TALA I VAIFANUA

Pago Pago - AMERIKA SAMOA

E LE FA’AVAVEA FA’APASIA TAUSIMA’I PASI MAI FITI E LE KOMITI FA’AFOE

Ua faailoa e le Taitaifono o le Komiti Fa’afoe o le Falema’i LBJ Medical Center Tuiolosega, “E le fa’avavea e le Komiti lenei ona fa’agalulue tausimai pasi mai Fiti ae le’i ausia e i latou le aiaiga ua mae’a fa’ataoto e i matou e mafai ai ona fa’akonekarate e galulue mo le 3 tausaga muamua.” 

Ua fa’amanino atili fo’i le aiaiga na fa’atulaga mai le amataga e fa’aulufale mai ai nei tausima’i pasi mai Fiti, “E mua’i aiaia le fa’atagaina tausima’i pasi mai Fiti e galulue i le tatou falema’i ma tuu avanoa e a’o’oga ai i le Kolisi Tuufa’atasi mo le 6 masina. Ina ia mafai ona su’ea ai latou tusi pasi NCLEX, ona fa’ato’a sainia ai lea o latou Konekarate galulue mo le 3 tausaga E mafai ona fa’afou mo le isi tolu tausaga, ona faatoa mafai lea ona toe malaga i latou i Fiti ma toe filifili pe toe fia sau e faigaluega pea i Amerika Samoa pe leai.”

“Ona o le tulaga utiuti o le aofai o tausima’i pasi galulue i le falema’i, ua mafua ai ona talosagaina pe mafai ona faigaluega tamaitai tausima’i mai Fiti ae ia fa’apu’upu’uina le taimi e tuuina atu mo i latou e a’o’oga ai ma su’e loa lava le latou tusi pasi o le NCLEX lea e moomia e fa’afaigaluega ai i latou i le Iunaite Setete o Amerika ma ona Teritori,” o se saunoaga lea a Motusa Tuileama Nua o le Soifua Maloloina.

“Ona o lea e ave tausima’i pasi nei poo RNs mai Fiti i le vasega a le CNAs poo Nurse AIds e tatau ona ave i latou i le vasega a le RNs e talafeagai ma o latou tofiga sa galulue ai i Fiti, ina ia vave ai le taimi fa’atulaga ae su’e loa le suega e i latou, aua o nisi ua masani i faiva ae moomia laisene e galulue ai i Amerika Samoa.”

“Afai loa ae pasia uma e tausima’i pasi nei mai Fiti lea suega i le na’o le tolu masina e tauavea ai a’oa’oga fa’amasani, ua faigaluega tumau loa mo le ulua’i tolu tausaga.”

TAUNUU I LE DOI - SUIGA FA’AVAE O AMERIKA SAMOA

I se pepa o fa’amatalaga mai le Ofisa o le Kovana, ua fa’ailoa au le mae’a fa’ailoa e le tamaitai Sui Failautusi a le Initeria mo Insular & International Affairs, Carmen G. Cantor i sana toe tali i le tusi a Kovana Lemanu PS Mauga fa’atasi ma suiga tau fa’aofi o le Fa’avae o Amerika Samoa, ua mae’a umia e i la’ua nei suiga uma, ma o se latou fiafiaga fo’i, aua ua mae’a faia iloiloga fa’alaua’itele ina ia autasia le to’atele o le atunuu i nei suiga ua pasia lelei.

Ua le gata i lea ae ua fa’ailoa mai, ua aufa’atasi i la’ua ma le Failautusi o le Initeria  Deb Halaand, e faitau ma silafia lelei agaga ua mafua ai ona mana’omia ona fa’aofi nei suiga taua ua pasia atu e le faigamalo. Ua palota le atunuu ma ua latou filifili e fa’aofi nei suiga i le Fa’avae o o Amerika Samoa.

O Tesema 14, 2022 na meli atu ai nei suiga ua tamau fa’aletulafono ma ua tapena ina ia sainia muamua e le Failautusi o le Initeria mo lona fa’amautuina e fa’aofi ai i le Fa’avae o le Malo o Amerika Samoa, ua to’ai taunuu fo’i ia Tesema 23, 2022 i a’ao o le Failautusi mo lona silafia lelei, fa’amaonia ma tamau ai i lana saini.

“I la oulua faigamalo, le vasega o ta’ita’i tofia o le Maota Maualuga o lau Fono Faitulafono fa’apea le Maota o Sui Tofia o Faipule o Itumalo Ta’itasi, tainane fo’i le pa’ia lasi o tagata palota o le Malo o Amerika Samoa, ou te fa’afetaia le avanoa ua ou maua e fa’amaonia ai suiga ua mae’a fia fa’aulu i le Fa’avae o le Malo o Amerika Samoa, aua ua mae’a iloilo ma ua fa’ailoa ua pasia lelei ina ua taua’aoina mo la’u saini. Peita’i, a’o tatou aga’i pea i luma, ia fa’ataua e i tatou uma avanoa lelei  e auai ai e fa’auia suiga tatau i Fa’avae o tatou malo e ala i lau aia tatau e te palota ai, a’o tatou o ola pea.”

