TALA I VAIFANUA

Pago Pago - AMERIKA SAMOA

POLOKETI FA’AMAUMAU AI LE OLAOLA VAOMATUA: VAEGA FUAFANUA ASCC

O le polokalama o lo’o fa’atautaua e le Vasega Fuafanua o le ACNR a le Kolisi Tuufa’atasi a Amerika Samoa (ASCC) ua mafai ona malaga mai nisi mai le Matagaluega o Fuafanua a le Malo tele ina ia galulue faatasi ma le fanau e sailiilia se tulaga lauolaola o tatou vaomaoa poo vaomatua.

Ua fa’ailoa mai i lea vaega o le Polokalama fa’ataoto a le Au Fuafanua mo le latou lipoti mae’ae’a e fa’amauina ai le “lautele o le ogala’au o la’au o ola i tatou vaomatua, le tele o ituaiga la’au e ola ma pipi’i atu ia’au tetele nei ae le papa’i i le palapala, e fuaina fo’i le mafala o lau o le la’au tetele e fa’atusatusa i lona ogala’au; e fuaina fo’i le tele ma le lautele o la’au o lo’o ola fa’amalumalu e la’au tetele i totonu o le vaomatua o Amerika Samoa.

Ua fa’ailoa mai o lo’o ua mae’a fa’amautu nei le latou ulua’i lipoti ma sa fesoasoani tele le vaega a le USDA i le latou taumafaiga lenei ma sa fa’asinoala i latou i mea uma lava e tatau ona fa’amaumau, ma ua fa’alautele atili fo’i lo latou iloa a’o galulue fa’atasi i latou ma sui na malaga mai le USDA.

O le lipoti lenei o le a fa’ato’a toe faia le isi latou suesuega i le 2032 ma fa’amaumau fo’i mo se latou fa’ai’uga fa’atusatusa o lea ituaiga lipoti mo tatou vaomatua ua fa’aigoaina o le Forest Inventory & Analysis [FIA] ma ua aotelega lea lipoti atoa e fa’atasia ai o tatou Vaomatua ua mae’a fuatia mai isi setete uma o le Iunaite Setete ma ona teritori.

Ua fa’ailoa mai o aiaiga uma o lea ituaiga lipoti fa’amaumau o le vaomatua ua tamau ma e matua aoga fa’amaonia ona fa’amaumauga uma e iloa ai le olaola o vaomatua uma lava, e aoga tele e faamau ai le olaola lelei , ni mea e moomia ona faaleleia ma ala eseese o lo’o a’afia ai le olaola lelei o la’au uma i le vaomatua.

O le isi aoga o lea fo’i lipoti e fa’amaumau uma ai ituaiga o la’au eseese o lo’o ola i o tatou tuamaota poo tatou vaomaoa, ma umi fo’i e mafai ona olaola lelei ae amata ona tuga le ola lelei ona o a’afiaga o matauina i le eleele o ola ai ma mea o sofa’i atu ona o suiga matuia o le Tau. O le iloa gofie fo’i le tele o le kasa kaponi o fa’amutu i la’au, suiga tetele e ono matauina i le vaomatua, le tele pe to’agaogao o la’au e le o moomia ona fa’ateleina i o tatou vaomatua, poo la’au ia e tatau ona tape ese mai le vaomatua ona ua avea ma la’au fa’alafua.

O nisi o nei la’au ua lisia mai e aofia ai le Lopa, Tamaligi, Pulu Vao ma Maniuniu. E vave na’ua le latou lauolaola ma tape atu ai ma le tele o isi la’au e tuai lo latou ola fa’atauva i le suluia e le la.

O lenei aotelega o fa’amaumauga ua fa’atula’ia ai le FIA poo le Lipoti o Tatou Vaomatua, ua aoga tele lea i o tatou tagata, ina ia tatou iloa ai, pe afai e fa’atula’ia o tatou Maota, ia silafia la’au e ao ina fa’asao ma la’au fo’i e ao ina tape mai o tatou tuamaota.

“Ia aoga le lipoti lenei e silafia ai e o tatou tagata ae maise fo’i o aiga olo’o i ai vaomatua i o latou eleele, ituaiga o la’au e ao ina fa’aolaola lelei, ma la’au e ao ina tatu’u i lalo ia fa’aititia mai eleele. O le silafia lelei fo’i o le mea o i ai nei o tatou vaomatua ma se fa’amoemoe o fia to’ai taunuu i ai le tatou fa’asao lea o le vaomatua, e tatau ona agaga i ai o tatou lava tagata,” o se tala lea a Dennis Sene Jr.

