TALA I VAIFANUA

Pago Pago - AMERIKA SAMOA

LE FA’AITITIA LAINA PU’EGA O LAISENE AVETA’AVALE LA’U PASESE & UTA :

O le toe aso na fa’ataga ai ona aoga le laisene la’u pasese o ave pasi, ave ta’avale laiti la’upasese ma Loli tetele la’u uta ae maise o va’a la’u pasese, o Tesema 31, 2022.

Peita’i, mai le vevesi o nai ave ta’avale la’u pasese e fa’amae’a latou laisene, ae o lo’o tumutumu fo’i laina latou i le fia tapena o Laisene Ave Ta’avale o tagata nuu moni o Amerika ma Amerika Samoa ina ia malaga ese mai ma le atunuu, ae ua mafai ona umia latou laisene nei, e mafai ai ona femalaga’i i so’o se setete ma teritori o Amerika, e pei lava o se tusi folau mo i latou.

O se taimi muamua lea ua tali tutusa lelei lava mea o moomia e fa’amaonia ai lou umia o le Laisene Ave Ta’avale ma va’a La’u pasese ma le Laisene mo tagatanuu moni o Amerika ma Amerika Samoa ua tapena nei. O lona uiga e i ai kilia a le Fa’amasinoga e mafai ona fa’amauina ai sala e le o totogia ma isi soligatulafono uma e fa’amaumau mai e Leoleo a le Malo mo so’o se ave ta’avale. Ua i ai fo’i ma le Kilia a le falema’i, e le o a’afia oe i se fa’amai e ono pesia ai le pasese ma ua aofia ai le Kilia fo’i o le Covid-19. E ese mai lea a’o fa’amaoniga o lou alaala tumau i le teritori e moomia ai kilia mai le pili o le eletise ma le vai mai le ASPA poo le Kilia mai telefoni a le ASTCA e mautu ai o loo e alaala i Amerika Samoa.

Ona o le tele o nei kilia e moomia, ua tutusa lelei ai lava nei kilia a i latou e ave ta’avale la’u pasese ma uta mamafa ma sui fo’i o le atunuu o loo fia fa’amautu latou laisene Amerika Samoa.

O le tulaga uumi ai la lea o laina mo lea tautua lautele a le Ofisa o le OMV, matagaluega o le Puipuiga o le Saogalemu Lautele a le tatou malo.

O le to’ateleo ave ta’avale la’u pasese ma uta tetele i le atunuu, ua masani lava i latou ia latou kilia e moomia, ae o le to’atele o le atunuu e le’i masani lelei i latou i tapenaga uma mo latou laisene Amerika Samoa, ma ua tele ai fa’asea i le uumi o laina ma le umi o taimi e moomia ai le fa’atali umi fa’ato’a oo le vala’auiga ina ia pu’eina le Laisene.

Peita’i, ua fa’ailoa mai lava e le susuga le Sui Komesina o Leoleo, ua ia fa’ailoa mai ai lava fa’amaoniga e moomia tonu mo laisene Amerika Samoa o mea lava e tolu: Numera Saogalemu, fa’amaoniga o oe, o lou ID lea, ma le fa’amaoniga o lou nofo mau i Amerika Samoa.

Afai e taua’aoina lou Saogalemu, fa’amolemole aua nei fa’ava’a i’ilaina lou Numera Saogalemu ona e faigata i le masini ona toe puea ai.

Ua fa’ailoa mai, o le to’atele o nisi e le o talosagaina ni Laisene ave ta’avale la’u pasese o le fa’atuai ona pu’e latou laisene ona e moomia lava ona fa’amae’a totogia mai latou sala i le Fa’amasinoga, ma le toe fa’amaoniga o lo latou nonofo mau i Amerika Samoa lea e moomia ai lau pili uila ma le pili vai poo le ASTCA.i lou igoa e tutusa lelei ma le igoa o lo’o fia pu’ea ai lou Laisene Aveta’avale.

