Ofisa o Leoleo, Malae Va’alele i Faleolo i Samoa

Pago Pago - AMERIKA SAMOA

I se lipoti mai Samoa, o lo’o fa’ailoa ai e fa’apea, talu ona maua le ulua’i pasese ua sola nana atu i Nandi Fiti i le va’alele a le Fiji Airways i le fa’ai’uga o le tausaga ua te’a, ua faia ai le fa’aiuga a le Matagaluega o Leoleo a le Malo o Samoa, ina ia fa’atulaia se latou Ofisa Autu i le Malae Va’alele Fa’avaomalo i Faleolo, ina ia latou vave mita’ia femalaga’iga fa’avaomalo ma e malaga ese atu mai le atunuu.

O le susuga le Komesina o Leoleo Auapa’au Logoitino Filipo sa ia fa’ailoa “Ua alagatatau fo’i lea tulaga aua ua iloga mai, o se ulua’i taimi lea ua sola fa’anana ai se tasi mai Samoa o Fiti i se va’alele, ma ua le mautinoa lava pe na fa’apefea ona tupu lea mea, ae ao lava ina taga’i toto’a sui faigaluega a lea va’alele i pepa ua fa’ailo ai nofoaga i totonu o le va’alele fa’ato’a fa’ataga se tasi e malaga.”

“O le saogalemu o tagata femalaga’i fa’apea fo’i ma le anoanoa’i o e fia fa’amavae ma fa’atali va’a i le Malaeva’alele i Faleolo ua alagatatau lava fo’i ona matua fa’amautinoaina i le taimi nei. Ua amata ona siitia mea uma e tautua ai le mamalu fegasoloa’i o le atunuu fa’apea ma aiga e fa’amavae ma fa’atali va’a, ma ua faapea fo’i ona tatau ai ona siitia ma le ala e fa’amautinoa ai le saogalemu, ma fa’amamaluina tulafono uma e tusa o e tatau ona malaga ma i latou e le tatau ona so’ona oo fua i luga o va’alele.”

Ua faaopoopo nei la le auaunaga a le Matagaluega i le vaega o loo masani ona latou puipuia le saogalemu o le Malaeva’alele sa masani ona latou mataituina, poo sekulati masani sa latou leoina le malaeva’alele i Faleolo. “O le faamoemoe ia matua mautinoa ua le toe maua mai nei ituaiga o solitulafono i femalaga’iga,” ose tala lea a le Komesina o Leoleo.

“O le taimi nei ua i ai fo’i la fesuia’iga o lo ua fa’atautaia ai galuega puipuimalu o le au femalaga’i fa’atasi ma e fa’ataliva’a ma fa’amavaega fo’i i e malaga ese atu, ma ua fa’ao’o atu i le Pulega o le Malaeva’alele ina ia latou fa’atautaia ai galuega i aso ta’itasi ae maise lava i taimi e tulaueleele mai ai va’alele tetele i le tatou malae sese’e.”

I aiaiga lava o tiute fa’atino fa’avaomalo, e ao lava ina i ai se lala o le Matagaluega o Leoleo i le Malaeva’alele, o lea la ua fa’ato’a usita’ia fo’i lea o aiaiga e le tatou malo i le taimi nei.

“I le taimi nei ua tapena nei le avanoa ua fa’atulaga mai e le Pulega o le Malaeva’alele mo le Matagaluega o Leoleo e fa’amautu ai ana tautua i lea fo’i vaega taua i le atunuu, ma ua fiafia lava ua mafai ona fa’atino lea itu taua o le tautua. O se se mea fo’i e tatau lava ona faia a’o le’i oo atu i le fonotaga a Matagaluega o Leoleo uma lava i le Pulega o Malo Soofa’atasi i lalo o le Pulega a Peretania Tele lea e faatasia i le tausaga e 2024.”

“O nisi nei o mea o le a fa’amauina mo lea fonotaga e fa’amautinoa ai le se’ese’e malie atu fo’i o le tatou Matagauega O Leoleo ina ia fa’amautu atili ana tautua uma e moomia mo le Malo o Samoa ma le va ai fo’i ma isi malo, ina i mafai ona vave mataituina soligatulafono e oo uia mai i malaeva’alele mai isi malo tulata mai i Samoa,” o se tala fiafia lea a Auapa’au.

Peita’i le suesuega ile tamaitai e 24 tausaga le matua lea na malaga fa’anana i le va’alele a le Fiji Air, ua toe faafo’ia sa’o mai lava i Samoa ma ua le mafai ona saunoa mai le susuga le Komesina o Leoleo e tusa o tulafono ua mae’a solituina e lenei tama’ita’i  i lona toe taliu mai i Samoa, peita’i o lo’o tagai toto’a i ai le matagaluega i solitulafono ua solituina ma le tele fo’i o ana solitulafono e ao ina fa’asalaina ai lea tamaitai.