TALA I VAIFANUA

Pago Pago - AMERIKA SAMOA

FA’AMAUTU 85% MEDICAID FMAP MO TERITORI UMA

Ua pasia e le Konekeresi a le Iunaite Setete le pili e aiaia ai le Pasene e totogia e le Malo tele mo pili a le Medicaid e 85%[FMAP] mo tatou tagata ua agava’a i le Medicare, o le tupe lea e mafai ona totogi e le Medicaid mo latou pili mo talavai i le tausaga e 2022-2023.

Ua taua’aoina atu nei lea pili ia Peresetene Biden ina ia sainia e fa’apasia ai lona fa’amalosia mo teritori uma e aofia ai ma Amerika Samoa, ma fa’atulafonoina ai.

O le pili lenei o le Omnibus e $1.7turiliona lona tele e aofia ai le fa’amautuina o le pasene lea e totogia e le Malo tele mo pili Medicaid uma a le tatou teritori e 83% ma le $1miliona ua sili ai nai lo le paketi fa’asoa sa fa’atulaga mai Matagaluega o le Initeria.

Fa’ailoa manino e le faipule o Ameirka Samoa i le Konekeresi, Uifa’atali Amata, “E lua mea ua aoga tele mo Amerika Samoa i lenei pili, e ese mai fo’i i nisi o faatupega ua taua’aoina mo isi tautua uma i le teritori. Muamua, ua mae’a toe fa’amautu mai nei e le Konekeresi le faatupega sa mua’i pasia mai i le 2019 ua mautu ai le FMAP mo teritori laiti  i le 83% lea sa mau lava i le 55% mo tausaga e tele ua tuana’i. O le FMAP o le pasene lea o pili a tagata ua agava’a i le Medicare e totogia e le Malo tele. O le avanoa lea ua maua fo’i ele tatou malo e fa’aaogaina tatau ai nei vaega tupe ua fa’asili mai e fa’aleleia atili ai le tautuaina o le soifua laulelei o le mamalu lautele o le atunuu.

Lona Lua, o le pili lea ua aotelega mai ai ma le $1miliona le tupe fa’asili e mafai ona fa’aaoga e le Malo mo galeuga lautele a le Malo ma o le a fa’asoa mai fo’i e le DOI lea e fa’amautu i ai lea tinoitupe.

O le teugatupe lea a Amerika Samoa i le DOI e mafai ona talosagaina mo ni galuega fa’atino e moomia vave ona faia e pei o le tautua poo le sao o le Malo i le vaega o Fa’amasinoga, Ole lona ono ai lenei o tausaga o fa’aopoopo pea lava le tinoitupe mo galuega lautele a Amerika Samoa ma ua maua ai nei le aotelega e $5.3miliona talu mai ona si’itia pea le FMAP mo le tatou teugatupe lea i le DOI mo le tatou Teritori.

Fa’ailoa e Uifa’atali, “O le fa’atumauina a’ia’i o le 83%FMAP, o se ‘ai lea o taumafaiga ia manumalo i le finauga mo tatou teritori laiti o le Iunaite Setete, aua o lea ua mafai ona tatou fa’alagolago atu e fa’afinaua lea siitaga i tausaga ta’itasi, ae ua mafai nei ona fa’amautinoa le tumau o lea fesoasoani tele mo tatou teritori laiti uma i le Iunaite setete atoa. Fa’afetai tele i le galulue malosi ma le finauga mai a le tamaitai faatonu Sandra King-Young ma le aufaigaluega, ua mautu mai ai fo’i lenei alamanuia mo tatou tagata.”

Ua ia fa’ailoa fo’i, “O le si’itaga ua mautu nei i le tatou teugatupe lea, o se mea lelei tele aua e mafai ona tua i ai le tatou malo mo tatou tagata lautele.”

“Pe afai e tumau lava le fa’atupega lea e pei ona fa’amauina nei, o lona suiga o le teugatupe lea ua mae’a maua le aofai e $5.3miliona, e uma ane le 10 tausaga ua silia ma le $50miliona lona tele,” se toe tala fiafia lea a Uifa’atali. 

FA’ATUPE SOSAIETE “CHAIRING IS CARING” 

O le Fa’alapotopotoga a le Chairing is Caring lea ua fa’ailoa mai ua maua e i latou le fa’atupega e mafai ai ona latou tautuaina le atunuu e ala i nofoa fa’ata’avalevale mo i latou ua le mafai ona toe savavali ona o tuga o feagai ai ma i latou o le tino.

O le na fa’atuina lea fa’alapotopotoga Sandy Samoa, ua ia fa’ailoa mai, “O lo ua matou moomia lava nisi o talavou ma so’o se tasi lava e agaga i lenei fa’amoemoe, o lo ua aga’i atu ina avea ma se tasi e moomia se nofoa fa’ata’avalevale e fealua’i ai, ina ia auai mai o ni totino fa’amau a le matou nei Fa’alapotopotoga. Afai e le’i maua fo’i sou nofoa fa’ata’avalevale ae le’i maua lava, ua mafai fo’i ona avea oe ma se totino o le Chairing is Caring.”

Fa’ailoa e Samoa, o le ofo lea ua tapena mai, ua na’o i latou ua maua i gasegase poo manu’aga fo’i e oo atu lava ina moomia ai le nofoa fa’ata’avalevale i le lumana’i ona o le fa’agasologa o a’afiaga o feagai ai. Mo se fa’ata’ita’iga, o se tasi ua fa’aaoga i le taimi nei le to’oto’o, ae o le lumana’i o le soifuaga, e oo lava ina fa’aaoga loa le nofoa fa’ata’avalevale ina ia fealua’i solo ai. 