O fa’amaoniga nei e na’o le tasi lava le taimi e moomia ai ona fa’amaonia, ae a toe sau e faia le isi laisene ave ta’avale i le tausaga fou i le fa’aiuga o lenei tausaga, e le toe moomia lea fa’amaoniga.

AFEA E LE UNITED AIRLINES AMERIKA SAMOA - FUAFUA MO SYDNEY AUSETALIA:

O le malaga a le va’alele tele a le United Airlines sa fuafua mo Sydney Ausetalia na sese’e mai i le tatou Malaeva’alele ia Tesema 30, 2022. O lana malaga lea sa malaga mai i le malaeva’alele i Los Angeles ma e malaga sa’o i Sini Ausetalia, ae ua le mafai ona fa’aauau pea ona o ni fa’aleotnu i le va’alele.

O le ituaiga va’alele lea o le Boeing 787 ma ua mae’a fa’ailoa mai e 230 lana pasese sa malaga mai ai. O lo ua mae’a fa’afeso’ota’ia se malaga mai a le vaalele mai Ausetalia ina ia tulaueleele mai i Tafuna ma le inisinia ma totoga o moomia ona faapipi’ia o le va’alele ua tulaueleele nei.

O le taimi ua fa’atulaga e to’ai taunuu ai le malaga lea mai Ausetalia o le 12:00 i le po, ma ua avea nei le aufaigaleuga a le Hawaiian Air ma sui e fa’afeso’ota’ia lea pasese atoa ma tautuaina i latou i ni feso’ota’iga uma e fa’aauau ai le latou faigamalaga i le Laumua o Ausetalia.

Ua fa’ailoa mai e Tavita Fuimaono o le pulega a le Malaeva’alele i Tafuna, “O le to’atele o le pasese o lo’o ua faaoo atu i le Tradewinds mo se malologa ae le’i toe fa’afeso’ota’ia mo le fa’aauauga o latou faigamalaga. Peita’i o nisi e talavou o le faigamalaga, ua latou fa’aaogaina tatau lea taimi ua maua e faimalaga solo ai e tafafao ma maimoaina le tatou teritori.”

Peta’i o le to’atele lava ua latou fa’aaogaina tatau lo laou taimi e nofonofo ai ma faia nai fa’atauga fo’i i faleoloa o loo i ai i le tatou malaevaalele e toe tatalia ai le fa’aauauga o le malaga.

Ua fa’ailoa mai ua mae’a fo’i ona fa’atonuina e le afioga le Kovana sili Lemanu Peleti Mauga, ta’ita’i o matagaluega eseese a le tatou Malo, ina ia fa’aaoga tatau latou taimi ma avanoa lelei e fa’ailoa ai le agaga talimalo lelei o Amerika Samoa, ia mautinoa ua fa’aoo ane ni vaimalu ma nisi o mea taumafa mama mo le aumalaga ae maise i latou o loo latou nonofo pea i le malaeva’alele e tatalia ai le to’ai taunuu mai o le va’alele e toe tuuva’a ese atu ai, ma nisi o tafafao maimoaina le atunuu i ona nofoaga matagofie, ia fa’ailoa i ai le agaga talimalo lelei ma le laufofoga tausa’afia, aua o nisi ia o avefe’au lelei mo i tatou uma i Ausetalia.

Ua faa’tulaga le va’alele lea e to’ai taunuu mai Ausetalia ma totoga o lo’o moomia ona fa’aleleia o le va’alele, fa’apipia e Inisinia o lo’o malaga mai ma totoga, ona fa’ato’a toe fa’aauau ai lea o le faigamalaga a le United Airlines mo Sydney Australia i le itula e 3:00 i le vaveao.

PO O TOE MATAUINA EA, E TOE LUTIA I TATOU I LE COVID-19?

Ua matauina o lo’o ua toe si’itia fo’i i luga le faitau aofai o e ua toe fa’amauina ua maua fo’i i le Covid-19 i le masina o Tesema 2022, ua tali tutusa ai lava le mea ua tupu i Amerika Samoa nei ma Hawaii foi ma isi uma lava setete ma teritpri o Amerika.

