Tumau fuafuaga Kovana fausia se falema’i fou i Tafuna

Pago Pago - AMERIKA SAMOA

Ua te’ena e le Faigamalo a Lemanu ma Talauega se talosaga a le Pule Sili o le Falema’i, LBJ, ina ia fa’aaoga le $21 miliona o tupe fetarale e toe fa’aleleia ai le falema’i o lo’o i ai nei, ae le o le fausia o se falema’i fou - e pei ona fuafuaina. 

O lea tulaga na fa’amaonia mai e le ofisa sinia a le Kovana Sili, ia Loa Tauapa’i Laupola e pei ona tali mai i fesili a le Samoa News i lenei mataupu. 

Peitai e lei fa’aalia e Loa se fa’amatalaga i le tulaga o le fe’ese’eseaiga o le lisi e faatatau i fanua a le Malo i Tafuna o le a fa’atu ma fausia ai le falema’i fou.

O le masina ua te’a na fa’amaonia mai ai e le Pulesili o le Falema’i, le tofa ia Moefa’auo Bill Emmsley i le Samoa News le fa’amoemoe mo le fausiaina o se falema’i fou e 40 moega i le pito i luma o le Lions Park i Tafuna, o lo o taofia, ona o se feeseeseaiga i le lisi le fanua a le malo i lea nofoaga.

Sa i ai fo’i le fa’amoemoe o le ali’i pule ina ia “mafaufau” le ali’i kovana e fa’aaoga le vaega tupe e fa’atupe ai le falema’i fou e fa’aleleia ai le nofoaga o lo o i ai le LBJ.

“E le’i suia lava le ta’ita’iga a le Kovana i le falema’i fou,” o le saunoaga lea a Loa i se imeli mulimuli i le Samoa News.

E pei ona lipotia muamua e le Samoa News, o le $50 miliona mai le $300 miliona mai le tulafono a le feterale o le American Rescue Plan Act (ARPA), o lo o fa’aagaaga mo le fa’afaigaluegaina, taofia, ma le toe a’oa’oina o tagata faigaluega i le LBJ atoa ai ma le nofoaga fou ua fuafuaina e 40 moega i Tafuna.

“O le alagatupe e fa’atupe ai nei fuafuaga e taua tele i le faatosinaina ma le fa’atumauina o tagata faigaluega agava’a e fa’atino ai galuega tau soifua maloloina i Amerika Samoa ma aoga,” o se vaega lea o tusitusiga a le LBJ i ana pepa talosaga fa’atupe a le ARPA na fa’amatu’u atu i le ofisa o le malo, le ASG ARPA Oversight Office.

O nei gaioiga o le a foia ai faʻalavelave tetele e fesoʻotaʻi ma le faʻafaigaluegaina o tagata faigaluega, faʻatumauina o le aufaigaluega, penefiti a le aufaigaluega, faʻaauau aʻoaʻoga / aʻoaʻoga, fale, ma totogi.

Faaalia e Moefa’auo, e fa’apea ina ua tofia o ia e avea ma Pulesili o le LBJ, ua uma ona faia le faaiuga e fausia se falemai fou e 40 moega.

“Na ou faia la’u lava iloiloga i lipoti ma o le faaiuga na ou maua ai o le a lelei le faaalu o le tupe pe a teu i le toe faaleleia o le falemai o loo iai nei,” o le fa’amatalaga lea a Moefa’auo.

“E mana’omia le fa’aleleia o le falema’i o le LBJ, i le tulaga o atina’e, fale, mea faigaluega fa’afoma’i ae sili ai fo’i foma’i ma tausi soifua, o lo’o ua matua’i mana’omia.”

“Atonu o se fa’amanuiaga lea mo i tatou e toe iloilo ai fuafuaga o lo’o i ai nei ma fa’asoa le vaega tupe lea e fa’aleleia ai le tatou falema’i e tasi” e fa’atatau i le lisi ua finauina.

“Ae peita’i o le mataupu o lo’o fa’apea ona ua uma ona fai le finagalo o le Kovana,” o le saunoaga lea a Moefa’auo.

Ina ua fesiligia pe na ia faaleo ona popolega i le Kovana, na tali le Pule Sili, ioe.

“Ua uma ona ou faailoa atu i le [Kovana] o’u manatu faapolofesa e uiga i lenei mataupu ma o le a ou toe alu e vaai le  kovana, i lenei mataupu o le lisi o loo i ai.”

“E le mafai ona matou tuuina atu le tauofoga i le ua manumalo ona o le fanua a le malo o loo fesiligia o loo finauina,” o le saunoaga lea a Moefaauo.

I se taimi ua fano sa fa’ailoa ai e Moefa’auo o lo o i ai se feeseeseaiga ma se kamupani o lo o i ai le lisi o le fanua o lo’o fuafua e fausia ai le falema’i fou i Tafuna. 

Na taua foi e le Pule Sili se suesuega sa faia e le U.S Army Corps of Engineers Honolulu District i le 2019 o loo faataoto ai fautuaga e toe faafou le falemai, ae le o le fausia o se falemai fou.

O le kamupani na manumalo i le ofo mo le fausia o le falemaʻi fou e fa’amautu i Honolulu - Architects Hawaii Limited.