Tulafono taufaaofi, lesitala ma palota tagata mai fafo nofomau Amerika Samoa

Pago Pago - AMERIKA SAMOA

E toalua afioga i senatoa mai Manu'a, le afioga ia Malaepule Saite Moliga ma Ma'o Faauma S. Gogo - sa fa’auluina i le vaiaso ua te’a se tulafono taufaaofi a le Maota Maualuga, e teuteu ai le tulafono faalelotoifale, e faataga ai ona palota tagata fai mai, o loo nofo mau i Amerika Samoa. 

O le tulafono taufaaofi o lo’o talosagaina ai se suega i le tulafono o lo’o i ai nei i lalo o le vaega, "Talosaga mo Lesitala" e ala i le faaopopo iai ole vaega fou, e agavaa ai tagata nofo mau faaletulafono i Amerika Samoa ona palota i le taimi o Palota a le teritori. 

O le vaega faaopopo lea o loo faapea mai: "e ao i lea tagata ona nofomau faaletulafono i Amerika Samoa, e aofia ai lona ID faapitoa mai le Ofisa o Femalagaiga, e tusa ai ma le (tulafono faalelotoifale) 41.0403, e tatau ona 30 tausaga sosoo o nofo mau i Amerika Samoa, ma atoa le 20 tausaga o totogi ana lafoga.”

Ma 'ia , "tuuina atu e lena tagata ni faamaoniga ile Ofisa Palota."

E tusa ai ma upu tomua o le tulafono taufaaofi e lo’o taua ai e fa’apea, Amerika Samoa ma ana tagata nofomau, e "soifua ma tausisia le tulafono e tasi, ua tuuina atu e le Fono Faitulafono mo tagata uma o le Teritori, e ui, e laititi poo le leai foi ose malosiaga e latou te filifili ai se faipule o le maota o fausia tulafono."

Ua le gata i lea, o tagata ua 30 tausaga sosoo o nofo mau i Amerika Samoa, ma atoa le 20 tausaga o togi lafoga, “ma faamaonia lo latou auauna ma le faamaoni i le teritori, e tatau ona ave i ai lea aia tatau" e palota ai. 

O loo faapea mai foi, o le faataga ose tagata nofo mau faaletulafono, e palota, ose faamanuiaga e una'ia ai le galulue faatasi ma le amanaia o tagata nofomau i le teritori. 

"Ole faatanaga o latou na e palota , e faamalosi'au ai ia latou tautua i le tatou teritori ma le Unaite Setete,"  

Ua maitaunia e le Samoa News, e le'o le taimi muamua lea ua faaulu ai lea tulafono taufaaofi i le Fono, i le sau a'i o tausaga ua mavae, ae le'i maua lava sona taunuuga.

Sa iai faatalanoaga a fono ua tuana'i, aemaise - lava o le finau mai o i latou nofomau e faapea - "Ua tele tausaga o matou nofomau ma togi lafoga ile malo"  ma fai sao ile atinaeina o Amerika Samoa.

E leai se vaega o ta'ua ai i le tulafono taufaaofi, o le aia tatau e palota ai le tagata nofo mau faaletulafono i Amerika Samoa, e mo na'o le palotaina o Faipule i Amerika Samoa i le Maota o Sui.