Ua faailoa mai e le susuga le Foma’i i le LBJ Medical Center, Dr James Sunia, mai le fa’amaumauga a le falema’i ia i latou uma ona faia ai le suega a le Covid-19 mai ia Tesema 1-15, 2022 e to’a 93 i latou ae na’o le to’a 5 i latou ua maua ane e fa’amaonia le maua i le covid-19.

Mai ia Tesema 16-27e to’a 83 i latou na faia ai suega ma ua maua ane e to’a 23 i latou ua maua i le Covid-19.

“O lo ua mautinoa lava ua toe fa’ateleina mai le faitauga o i latou ua fa’amaonia le suega a le Covid-19 ma ua moni ai lava fa’amaumauga e pei fo’i o isi malo uma ae maise o isi Setete o le Malo ma teritori o le Iunaite Setete o Amerika.

“O le vaitau lenei ua to’atele tagata e femalaga’i solo ina ia asiasi i aiga ma ua o mai lava fo’i ma ni fa’aletonu tau le soifua maloloina o lo ua maua ai, o le isi lava lea ala e mafua ai ona fa’ateleina le pepesi o fa’ama’i i nei vaitau tumutumu o femalaga’iga i le lalolagi.” O se tala fa’aopoopo mai lea a le ali’i foma’i o Sunia.

O le to’alua o nisi ua po’ia ma fa’amaonia latou su’ega o le Covid-19 o fanau pepe ma ua taofia sa’o lava le fanau lea i le ICU, ae o lea ua togafitia nei i le potu taofia o le fanauiti i le falema’i, le Pediatric Ward.

O le isi ua te’a mai le falema’i ma ua toe mama fo’i lona po’ia ai i le Covid-19.

TOE VALA’AUINA TAGATA FAIGALUEGA STAR KIST - AMATA GALUEGA IANUARI 03

Ua fa’asalalauina fa’alaua’itele mai e le Kamupani a le Star Kist Samoa uma o le a oe amatalia latou galuega mo le tu’uina o le apa i’a ia Ianuari 05, 2023. O le tapunia ai o galuega uma a le Kamupani Ia a le Star Kist Samoa mo le lua vaiaso, ina ia mafai ona tuuina le avaoa i tagata faigaluega uma e fa’atasi ai pe malaga atu fo’i e asiasi i o latou aiga i Samoa ma iinei fo’i.

Ua fa’aaogaina tatau fo’i e le Kamupani lea vaitaimi atoa e toe fa’aleleia ai mea e tatau ona fa’aleleia mo le aufaigaluega e fa’atino ai latou tiute ma masini fo’i e tatau ona siakia lelei ma toe fa’aleleia ni mea o faaletonu a’o malolo galuega a le aufaigaluega.

Ona o lea ua fa’ailoa mai le aso e toe amata ai galuega o Ianuari 03, peita’i o le malaga fa’apitoa a le ‘MV Lady Samoa IV’ lea e fa’atulaga e to’ai taunuu i le atunuu i le aso Lua lava lea, Ianuari 03, 2023.

Ua fa’ailoa mai i le fa’asalalauga lea, o le ulua’i vaega lava e moomia ona galulue i le aso 03 Ianuari, 2023 o le vaega lea a le ‘au fa’amama o le i’a, lea e aofia ai le vaega a le kiau, fa’amama ma le vasega o le QC. Peita’i o ie isi vaega uma o le aufaigaluega, ua mafai lava ona fa’ato’a faigaluega atu e pei ona fa’atulaga ai latou sifi i le galuega.

O le to’atele lava o le aufaigaluega a le Star Kist sa malaga sa’o lava i Samoa mo le vaitau o aso malolo, ma o lo ua fa’ailoa mai fo’i o le latou malaga fo’i mo le aso 03 Ianuri, ua fa’atulaga e toe taliu uma mai ai le to’atele o le aufaigaluega atoa na masii i Samoa.

Peita’i o le malaga masani a le MV Lady Samoa IV lava latou o le aso Tofi, Ianuari 05, 2023, o aso Tofi o vaiaso ta’itasi.