O i latou sa galulue mo le aotelega o nei fa’amaumauga uma mo tatou vaomatua ua aofia ai Ashley Lehman, Jonathan Marshall, Matthew O’Driscoll, Mikhail Yakstov, Seth Ayotte, Steve Trimble ma Patrick Baird mai le USFS; Matt Terlaje ma Matt Van Cruzmao le University of Guam; Adam Miles ma Ace Lalogafu’afu’a mai le Department of Marine ma Wildlife Resources; Anthony Wyberski, Simon Leo, ma  Siuleo Pouesi mai le ASNPS; ASCC-ACNR GIS Specialist Neil Gurr; ASCC-ACNR Pule o le Folesi Denis Sene Jr. ma le aufaigaluega Simon Stowers, Uiki Isaako, Fa’afo’i Tony Maugalei, ma Pasia Setu; ma le ASCC-ACNR Forestry Sui o A’oa’oina o Cher Nomura, Lessie Fualau, Pua Tofaeono, Ime Mata’utia, Gideon Brosius, Talofa Fe’a ma Folasa Galea’i.

E lua masina sa fa’atino ai lenei galuega tele, ia mautu lelei fa’amaumauga o le tatou Vaomatua, ma sa fili fa’apitoa ai vaega o eleele e 72 mo lea fa’amoemoe. Na soo fo’i le vaomatua o Amerika Samoa i nei vaega eleele sa fa’aagaaga mo le suesuega, ina ia mautu le lipoti lenei ae o se aotelega o le vaomatua o le atunuu atoa.

E 46 vaega o eleele sa fa’amauina mo lipoti mai Tutuila; 19 i Ta’u; 6 i Ofu; 1 i Aunuu. Mai lea tele o eleele na fa’atulaga e 47 eleele na maka i Tutuila ma Aunuu, e 43 na mafai ona mae’a suesueina ma fa’amaumau mo le lipoti ua mae’a nei. E 2 eleele e le’i mafai ona fa’ataga se asiasiga fa’amaumau i ai, 2 ua le mafai lava uia e le au faigaluega mo se fa’amaumauga ona e matua le gafatia ona e ono lamatia ai le soifua. Mo le 16 o vaomatua o le Manu’atele, ua fa’ailoa mai e le’i mafai ona faia se suesuega i eleele e 9 ona e le’i uia muamua, ae o le 16 ua mae’a fa’amauina mai.

Ua fa’ailoa e se tasi o sui mai le USDA, “O vaomatua o Amerika Samoa ua tulaga ese lona matagofie ae maise fo’i o i latou sa matou galulue, ua matua tele lava fo’i ni mea aoga ua matou maua mai i lenei malaga fesoasoani mai i le fuaina ma fa’amaumau  Vaomatua o Amerika Samoa nei,” o se fa’amatalaga lea a Ashley Lehman.

“O nisi o mea sili ona mata’ina i lenei suesuega faamaumau o le Vaomatua na matou mauaina lea i vaomatua o Aoloau ma Fagamalo. O le vaomatua ua tele i ai Tavai i Ofu, e tetele lava la’au, ae matua leai lava ni fa’amoega pi e ono lamatia ai i matou a’o faia suesuega mo fa’amaumauga. O le agaga fiafia fo’i o tagata uma e fesoasoani ia i matou, o se isi lea mea e fa’afiafiaina atili ai i matou e faia le galuega ia mae’a lelei,” se toe tala mai lea a Lehman.

“O le auai ai o se tasi o i matou o talavou i le atunuu e faia lenei lipoti fa’amaumau o tatou vaomatua, o se avanoa ua sili ona fa’afiafiaina ai lo’u sui. Aua e le tele ni taimi e mafai ai ona fa’alogo i ala e tatau ai ona fa’amaumau nei mea uma,  le leleiga mo le atunuu atoa e maua mai ai, ae maise o le maua fo’i o tomai fa’apitoa mai nisi o sui mai le Malo tele sa matou galulue, o se mea e le mafai ona maua so’o lea mo i matou le fanau talavou i Amerika Samoa,” se tala lea e Lessie Fualau.

Ua fa’afetaia fo’i e le FIA nisi sa latou fa’apa’aga i lenei taumafaiga o nisi o matagaluega o le Malo Amerika Samoa, le peresetene o le Kolisi Tuufa’atasi Rosevonne Pato, Fa’atonu o le DMWR Taotasi Archie Soliai, Le Failautusi o le Mataupu Tau Samoa, Mauga T. Asuega ma le Pule National Park i Amerika Samoa Scott Burch, ae maise le mamalu lautele o afio’aga ma e uma e ona eleele sa suesueina mo lenei fa’amaumauga.

