TALA I VAIFANUA

Pago Pago - AMERIKA SAMOA

TOE TOTOGIA E LE FEMA - $1.9M I LE LBJ MEDICAL CENTER:

Ua fa’ailoa mai, ua toe totogia atu nei e le FEMA le aotelega e $1.9miliona i le LBJ Medical Center, ona o lo ua latou galulue pea ma fa’aauau le galuega na moomia ona latou fa’atinoa, “Ia ona fa’aleleia ma fa’alautele le Potu Taofia o le ICU, le potu taofia o le Pediatric Ward, le Potu mo Taotoga; Potu Fa’atiga o Tina Ma’itaga; ma o galuega nei sa amatali a mai lava ia Aperila 2022 e tapena vale ai ia lava ma totoe moega mo e a’afia i le Covid-19, ina ua lutia le Amerika Samoa i lea fa’ama’i.”

O le vaega lona lua lea o le tinoitupe atoa na toina mai mo le Falema’i Tele i Faga’alu ona o le latou tutumau e fa’atino uma aiaiga na fa’atulaga mo lea fa’atupega, ma o lona vaega mulmuli fo’i lea o lena alamanuia. 

Mai lea galuega tele ua mae’a fa’aopoopo ai le 26 moega ua mae’a fa’atulaga ai masini e tatau ona fa’aaogaina mo togafitiga fa’atasi ai ma le masini sapalai o le Okesene mama mo gasegase o togafitia, fa’atasi ai ma isi masini uma e fa’aaogaina e togafitia ai gasegase ua po’ia i le Covid-19.

Ua fa’ailoa fo’i le agaga fa’afetai tele o le tatou faipule i le Konekeresi, Uifa’atali Aumua Amata ona o le toe fa’amatuu maia fo’i o le vaega lua o lea fa’atupega e le FEMA mo le LBJ Medical Center, o le aoga sili lea ona taua mo le mamalu lautele o Amerika Samoa.

“O lo ua matauina le galulue a’ia’i o le aufaigaluega a le LBJ Medical Center i le tausaga atoa ma ua fa’apea fo’i ona fa’ataunu’u uma aiaiga ua moomia mo lenei fa’atupega, ma o le a le aoga mo sina vaitaimi lenei fa’atupega ma le suiga lelei ua fa’atula’ia i le tatou falemai tele, ae ua aoga mo se taimi umi e fa’aleleia atili ai le tautuaina o le atunuu e ala i le tausia lelei o gasegase e fa’ata’otolia o latou gasegase i nei vaega uma o le falemai ua fa’aleleia atili.”

“O le naunauta’iga lea ua vaaia nei i le fa’atinoga o galuega fai mo le falemai, e atili ai fo’i ona fa’aosofia le lagona ma le fa’amoemoe e fa’atino uma taumafaiga ina ia mautu mai se tatou falema’i fausia lelei fa’atasi ma faiga o lenei talutalufou e tusa o le fausaga ae maise o mea uma e fa’aaogaina mo togaifitiga o gasegase eseese e foma’i ma tausima’i i totonu o se tatou falema’i fou o lo’o fia fa’amautu nei. O le a le gata i se falema’i fou, ae o le suia fo’i o le la’asaga o tomai eseese e tautuaina ai le tatou atunuu pe a fa’atula’ia se tatou falema’i fou ma fa’ateleina nisi avanoa e ono faafaigaluegaina ai nisi e to’atele.”

Ua fa’amalo mai fo’i le tatou faipule i ta’ita’i o le tatou faigamalo ae maise o le Pulega o le tatou falema’i i lana Komti Faafoe ma le Pu;e Sili ona o le latou fo’i pitolaau ae maise lava le vasega o le aufaigaluega i le LBJ Medical Center sa nafa tonu ma lea itu o le tautua lautele, lea ua tino mai ma ua toina fo’i le ‘ai o le manumalo, aua ua mae’a faia le galuega i le atoatoa e tatau ai.

O le fa’afetai fo’i i le vaega patino o le FEMA sa latou toe fa’amautu maia le vaega lua o le tinotupe lea le susuga le pule ia Deanne  Criswell ma le latou vaega o le auaunaga na sapaia ai Amerika Samoa ina ua po’ia i le fa’ama’i ma latou fa’aleo ai se mana’oga tupito mo lea fesoasoani ia toina mai.

SAO MAI TAGATA MAULU - ‘AINA E LE MALIE:

O se tama e 43 tausaga le matua, sa maulu e fa’atino ni galuega o Paipa i ogasami o lo’o i ai le Star Kist Samoa, ua fa’ailoa mai ua togafitia ona manu’anu’a tuga ina ua sofa’ia o ia e le Malie ao faia ana galuega.

O le tala mai o lenei ali’i e sau mai Portlamd, Oregon ma e faigaluega i se Kamupani i Amerika Samoa.