“O lo ua taua’aoina nei suiga nei, o le a iloilo toto’a i ai ma afai e i ai nisi mea e fia feutaga’i atu e tusa ai ma nei suiga, o le a toe fa’ailoa atu se’ia o’o lava ina fa’amautuina nei suiga mo le saini tamau a le Failautusi o lenei itu o le tautua. Toe fa’ailoa atu le agaga fa’agae’etia ona o le mafai ona tutufa’atasi le faigamalo ma tagata lautele ina ia iloilo ma fa’amautu ni suiga ua fa’aofi i le Fa’avae o Amerika Samoa,” se tala mai lea a le Sui Failautusi Cantor.

O suiga e lima sa pasia e le au palota ma ua tuuina atu i le Initeria:

• Ia mafai ona palota le sui Faipule o Swains i pili e fa’apasia i le Maota o Sui.

• Fa’atulaga le Aiaiga Fa’aletulafono e mafai ai ona fa’atula’i ese Kovana ma le Lt. Kovana

• Suia le igoa tamau “Government of American Samoa” i le “American Samoa Government”

• Suia le Ma’uputasi i le Ma’oputasi i tusitusiga

• Suia le igoa Leasina i le Leasina ma Aitulagi

Ua faafetaia e le Kovana sili le sui failautusi ona o le tele o mea e fesoasoani malosi mai ai i le tatou malo ae maise fo’i o le latou galuega o lo’o toe fa’ataunuu ina ia mautu ma lelei mea uma ua aiaia mo le Fa’avae  o Amerika Samoa.

“Ua mautinoa o lo’o tatou faia o tatou tiute ina ia faamautu ma usita’ia aiaiga uma, e tusa ai ma tulafono tamau e fa’ataunuu ai ma fa’aofi suiga fou i le Faavae o le Malo o Amerika Samoa. O lo ua tatou oo mai i si’ui o lea fo’i galuega tele ua mae’a mo le teritori, ua fa’aalia i finagalo o tagata lautele o Amerika Samoa.”

LEAI SE POPOLEGA - MAUA PEA VAI PENISINI AMOXICILLIN

I le taimi nei, ua toe fa’ao’o mai se fe’au taua e le Pule Sili o le LBJ Medical Center, Moefa’auo Bill Emmsley, “E leai se popolega o le atunuu e tusa o le tulaga sioti ua mae’a fa’ailoa atu e le falema’i, o loo maua pea le Amoxicillin mo le fanauiti. E ui ina ua leai se sapalai o lea vaila’au penisini mo le fanauiti, ae ua i ai isi ituaiga vaila’au penisini e aoga fo’i mo le togafitiga lava o inifeti i taliga ma gutu o le fanauiti e pei ona masani ona fa’atonuina mai ai e foma’i.”

“E mautinoa o lo’o ua sioti le sapalai o le Amoxicillin i le Iunaite Setete atoa, ae o lo’o lava le sapalai mo tagata matutua ma talavou. O lona uiga o lo’o tulaga lelei pea le tatou itu tau le togafitiga o gasegase o le atunuu,” o se fa’amatalaga lea a Moefa’auo.

O le vaipenisini lea o le Amoxicillin e fa’ato’a fa’aaoga lava pe afai ua va’aia ua amata ona inifeti manu’a poo fa’apepe fo’i e tutupu i totonu o gutu, fa’a’i taliga o le fanauiti ona o lo ua i ai nisi siama fa’aopoopo atu ma a’afia ai le manua sa tau fa’apepe. 

I le vaitau o pepesi fo’i le Covid-19 sa matua fa’ateleina fo’i ma fanau na a’afia i gasegase nei ma ua moomia atili ai le sapalai o lea vaipenisini, lea la ua sioti atoa ai le Amixicillin i le atunuu atoa.

“O le a fa’aauau lava ona aputiputi lelei le fa’aaogaina tatau o le tatou lea vaipenisini lea ina ia fa’aaoga tatau lava! Se’iloga lava ua va’aia e matua moomia lava e se tasi ona tuuina atu lea, ae ua i ai isi vaipenisini e mafai ona fa’ao’o atu muamua i sui uma e gasegase pe aoga ma malolosi ai i latou,” o se tala lea mai le falema’i.

“O le a fa’aauau lava ona tapena le tatou vaega o faletalavai ma mataituina fo’i le fa’aaoga tatau o le tatou Amoxilcillin se’ia oo ina lava ma totoe fo’i le tatou fa’asoa, ae ia fa’autagia mai lava, aua ne’i avatua vai mo le isi tamaititi ae fa’aaoga mo le tasi tamaitititi, o le afuga lea ona le toe aoga vaipenisini i togafitiga o gasegase o nisi, ona sa le tatau ona so’ona inumia fo’i e i latou vai e le’i fa’atulagaina atu e foma’i mo latou na.”