LIPOTIA NOAA - GATAIFALE AMERIKA SAMOA, A’AFIA I SUIGA O LE TAU

Lipotia mai e le NOAA, talu mai le tausaga e 2007 se’ia oo i le 2020, ua fa’ato’a tapena lea o se lipoti o se aotelega o se va’aiga lautele fa’amaumau mo Fa’asao uma lava ua mae’a fa’amamaluina lona malupuipuia i le gataifale o Amerika Samoa.

O lenei lipoti fa’amaumau i se va’aiga lautele ua aofia uma ai Fagatele Bay na fa’amauina i le tausaga 1986 i Gataifale o Futiga, ona toe fa’alautele lea ma fa’aopoopo atu i ai isi fa’asao ua atoa ai 6 i le tausaga e 2012: Fagalua/Fogama’a, Aunuu, Ta’u, Swains, Muliava ma Fagatele Bay.

I le taimi nei ua aofia i Fa’asao o le Gataifale o Amerika Samoa le aotelega e 13,581 sikuea maila o le sami fa’apea ma le laueleele o Amerika Samoa ma ua avea nei o se Fa’asao sili ona tele lea i le Iunaite Setete atoa.

Ua fa’amauina lenei ulua’i lipoti o se va’aiga lautele i le tulaga ua i ai le fa’asao lenei mai le tausaga e 2007 i le 2020, o lo ua fa’asaoina le tele o sosia uma sa manatu ina ia fa’ateleina, peita’i e le o atoatoa ona lauolaola lelei uma nei puna’oa ona o a’afiaga o lo’o fesaga’i ma meaola uma i le faasao atoa, ona o a’afiaga e afua mai i fesuia’iga matuia o le tau.

O mea tumau ua fa’amauina o le a’afiaga e afua mai i le so’ona vevela o ave malolosi o le La, avea ai le toe felanulanua’i ai le ‘amu ae ua na’o le papa’e atoa, o le a’afiaga fo’i lea o le so’ona tetele o timuga ma fa’ateleina le palapala e tatafe mai i le sami ma ua a’afia ai le saogalemu ma le ola lelei ole amu e ofaga i ai meaola uma o le sami, ua atili ai ona fa’alelava le sosia e ola lelei ai meaola uma i le gataifale. O lo ua i ai fo’i le tulaga o a’afiaga mai le fa’alapisi i le gataifale o tagata soifua i afioaga tulata i nei fa’asao. Ua aofia ai le asuemu o lo’o elia i laufanua e latalata i nei gataifale ma ua tetele ai tafega o eleele e aga’i atu i le sami, ma ua fa’apunafanau ai le mau fa’afitauli i le olaola lelei o le amu ma meaola uma o ofaga i ai.

Ua avea nei fa’alapisi ma eleele solofa atu i le sami ma ala e motusia ai le fa’agasologa o le olaga o meaola uma i le gataifale poo le sami o lo’o taumafai e fa’asao.

Ona o lenei lipoti e fa’amaumau ai fo’i ma ala e mafua ai ona omia le soifuaga laulelei uma o meaola i le fa’asao, o lea ua mae’a fa’amauina ai le itu o le fa’asao i Aunuu, ua a’afia fo’i le ola lelei o le amu ona o le suavai lafoa’i atu i le sami mai le aotelega o le atunuu o lo’o tumau i le tatou motu lea o Aunuu.

O lo ua fa’amauina mai o lo’o tulaga lelei le suasami i le fa’asao atoa, ae ona o le latalata ane tele o le Eleele o lo’o Sua mo le sapalai o le palapala ma iliili e fa’atino ai le tele o galuega tetele i le atunuu, lea ua avea ma se mea e lamatia ai le lelei atoatoa o le siomaga i le Fagatele Bay fa’apea fo’i ma Fagalua/Fogama’a i Futiga lava.

Ua lipotia mai fo’i le fa’ateteleina o le Alamea i le fa’asao fa’apea ma Aveau, ma ua avea nei ma se fa’afitauli e tatau ona fa’aleleia aua o nei meaola e fa’aleagaina e i latou le amu o a’au. 

Pe afai e ave’esea uma nei fa’aletonu, o se lipoti mautu mai, o loo sologa lelei le aga’i atu i luma o le Fa’asao sili ona tele i le Iunaite Setete ma ua taumafai fo’i e fa’atula’ia ni polokalama e galulue aga’i i le fa’aititia atili lava o nei a’afiaga e ono sofa’ia atili le saogalemu ma olaola lelei o le fa’asao ma meaola uma o ofaga ai.