E FAI O LENA AE O LENEI

E le’i taitai vivini toa o le taeao, o lo’o sulugia pea paepae o le fale I le masina, ae ua leva ona tu I luga si tama o Sio ma taai ona fala ma aluga ma sili I luga o le fa’alo o le fale.  Ua savali atu I le paipa ma fufulu ona mata ma palasi ona nifo.  Ona alu ifo lea ua sui lona ie lavalava mama sa sulu ai, I lona ie lavalava fai maumaga.  Ua u’u lana sapelu ma savali loa aga’I I le umukuka.  Na muamua lava tapena meaai a nai ana pua’a, ona amo lea, u’u lana sapelu ae savali aga’I I gauta.  

Ua amata ona vaaia le alu a’e I luga le mata o le la, ma ua feala foi le aiga o Sio, le toeaina o Ioane ma le loomatua ia Mafa ma si a la teineititi o Felila.  Ua valaau mai Mafa, “Sio o fea oe?  Ua vela se ti, o le a tuai na alu Felila I le aoga?”  Ae o le taimi lea ua si’I ane ai le tipoti koko Samoa a le tama o Sio ma le falai panikeke.

“Faafetai lava le alofa, Sio,” o si loomatua lea o Mafa.  “Ia faamanuia lava oe e le Atua I au galuega alofa”.

Ua fai le ti a le loomatua ma le toeaina ma le teine o Felila ae valaau atu Sio, “O a’u lea la ou alu I gauta e tapena mai se tatou meaai mo nanei”.

“Ia ua lelei, ae manatua o nanei lea e fai ai le alalafaga I le aiga o Toeaso ma Teuila, I si a la fanau lea e taunu’u nei mai I Niu Sila,” o le valaau atu lea a le loomatua o Mafa.  “Vaai e tape mai se moa e fai ai se supo moa, o lea la’a alu le toeaina I tai, e su’e mai se I’a e falai”.

“Ia ua lelei,” o le tali mai lea a Sio ma aga’I loa I le maumaga.

Ua o’o I le aoauli, ae palasi le avega a Sio.  O talo ma popo faapea ma tau o le umu.

“Sau e ai muamua ona e alu ai lea e fai lau umu,” o le valaau atu lea a Mafa.

Ua saofa’I ifo Sio e koma teisi ma fai lana meaai.  “E toafia le fanau a Toeaso ma Teuila la e o mai?” o le fesili atu lea a Sio.  “O si a la fanau la e le’I faia ni ta’itoalua o Semi ma Mareta la e o mai e tafafao mai,” o le tali atu lea a le loomatua o Mafa.  “A uma na e ai, ona pu’e muamua mai lea o le moa, e faitalia a’u ma faasupo, ae alu oe e fai lau umu.”

“Ia ua lelei,” o le tali lea a Sio.  “Ua a’e mai le faiva a le toeaina?”

“Ai ua toeititi a’e mai.  Lea la’a o’u savalivali I tai e faatali,” o le tali lea a Mafa ma tu I luga mai I lana fala sa lalaga.

Ua o’o I le afiafi, ua manogi le umu a le alii o Sio, sasala le falai I’a a le loomatua o Mafa mai I le faiva a le toeaina o Ioane ia ma le supo moa ua lololo I le popo ma le fiu.

Ua agai atu nei Ioane ma Mafa I le fale o Toeaso ma Teuila, ae tamoemoe atu si tama o Sio ma le umu, supo moa ma le falai I’a.  Ua ulufale le loomatua o Mafa ma le toeaina ia Ioane I le fale tele, ma le teineititi o Felila ae faasasao Sio I le umukuka I le mea o lo’o vevesi mai ai le aiga I le tapenapenaga o le meaai o le alalafaga.

E fai a la galuega a Sio, ae faasi’usi’u mata mai I luma I le fale tele pe na te iloa mai le aumalaga mai Niu Sila.  Ua maea le lotu ma le taumafataga a le aumalaga ma malo fa’aaloalogia, ae ua punonou le au kuka ma le au faifeau I tua mo le latou faafiafiaga.  Na faateia si tama o Sio, o la e faomamama ae faatalofa atu le tagata, “Malo Sio, fefe ua e matua lava”.  Na toeititi laoa Sio I le tepa mai, o le tamaitai Niu Sila o Mareta lea e faatalofa atu, ae o lo o tu I ona autafa se tamaitai aulelei lava I le vaai a Sio.  

“Malo Mareta, ua e teine palagi lava,” o le tala ata lea a Sio.

Na ata Mareta ma faapea atu, “O si a’u uo lea o Melody.  Melody, o si tama lea o Sio, le atalii a Ioane ma Mafa.”

E pei e sipaka le tino atoa o Sio, I le papai atu o le lima o Melody e faatalofa atu ia te ia.  Ua laulogo uma itu o le aai I le talie a le au kuka ma le au fai feau I lena po ia Sio ma lana faatalofa.

IA MANUIA LE FAAIUGA O LENEI VAIASO