O ona manu’aga e pei ona fa’ailoa mai e Dr. Akapusi Ledua, e fai si loloto o ona manu’aga i lona vaega agavale ae ua tele fo’i lona toto ua masa’a i le taimi na oo atu ai i le falema’i.

Na vave lava ona fa’ao’o o ia i le potu mo taotoga ma latou galulue ai e su’ia ona manu’aga ma na fa’ato’a mae’a le galuega a foma’i e tusa ma le 4 ma le afa itula na faia ai.

Ina ua mae’a sa taofia o ia i le Potu Surgical a le tatou falema’i tele e ua fa’asolosolo lava ina manuia lona tulaga o ona manu’aga e pei ona fa’aalia i lipoti faamaumau a foma’i tiute.

Ua fa’ailoa mai o lo’o ua amata fo’i gaoioiga a Foma’i ina ia mafai ona siitia ese o ia mai le teritori e auina atu i Portland Oregon e fa’aauau ai ona togafitiga se’ia toe faaatoatoaina ai lona malosi.

E tusa ai ma se fa’amatalaga a se tasi o aAlii Maulu, ua ia fa’ailoa ai, “Atonu e le’i la’eia e le sui lenei la’ei e tatau ai mo tagata maulu e fa’atino ai ona tiute, peita’i e mautinoa lava e ia sa taulimaina e ia le tama’i naifi lea sa mafai ona ia tatuia ai le malie ma ua fa’asaoina mai ai o ia i lea taimi.

Ua i ai fo’i nisi sa latou molimauina le va’aia e  latou o malie i le ogasami tonu lea sa faailoa mai sa fa’atino ai tiute o lenei ali’i talavou,

TOINA MAI E LE CDC - $3.4MILIONA MO LE SOIFUA MALOLOINA:

Ua fa’ailoa mai le toina mai fo’i e le US Centers of Disease Cintrol & Prevention o le aotelega o le tinoitupe e $3,425,012. mo le Matagaluega o le Soifua Maloloina e fa’aleleia atili ai latou fa’amaumauga, le tapenaga o le aufaigaluega ma le galeuga tima’i uma o feagai ai ma le matagaluega o le soifua maloloina i le atunuu.

O lea aotelega o le taumafaiga lenei ua fa’atupe mai, ina ia mafai a’ia’i ona o’o auaunaga lelei uma tau le soifua maloloia i tagatanuu o le teritori i soo se mea o alaala ai, ma ia fa’aleleia atili le ala o tautua eseese nei e oo lava i le tomai ma agava’a o tagata faigaluega o lo’o latou fa’atinoa nei tautua.

O lenei fa’atupega ua fa’atulaga mo le lima tausaga, e ao ai ina mautinoa ua mae’a faia galuega a le Matagaluega o le Soifua Maloloina, e pei ona fa’atulaga mai ai i aiaiga tamau o lea faatupega.

“O le soifua Laulelei o le atunuu, o le fa’ailo mautu lava lea o se atunuu ua lelei lo latou tausiga ma soifua fiafia fa’atasi ai. O lenei tinoitupe o le a aoga tele lea mo lea fa’amoemoe ia mae’a tausia lelei ai le soifua lautele o le atunuu ma ia fa’ateleina ai tagata faigaluega e galulue a’ia’i i lea fa’amoemoe lelei.” O se tala mai lea a le tatou Faipule i le Konekeresi.

Ua ia fa’afetaia fo’i le pulega o le CDC, le fa’atou o Dr Rochelle Walensky ona o le latou sapaia pea o tapenaga a le Teritori o Amerika Samoa i lea auaunaga taua mo latou tagata.

Ua ia fa’afetaia fo’i le vasega o ta’ita’i mataala o le atunuu ona o le latou una’ia malosi o ala uma e mafai ona si’itia ai le tausiga o le soifua maloloina o le mamalu lautele e le afioga le kovana ma le taupulega atoa, ona o nei galuega lelei uma e fuafua tatau mo le leleiga o le atunuu atoa.

I le fa’asalalauga fa’alaua’itele a le CDC ua latou folasia ai le latou mana’oga tupito ina ia faalogo i latou i fanoga uma e auina atu mai soo se vaipanoa o lo’o mautinoa e tetele ai le mana’omia e fa’aleleia le Soifua Maloloina, ma tuu sa’o mai fo’ i ai le fesoasoani o sili ona latou mana’omia.

O le taimi nei o le mea sili ona moomia e nu’u tumamao mai i saute o le atumotu o va’aia patino e le Iunaite Setete o le si’itia lea o le tulaga e tautuaina ai lo latou soifua maloloina lelei. E ui ina mamao ese mai i saute ae ua iloga e to’agaogao ma e moomia tele ona fa’ao’o uma i ai auaunaga tau le soifua maloloina i taimi uma, ae maise pe a oo fo’i ia lutia soo i fa’alavelave matuia fa’anatura ma toe toso atili ai i tua le latou soifua maloloina tausia lelei.