TALA I VAIFANUA

Pago Pago - AMERIKA SAMOA

TA’ITA’I FOU 411TH ENGINEERING BATTALION - 1LT JOSHUA A. FLATLEY

O le sauniga sa fa’atasi atu i ai nisi o sui o le tatou Malo fa’apea ma nisi fa’apitoa sa malaga mai ina ia fesuiai le ta’ita’iga o le 411th Engineering Battalion Forward Support Company i le aso Sa na te’a nei, ma sa fa’atautaia i le potu fono o le US Army Reserve i Tafuna, lea ua tula’i mai ai nei 1LT Joshua A. Flatley.

Na malaga fa’apitoa mai le susuga le Brigader General Mark Siekman ma CSM Corey Thompson ona toe taliu ai lea o i la’ua. O Capt. Galo Tuiolosega, sa tauavea lea tofiga, ua malaga atu nei e galue i le USArmy & USAF i McChord Washington.

O le susuga Flatley, sa avea o ia o se totino o le Au Inisinia a le USArmy Corps of Engineers a le US Army Reserve. Na maua e ia lona tusi pasi lea mo le Komisi o Inisinia mai ana a’oa’oga sa feagai ai mai le Officer Candidate School ia Me 2018.

Na fa’au’u mai o ia mai le Iunivesite o Maryland ma lona Masters of Business Administration i le tausaga e 2019; na mua’i maua fo’i lona fa’ailoga o le Masters of Environmental Management i le 2017, ma ua mae’a umia fo’i e ia le Bachelor’s of Science in Urban and Regional Planning  mai le Frostburg State University i Frostburg Maryland i le 2007.

E ese mai ana taumafaiga ua au i tulaga o a’oa’oga fa’apitoa, e tele fo’i nisi o ona tusipasi faapitoa o nisi o tomai ua agava’a ai lea ta’ita’i talavou, ma ua umia e ia.

O nisi o ona tulaga o se ta’ita’i maoa’e lona tula’i mai ua aofia ai nisi o mea sa ia ta’ita’ia - Team/Squad Leader i le 358 EN CO; Squad Leader i le 333rd Engineering Company; Platoon Sergeant 333rd Engineering Company; Executive Officer of 333rd Engineering Company ma e aofia uma lava nei ta’ita’iga i le 365th Engineering Battalion, le 411th Engineering Company ma le 412th Technical Engineering Company.

Sa i ai se taimi na siitia ai le tautua a lenei ta’ita’i ma ia galue ai i le taumafaiga ina ia fa’atoilalo au a le fili i le Operation Enduring Freedom i Afakanisitana i le tausaga e 2013-2014.

Ua ia umia fa’ailoga taua e tele e avea ma pine fa’amau o ana tautua iloga i mea uma sa tofia ai o ia e galue mai ai i ona tofiga eseese talu mai ona avea o ia ma se tasi o Inisinia a’oa’oina a le USArmy Reserve talu mai ona ulufale i le USarmy Corps of Engineers. O fa’ailoga eseese uma ua agava’a ai, i le fa’afoega o masini mamafa ma isi ituaiga masini eseese fa’atekonolosi ua mafai ona fa’aaogaina e le USArmy i soo se latou galuega fa’atino.

I lea sauniga ina ua mae’a ona fa’ae’e ia te ia lona tofiga fou, sa i ai se avanoa na tuuina fa’apitoa ia te ia e saunoa ai i lana 411Engineering Battalion, peita’i e pu’upu’u lava lana saunoaga ae a’anoa.

“411th Engineering Battalion, ua tatou silafia le galauega e tatou te fa’atinoa, ua ia te’i tatou le malosi e fa’atino ai, ia faia le galuega i taimi uma e moomia ai, Ia manuia o tatou faiva! I le mamalu sa fa’atasi atu e molimau lenei fesuia’iga o tofiga, sa ia fa’afetaia lo latou fa’atasi mai. “Fa’afetai mo lenei taeao matagofie, fa’afetai pa’au mai!”

SOLOGA I LE ALATELE, AE LE’I OO ATU I FATU MA FUTI 

O le taeao o le aso Tofi ua te’a sa solo mai ai ni ala tetele i luga o le alatele, e latalata i Fatumafuti ae fa’aetaia e le’i i ai ni ta’avale i lea vaega o le alatele i lea lava taimi. 

Ua fa’ailoa mai o le pioga mulimuli lava lea o le alaele a le malo, ona fa’ao’o oo atu lea ia Fatu ma Futi na tupu ai lea sologa. Pe ana fetaui tonu le taimi na solo ai lenei ogaeleele e ogaoga lava fo’i se laveaga e tupu mai ai.

Na fa’ailoa mai e le sui o le Public Works, “Na vave ona fa’aleleia le alatele ina ia toe fa’aalu vave ta’avale i lea taeao, ma ua fa’afetaia fo’i le alofa o le Atua ua saogalemu tagata uma i lea aso.”

“E puupuu lava se taimi na taofia ai taavale ae se’i toe siakia pea le auvae mauga tonu sa solo mai ai nei ma’a ma la’au, ona o lo’o va’aia lava fo’i o lo’o tau matagataga mai nisi o ma’a tetele o i ai pea, ae o le mea sili, ia nofouta fo’i le mamalu fegasoloa’i, i vaitau to fa’ata’uta’u mai o matagi ma timuga, ia mata’ala lava i le fa’afoega o ta’avale pe a oo i nei nofoaga e uia ai auvae mauga,” se toe tima’i lea a le sui o le Public Works. 

