Popolega o Senatoa i fuamoa faaulufale mai ae le'i faamaonia e le USDA

Pago Pago - AMERIKA SAMOA

A'o lei uma galuega o le aso na laga ane le finagalo o le Afioga ile Senatoa, Soliai Tuipine, ia faia se suesuega a le Komiti, i le mataupu o agiga i le taimi nei, faatatau i le faaulufale mai o fuamoa mai Samoa ma alu i luga o Ofisa faasalalau, a'o le'i taape le Fono mo lana malologa lima vaiaso. 

O le tauaofiaga o le Aso Faraile ale Maota o le Senate, na saunoa ai le Afioga a Soliai i ona ia foi popolega i fuamoa faaulufale mai Samoa, faapea o na oloa e le'i iai se faatanaga a le U.S.Department of Agriculture (USDA)s ma ose mataupu ogaoga lea mo le Fono. 

E leai se faamaoniga mai le USDA, saunoa Soliai ose popolega lea ile soifua o fanau o loo tausamia fuamoa, e le'o iloa mai e le malo feterale. 

O lana fautuaga ia faia le faatalanoaga a le Komiti o le Senate o mea tau faatoaga, ma valaau le aufaigaluega sinia a le Matagaluega o Faatoaga, e tali i fesili a Afioga i Senatoa. 

Na saunoa le taitai komiti, afioga i le senetoa ia Ponemafua Tapeni, i lona mata'ituina lava o le mataupu lea, a'o faasalalau ai i luga o le nusipepa ma le leitio. 

Na ia ta'ua foi le faatalanoa ai o le mataupu lava lea e le Komiti ole Maota o Sui i le vaiaso talu ai.  Peita'i e le'o iloa se taimi e toe taliu mai ai le Faatonu sili o le Matagaluega o Faatoaga o loo malaga i fafo. 

Na tali Soliai, e tatau lava ona aami le Sui Faatonu ole Matagaluega o Faatoaga e tali i le suesuega, ma na ia faatu foi se manatu, e faia se iugafono a le Senate ma tuuina atu mose faamaoniga, e taofia ai le toe faaulufale mai o fuamoa, ma faatalanoa vave le mataupu lenei, aua o lea ua faatau iinei ia oloa. 

O loo malaga i fafo le Faatonu ole Matagaluega o Faatoaga, Afioga a Solialealofiotagaloa I. T. Mutini e talu mai  Ianuari 16 ae toe taliu mai i fanua ia Fepuari 16, pei ona faailoa ane e le Sui Kovana, Talauega E.V. Ale’s , o le Susuga a Siauini Taala o loo sui Faatonu i le taimi nei, sei toe foi mai Solialealofiotagaloa.

Na tu'i fesili le Susuga a Taala e faipule i le taimi o le fono a le Komiti o Faatoaga a le Maota o Sui, faatatau i pailate fuamoa na faaulufale mai Samoa i le Teritori, e le kamupani Samoa, Sunshine Farm, i le lua vaiaso talu ai.