O nisi o gasegase tumau ua agava’a sui ua a’afia ai e aofia ai gasegase o le Cerebral Palsy, Meningitis, ma le Paralysis. Pe afai ua i lou faila nei gasegase ua agava’a oe i le Chairing is Caring. Peita’i i le taimi nei, ua agava’a se tasio Talavou i lenei Nofoa Fa’ata’avalevale aua ua fa’amaonia le maua o ia i le gasegase e faasolosolo atu lava ina tuga atili ona a’afiaga ma moomia ai lona nofoa fa’ataavalevale e mafai ai ona fealuai o ia.

O Thomas o lo’o nofomau fo’i o ia ma tausia lelei i le Hope House ma e maua o ia i le Cerebrl Palsy. Ua mae’a ona tu’ufa’atasia le a’ao foa’i o nisi i le vaitau o le agaga foa’i ma fesoasoani sa taua’aoina e le mamalu lautele o le atunuu, lea ua gafatia ai ona mautu le nofoa fa’ataavalevale mo Thomas.

O Ianuari 06, 2023, o le a faia ai se ‘aiga fiafia ma fa’atino ai le taua’aoina aloaia atu o le Nofoa Fa’ata’avalevale lea mo le susuga Thomas. O lea fa’atasiga o le a faia lava i le Hope House ma e faamoemoe o le a to’atele nisi e vala’au atu i le numeta 731-3959 ma lisia lou suafa mo nei mea faigaluega aoga mo i latou ua po’ia i nai gasegase tuga. O le aiga fiafia lea e fa’afetaia ai fo’i i latou uma na tautiga i le taumafaiga o lenei nofoa fa’ata’avlevale mo Thomas.

TO’AI TAUNUU & FAIA SAO O TALAVOU PESE MO I LATOU

O lenei tausaga i lona vaitau fiafia o le tausaga 2022, ua matua ese le tele o mea fa’afiafia ua lava tapena i ai le Malo, ekalesia ma nisi o fa’alapotopotoga ina ia tima’ia i latou e ala i fa’afiafiaga o pesega o le Kerisimasi ma le Tausaga Fou, ae maise fo’i o sao o le fanau talavou a le atunuu, ua taliu mai i fanua, ma faia latou fa’afiafiaga  ma pesega faanei ona po o so’o se ituaiga, o mea e fiafia tele i ai talavou uma .

O Tennelle Luafalemana  ma le susuga Poetik sa faia la’ua fa’afiafiaga matagofie mo le tupulaga i le DYWA fa’apea ma le  Bowling Sports Bar i Tafuna lea sa maua ai le avanoa o Wudrough Tommy BayMax 2.1 mo sana pese rap mo le ulua’i taimi a’o loma le Kerisimasi 2022.

Sa tumutumu i ai le tupulaga aua ua lauiloa pesega ma fatuga a nei sui, ua fa’afofogaina e i latou ma ua mataina lava lo latou fiafia i ai. Peita’i o le fautuaga ma le agaga fiafia a le tamaitai i Tennelle, “Talavou afai e te fiafia e pese, pau lava lau mea e fai o le to’aga e pese. E foa’ia e le Atua isi mea uma ia te oe pe afai e te to’aga i lau taleni, tau lava o le to’aga e pese. Pese i vi’iga, pese i so’o se ituaiga o pese, a Ia e pese.”

O le malaga lenei a le tamaitai o Tenelle ua tau le motusia le asiasi mai o ia i le atunuu, aua e mautu lona iloa lelei, o lona tupuaga e sili ona taua ia te ia, o ona matua matutua fo’i e tatau ona ia maua ai fa’amanuiaga uma o lo’o ia moomia i ana taumafaiga uma.

Sa talanoa mai o ia i so’otaga tafa’ilagi ma ia fa’ailoa ai, “O le malaga lenei o le toe fa’afo’i i lo’u atunuu na ou tupuga mai ai le faafetai ma o le fa’amanu fo’i e si’itia faatasi ma lo’u aiga atoa i le Atua o mea uma. O ia e foa’i ma o ia fo’i e mafai ai ona fa’aleleia ma atoatoa ai taumafaiga uma. Fa’afetai tele lava!”

O lana malaga ta’amilo lenei ua fa’afiafia ai o ia i Fiti, Tonga, Samoa ma Amerika Samoa. E moni sa soifua a’e o ia i Amerika, ae o lona agaga,a a’ano ma toto e Samoa a’ia’i. 

“E le galo i le teine Samoa lona motu, e le galo fo’i ona aiga o mea e mautu e le suia lava, ae o le taleni ua foa’iina mai e le Atua e avea lea o le auala e mafai ai ona fa’ataunuu mea uma e te naunau i ai, pe a o gatasi ma le finagalo o le Atua! O le malaga ta’amilo lenei, e toe fa’afo’i ai le fa’afetai mai le teine o le motu i ona aiga, ana uo mamae ma lona Atua.”

E tolu a la’ua koneseti na fai fa’atasi ma Poetik o se tasi e pese tautala poo le Rap Music. O lo ua toe malaga ese mai i la’ua mai Amerika Samoa ina ia faia le la’ua koneseti mulimuli i Hawaii.  A maea le la’ua fa’afafiaga lea i Hawaii ona toe taliu lea i aiga i Kalefonia.