Na muamua lava to’ai i le nofoaga tonu o le sologa le vaega o Leoleo o le Alatele & Fa’afoe Feoa’iga a le Matagaluega o le Puipuiga o le Saogalemu Lautele, soso’o loa ma le oo atu o le vaega a le Public Works ma kilia ai le auala mo feoa’iga.

Sa matauina e le mamalu na feoa’i i le alatele i lea taeao le umi ma le tele fo’i o le poloka na oo i ai, ae o le fa’afetai, pe tuai ae le’i i ai se tasi na a’afia le soifua i lea taeao ona o le sologa lea.

O le taimi tonu na lipotia ai lenei sologa i le vaega o Leoleo na fa’amauina o le 7:00 i le taeao o le aso Tofi na te’a. E moni e i ai nisi na to’atama’i ua tuai i a’oga ma galuega, ae ina ua va’aia le tetele o ala ua mae’a kilia ese mai le alatele, ua toe tepa i tua ma ua fa’afetaia le tulaga, e lei i ai tonu i lea vaega o le alatele i le taimi tonu o lea sologa.

TAFAIMAMAO TUA-TUPUOLA - TOTINO KOMISI ALE FEMA

Ua i ai nei se tasi o alo tamaitai o Amerika Samoa ua tofia e avea ma se tasi o totino o le Komisi a le FEMA, le tamaitai o le fa’atonu o le UCEDD i le tatou Kolisi Tuufa’atasi.

O le Komisi Faufautua lea a le FEMA, latou te fautuaina le FEMA i so’o se vala o le galuega latou te fa’atinoina, e afua mau le taupulega se’ia oo i galuega tapenapena mo fa’alavelave faafuase’i, puipuimalu o le soifua ma mea totino, e oo fo’i i le toe fa’aleleia o mea uma ua fa’aleagaina, ma le taumafaiga ina ia toe fa’atula’ia mai se vaega atoa o le atunuu sa a’afia i fa’alavelave matuia fa’anatura pe o ni mea fo’i e fa’atupu e nisi fa’atupu fa’alavelave.

Ua aofia nei Tafa’imamao Tupuola i le to’a 16 o sui fou ua tofia fa’apitoa mo le Komisi a le FEMA, ma sa fa’ato’a fa’alauiloa aloa’ia suafa o i latou nei i le vaiaso ua te’a.

“Ua ou fa’afetaia lenei avanoa ua ou maua ou te tautua ai i le FEMA, ina ua ou se’ei i le nofoa o lana Komisi Fautua. Ua ou va’ai mamao atu fo’i i ni avanoa lelei e mafai ai ona fesoasoani i le tatou atunuu, ae maise o le a’oa’oina lelei lea i ni ala e fa’atautaia ai tiute ma faiva i totonu o lenei vaega o le Malo tele. Ona o se taimi lelei lenei e mafai ai ona maua e i tatou o sui mai atumotu o le pasefika ala o fa’amanuiaga e tautua ai i latou o soifua ma ni fa’afitauli tumau tau le soifua maloloina i le tino ma le mafaufau,” o se fa’atamalaga lea a Ms Tupuola.

SUIGA O LE FA’ASA & SOLOIA AI LE TALOFAPASS

E afua ia Novema 15, 2022 o le a le toe fa’aaogaina le Talofa Pass o se tasi o mea e moomia ona faia e se tasi e mua’i faia, ao le’i ulufale mai i Amerika Samoa.

Ua fa’ailoa mai fo’i o le a le toe aiaia fo’i le fa’aalia o lou pepa tui fa’amaonia ua mae’a faia ou tui puipuia pe a e fia ulufale mai i Amerika Samoa. 

Ua fa’ailoa mai o le fonotaga a le Komiti Fa’afoe o le Covid-19 a le tatou malo, o le a talanoaina ai nei suiga tetele i le “Fa’asa sa fa’atula’ia ona o fa’ama’i pepesi mai i le atunuu ma ona aiaiga tamau,” ole a fa’amautu atili ai lea fa’ai’uga taua.

Ua aofia i lea o fa’afesili e tatau ona talia e le tagata malaga mai i Amerika Samoa o le a le toe lomia i pepa fa’atumu i luga o le va’alele poo le le’i malaga fo’i i le va’alele. Ua toe fo’i i taotu i le mea sa i ai a’o le’i lutia le lalolagi atoa e le Covid-19.

Pe afai fo’i e le’i mae’a ona talia e le tagata malaga fa’afesili o lo’o ua fa’auia atu i luga o laina feso’ota’i tafa’ilagi e fa’atumu mai, o le a le a’afia ai lau faigamalaga pe afai ua mae’a fa’amaonia lau malaga e le Kamupani va’alele poo va’a folau o le a e malaga ai.

Pau lava tulafono ua fa’amamafaina pea, o tulaga o lou pemita e te ulufale ai, tusi folau e te malaga mai ai ma lou ID ia fa’amautu i au fa’amaumauga, ona e ulufale lea ma le fiafia i le va’alele poo le va’a e te malaga mai i Amerika Samoa.

Fa’ailoa e le Faatonu o le Soifua Maloloina i le ‘au fa’aslaalau, “E ui ona o lea ua fa’amatu’u ese le TalofaPass i le taimi nei, ae o se a’oa’oga sili ua maua e le mamalu femalaga’i o le atunuu lea faiga, aua e oo lava fo’i ina toe fa’aaogaina lea ituaiga o faiga pe a toe lutia fo’i le atunuu i nisi fa’ama’i pepesi e pei ona tatou oo i ai.”