TALA I VAIFANUA

Pago Pago - AMERIKA SAMOA

FEILOAIGA DR INGRID AHLGREN - FALEMATAAGA AMERIKA SAMOA

O lea ua mae’a fa’ailoa mai, o le asiasiga a le tamaitai Tausimeasina a le Falemata’aga o le Peabody Museum of Aheaology & Ethnology o le Iunivesite o Harvard i Cambridge, Massachusetts o le a oo ane i Amerika Samoa i le vaiaso nei.

Ua saunia sana fonotaga ma le afioga le Kovana Sili Lemanu Mauga i lona Ofisa, ona fa’asolo lea i le ofisa o le Historical Preservation, ae maise i le tatou Ofisa o le Falemata’aga i Fagatogo, ASG Archives ma le fonotaga fo’i ma le Komiti Fa’afoe o le tatou Falemata’aga i lana asiasiga lenei.

O Folasaga o lo’o malaga mai ma lenei tamaitai Tausi Measina a le Harvard University,  o lo ua tulitulimatagau nei e le to’atele, aua o lo ua ia fa’ailoa mai, “O lo ia fa’amauina mai nisi o taimi a’o pulea lava e Tuimanu’a Elisala le Manu’atele, o ni fa’amaumauga sa ia vailiilia mai le falemata’aga tele o le Smithsonian Insitution’s National Museum of National History.

O lena Falemata’aga tele o lo’o fa’amaumau ai tala’aga eseese o teritori ma Setete o le Iunaite Setete ma e naunau tele lea tamaitai Tausi Measina i suesuega mautu o tala’aga o Ta’ita’i mulimuli o Samoa ma Amerika Samoa a’o le’i amatalia pulega fa’ateritori ma kolone na suia i ai faigamalo e pulea o tatou atunuu.

I le tala’aga o a’oa’oga ma fa’anaunauga o suesuega a lenei tamaitai ua iloga ai e fiafia e sailiili i soifuaga fa’amaumau o ta’ita’i o atumotu o le Pasefika ma latou ta’itaiga ae le’i lofia latou malo i pulega mai fafo, e naunau i suesuega o le Siomaga ma latou Tu ma Aga ae maise o latou tala mai le vavau ma talitonuga sa i ai a’o le’i oo mai tu fa’apapalagi i le atuvasa.

Ua aofia i ana fa’amaumauga ma folasaga o le a fa’aalia o leo ma saunoaga sa fa’amauina mai na vaitau o le soifuaga i le vaitaimi ua fa’amauina. O se mea lea ua sili ona taua i lana fa’aaliga lenei o ata faasolo ma le toe fa’alogo a o tatou tagata i leo o tatou tua’a ua mapu mai taumafaiga uma sa latou naunau ina ia fa’atumau.

O le ulua’i folasaga a Dr. Ahlgren na mua’i fa’aalia ai ata fa’asolo o le aoauli o le aso ananafi Fale Mata’aga i Fagatogo.

O le fa’aaliga lona lua e le totogia lava se ulufale o le a faia lea i le ASCC Leture Hall i le aso Tofi, Tesema 08, 2022 i le itula e 12:30 i le aoauli.

E ui la ina tatala lenei avanoa i le mamalu lautele o le atunuu, ua fa’atulaga pea ona vala’au mo le avanoa e alaalata’i ai i nei fa’aaliga i le ofisa o le Historical Preservation i le susuga James Hamphil ina ia mafai ona fa’atulaga se avanoa pe ua tapunia fo’i avanoa mo e fia maimoa ma fa’afofoga i nei fa’aaliga o toe vaitau o ta’ita’i o le atunuu, a’o le’i toina atu latou pulega i malo fa’apapalagi ua i ai nei.

Ua fa’ailoa fo’i e ala i le fiafia o lenei tamata’i tausi measina o Ahlgren, sa soifua a’e o ia i le atumotu o Malesala ma o lona soifuaga fo’i lea ua masani ai o ia i tu ma aga fa’a-atumotu, lea ua tamau ai lona naunau e fia fa’amaopoopo mai e ia toe taimi o ta’ita’i o atumotu a’o le’i pulega fa’apapalagi faigamalo uma.

Mai se talanoaga ma le pulega o le Fale Mata’aga o le atunuu i Fagatogo, ua fa’ailoa mai ai le naunautaiga o le tama’ita’i Tausi Measina a’o le’i autova’a mai, e fia maua sona avanoa e talanoa ma fetufa’i ai ma nisi uma e so’ogafa i nei ta’ita’i o le atunuu, mo Amerika Samoa o le afioga Tuimanu’a Elisala, i lana asiasiga lenei.

O le a malaga toe fo’i i Cambridge a Ahlgren, o le va’alele Hawaiian Air i le aso Gafua, ma ua fa’aavanoa e ia le fa’aiuga o le vaiaso e afua i le aso Faraile se’ia pa’ia le aso Sa e fa’atalanoa ai ma nisi o le auaiga o Tuimanu’a Elisala, a’o le’i toe taliu.

FA’AOOPO ASO LULU MALAGA HAWAIIAN AIR

Ua fa’atulaga e le Kamupani Va’alele a le Hawaiian Airlines Aso Lulu o Vaiaso atofaina mo latou malaga fa’aopoopo i lenei masina ma le Tausaga fou.

O lo a i ai nei le va’alele o Tesema 14, 21, ma le 28, o aso Lulu uma lava e afua i le vaiaso a sau nei. Ua fa’asolo atu fo’i i le ulua’i masina o le tausaga fou, Ianuari 4, & 11, 2023.

O le masani lava lea e faia e le Hawaiian Air pe a oo i vaitau o le Kerisimasi ma le Tausaga Fou ina ia mafai ona oo mai uma tagata o lo’o fia asiasi mai i Amerika Samoa i o latou aiga ma toe fo’i i galuega i fafo. Talu mai tausaga e tele o faia pea lea masani e le Kamupani va’alele lea, aua e silafia lelei e latou pulega le agaga o tatou tagata i a latou mafutaga fa’aleaiga i nei vaitau fiafia o tausaga ta’itasi. Peita’i, e na’o tausaga lava e lua, 2020 & 2021, lea sa lutia ai le atunuu i le Covid-19 na taofia ai lea faiga, ona o le fa’asa na fa’amalosia i femalaga’iga i totonu ma malaga ese mai Amerika Samoa.

Ua fa’ailoa mai o le taimi lava e tasi lea e masani ona tautuaina ai le atunuu i le to’ai taunuu mai o lea malaga fa’apitoa ma le toe tu’uva’a ese atu, e fa’aaogaina fo’i i le malaga fa’apitoa lenei i aso Lulu ua atofaina. E tatau ona taunuu mai i le 9:30 ae tuuva’a ese atu i le itula e 11:30 i le afiafi lava e tasi.

Mo le malaga i le aso, Tesema 8, 2022 ua fa’atulaga ai se taimi fou e tatala ai le tautuaina o le pasese e malaga, lea o le a tatala ai le fa’amalama i le itula e 4:00 i le afiafi ae tapunia i le 10:00i le po.