Toatolu taulelea molia fualaau faasaina tulai i le Faamasinoga

Pago Pago - AMERIKA SAMOA

O taulelea e toatolu sa taofia fa’apagota ina ua ma’ea sa osofaiga a leoleo i le fale i Lealoaloa i le vaiaso ua te’a, sa tutula’i i luma o le Fa’amasinoga Faaitumalo i le taeao o le Aso Lua o le vaiaso lenei, mo la latou ulua’i iloiloga. 

O i latou nei - Pereira Merciano, Fetoai Isa’ako ma Paul Taliva’a - na tula’i i le fa’amasinoga ona o moliaga o fualaau fa’asaina.

E $30,000 le tupe lea ua fa’atulaga e le fa’amasinoga e tatala ai i tua ali’i nei e to’atolu, e tusa ai o le poloaiga a le fa’amasinoga sa fa’atinoina e Leoleo Su’esu’e a le vaega o le Vice and Narcotics and Criminal Investigation a le Matagaluega o le Puipuiga o le Saogalemu Lautele. 

O lo’o fa’ailoa i le tagi a le malo i le fa’amasinoga e faapea, o le aso Faraile na te’a nei na maua ai e leoleo Merciano i totonu o se ta’avale.

Sa i ‘aao o leoleo se tusi saisai mai le fa’amasinogamo Mercia no ma ina ua aga’i atu i le ta’avale, na maua atu ai o ia i le nofoa o le pasese i tua o le ta’avale fa’atasi ai ma isi ali’i e to’atolu sa i ai. Na talosagaina Merciano e alu i fafo o le ta’avale ma taofia ai loa ma siaki e leoleo mo a’upega.

“Na matauina e le au leoleo se straw pa’epa’e pa’epa’e ua ma’ea tipitipi o lo’o iai se pauta, i lalo o le vaega o le nofoa sa nofo ai Merciano i totonu o le ta’avale,” o se tala lea a le malo i lana tagi i le faamasinoga. Ina ua fesiligia po o ai e ana lea straw, na musu Merciano e tali i leoleo.

O le tagi faasolitulafono a le malo o loo faailoa ai le taofia o Isa’ako ma le isi pasese e le’i molia.

Ina ua taofia uma e le au leoleo su’esu’e le to’atolu, na maua ai e le au su’esu’e se taga-simoi o lo o i ai straws pa’epa’e e 20 o lo o i ai i totonu pauta faasaina i lalo o le nofoa pito i tua.

O se su'esu'ega mulimuli ane o le ta'avale na maua ai ni straws e tolu o lo'o i ai pauta faasaina na maua i totonu o le vaega pito i luga o le ta'avale.

Ina ua fesiligia e leoleo le pasese e uiga ia straws, sa latou tali, latou te le iloa, ma o loʻo latou taumafai e toe foʻi i le fale.

Na taofia e Leoleo le ave ta’avale e le i molia. Mulimuli ane, sa ia fa’ailoa i leoleo e faapea o Merciano e ana fualaau fa’asaina na maua.

O lo o tu’uaia e fa’apea, o le afiafi lava lea na fa’ataunu’u ai fo’i e Leoleo se poloaiga e su’e ai Taliva’a i lona fale i le afioaga o Leloaloa e pei ona taua i le poloaiga e su’e ai.

Ina ua aga’i atu le au leoleo su’esu’e i le fale, na maua ai Taliva’a i totonu o le fale-taele faatasi ai ma se taga lanumeamata nisi straw ma nisi o mea e faaoaga i le tulaga o fualaau faasaina po’o le pauta faasaina.

Na fa’aauau pea le sailiga i le lotoa a le aiga o Taliva’a lea na maua atu ai e leoleo se ali’i o lo o saofa’i i fafo o le koneteina sa fai ma nofoaga e tafafao ai ma teu ai mea fagota a Talivaa.

Na maua e le au su’esu’e se taga simoi manino o lo’o i ai se pauta faasaina i totonu o se tasi o ato i totonu o le koneteina. Na maua foi e le au leoleo le tele o tane propane, faatasi ai ma le tele o straws ua ma’ea tipitipi i tafatafa o le koneteina.

Na ave e leoleo i le ofisa o leoleo se alii molimau ma logoina ai leoleo o fualaau faasaina sa maua i totonu o le container e a Taliva’a.

O alii uma e toatolu - Merciano, Isa’ako ma Taliva’a - ua molia i le umia faasolitulafono o fualaau faasaina ma le faamoemoe e tufatufa atu i le lautele.

O lo’o faagasolo pea lenei mataupu i luma o le faamasinoga.