Tepora, ae peitai,  e le’I mamao ese atu le savaliga a le to’alua lea mai i le fale o Tina, ae alu a’e i luga le ata faamaela a Tepora.  Ua na’o le pupula atu o Tavita, e pei ua leaga le ulu o Tepora ona o le feau lea sa maua mai i lona toalua ua maliu.

“E sa’o lava e pa le vaa a Tina,” o le tala lea a Tepora a’o taumafai e taofiofi lana ata.

“O le a le uiga o lau tala?” o le fesili le mautonu lea a Tavita.

“E le’I faia so’u toalua.  E leai foi so’u to’alua ua maliu,” o le tala lea a Tepora ma atili ai ona ata leotele.  “Ua iloa ai lava i’i  le pepelo tele o le tagata lea o Tina.

O le taimi lea ia Tavita, ua le iloa pe ata pe ita ia Tepora ma lana faamatalaga.  Ua savali atu ma oso i totonu o le taavale e faatali mai ai le alu atu a Tepora lea e savali atu lava ma ata.

Se’i tu’u ai i’i le to’alua lea, ae o tatou liliu atu i le tamaitai o Tina, lea ua nofonofo nei na’o ia i totonu o lona fale, ina ua o ese uma atu ana malo sa potopoto i luga o lana lauau ‘ai i lea afiafi.  O le alu o le ulu o Tina i ona mafaufauga, sa ia le lagonaina ai le pa’o mai o le laulau i totonu o le potu malolo.  Na faate’ia Tina ina ua tu le tagata i ona tafatafa.

“O le a le mea e te mana’o ai?” o le fesili lea a le tagata na tu I tafatafa o Tina.

Ua ataata le tamaitai o Tina ma faapea atu, “Fai faalelei lou leo ae ou te le’I ta’uina i tagata lau mea sa fai”.

Ua tu i luga Tina ma savali atu i le potu malolo ae o lo’o mulimuli atu ai le tagata lea sa alu atu.

“O le a le mea e te mana’o ai?” o le toe fesili lea a le tagata lea.

E fetaui lava le liliu mai o Tina o le a tali mai i le fesili, ae lia’i atu e le tagata lea se laau u’amea mamafa ma tau tonu lava i ona foliga.  Na soloi ifo i lalo o le fola o le fale si tamaitai o Tina, ae toe tau ai leisi ta a le tagata lea.

Na to ifo e le fasioti tagata se uati mai i lana taga ma vili uma vae o le uati ina ia fa’ailoa mai le ta tonu o le 12 ma ae na te le’i tu’uina le uati i luga o le fatafata o Tina, sa ia nunutiina le uati.

E FAIA PEA!