2ND ASO FONOTAGA TIMA’IGA

Pago Pago - AMERIKA SAMOA

Ua fa’ailoa atu i vaega eseese sa auai e faia folasaga ma lipoti ua mae’a tuufa’atasia e faalauiloa ai fa’alavelave fa’anatura ae maise o le aotelega o mea ua fa’amauina mai i Maugamu, mafui’e, lologa ma galulolo e ono tutupu mai e afua i le maugamu i le Manu’atele, “O galuega lavea’i e tofu sao i ai tagata uma.”

O le tupulaga talavou na tumutumu atu i le aso lona lua o le fonotaga, ua asiasi mai a latou aoga ina ia tima’ia i latou i mea e ao ina osotatau e fa’atino pe a oo ina lutia loa le atunuu i so’o se ituaiga o fa’alavelave fa’anatura.

“O outou fanau talavou, o lo’o tele lo outou malosi, e le tau fesiligia lena tulaga aua o lo’o outou talavou, ma e vave ona outou tamomo’e i nofoaga maualuluga i taimi e tutupu ai galulolo, ae ia outou mataala fo’i, e le o nofoaga maualuluga uma e saogalemu ai outou.”

“Afai ete fa’anatinati atu i le nofoaga maualuluga ae va’aia se tasi e moomia le fesoasoani, alofa i ai ma taumafai e fa’ao’o o ia i se nofoaga e fa’asaoina ai lona soifua. Ao lava le taimi e fa’atino ai se fesoasoani fa’ao’o atu lena fesoasoani.e taua le tatou galulue fa’atasi i mea uma ia fa’asaoina le ola.”

Peitai e i ai lava mea eseese ua faailoa mai, e eseese ai fa’atinoga o taumafaiga ia fa’asaoina le soifua pe a sofa’i mai e le afa ma matagi malolosi le atunuu, e fa’aosofia ai fo’i ma lologa ona o timuga mamafa e pa’u i le atunuu, ua ese mai lea mai galulolo ma mafui’e ma sologa. O le tele o ia mea, o le saogalemu e saili i le vave ona alu ese mai o le tagata mai se nofoaga o lamatia ai le soifua ona o nei fa’alavelave fa’anatura.

O vasega eseese sa fa’atinoa lea mai nofoaga eseese ina ua mae’a tatala le fonotaga i ona aso e lua. Na va’aia ai le fiafia o e uma e fia fa’alogo i se aotelega o iipoti ua mae’a tuufa’atasi mai le maugamu ma mafuie o lo’o lulu i le Manu’atele. 

O isi vaega o aoaoga ua fa’atinoa lea e le vaega a le Fire Crash a le Malaeva’alele ma sa i ai le latou fale’ie i lumafale o le Fale Laumei i Utulei mo lena fa’amoemoe.

O le Fire Crash sa latou fa’ailoa, o le tele o va’alele e tulaueleele fa’afuase’i e afua ona taumafai e tulaueleele ona ua i ai se mea ua fa’alogoina e pailate ua leaga o va’alele a’o i luga o le ea. O lena ituaiga o fa’alavelave e ono tupu mai, o le galuega patino lea mo i latou e fesoasoani atu pe a tulaueleele mai loa le va’alele. 

“E oo mai loa se avea’i fa’anatinati fa’apena, e muamua lava tapena i matou uma e galulue i o matou la’ei patino e tineia ai le afi, aua e leiloa pe tulaueleele mai lava le va’a ua amata ona mu, ma e tatau ona tineia a’o le’i a’afia nisi o le pasese ma le auva’a.”

“O le aoga fo’i o nei ofu faapitoa mo le au faigaluega a le tinei afi, ia mua’i fa’asaogalemuina le soifua o le aufaigaluega ina ia mafai ona tali atu i le mana’omia e tineia ai le afi a’o le’i a’afia nisi e to’atele ma maumau le soifua. O le vave ona fa’amaulu o le ofu fa’apitoa lenei e tagata tinei afi uma, o le mautinoa lena ua e agava’a e fa’aoo le fesoasoani i soo se taimi.”

Mai le vaega a le ASPA ua latou fa’ailoa ai le ituaiga o fa’alavelave e ono tutupu mai i le latou tautua lautele e ono afaina ai nisi e to’atele, e tolu lelei tautua lautele o lo’o feagai ma lea pulega a le Malo, Eletise, Suavai Taumafa ma le Lapisi Lafoa’i. 

Mai le eletise e mautinoa lava a motusia uaea ola o le eletise e le faigofie, aua o le a faigata ona fesoasoani atu nisi i le sui ua eletisea. E tele fo’i mea e afua i le eletise e fa’aleagaina ai le tele o mea totino ma e amata ai a’afiaga o mu tetele pe a sioti uaea eletise o se fale ma amata ai le mu. O galuega lavea’i e tatau ai ona oo atu le vaega a le Tinei Afi lea o mautu pea i le matagaluega o le Saogalemu Lautele i le taimi nei.

Mo le suavai taumafa mama, o se tasi o mea e fa’aolioli mai i le lumana’i pe afai e ono tuuina e se tasi ni vaila’au oona i le suavai taumafa e matua a’afia le lautele o le atunuu o lo’o oo atu i ai lea auaunaga pe afai e le vave silafia ma taofia ai ona toe fa’aaoga e le mamalu lautele le suavai taumafa o lo’o ta’ia atu i o latou fale ma aiga.

E tatau ona vave silafia se mea o a’afia ai le suavai taumafa, ao le’i a’afia tele le mamalu lautele o le atunuu. O le tele o fa’atanoa, e ao ina mataituina so’o se tasi e ulufale ma silafia lelei fo’i a latou mea o fai i totonu o na nofoaga ina ia le faia se soligatulafono fa’apea a’o i ai i totonu o le nofoaga o fa’atanoa o le suavai taumafa.

Mo Lapisi Lafoa’i e ono tutupu mai ai le tele o fa’ama’i, pe afai o le a fa’amama esea mai lapisi mai nofoaga o lafoa’i ai i kalone ma lapisi tetele. O se mala paga pe afai e atoa le vaiaso, lua vaiaso e le la’ua le lapisi.  E fa’atupu fa’alavelave i le soifua lautele i le tele o fa’amai ona o le a le mama le siomaga o ola ai tagata uma. 

I le vaega a le Homeland Security, ua matauina lava le latou tima’ia o fanau a’oga ina ia mataala i so’o se mea ua ala mai ai fa’afitauli, ua ese mai mala fa’anatura ae ua sofa’i mai fo’i le mala o fuala’au fa’asaina ma vaila’au o’ona ua inumia e le to’atele o tagala o le atunuu. Ua latou fa’ailoa mai le anoanoa’i o soligatulafono au mafai ona mataituina i le atunuu ua a’afia ai le mamalu lautele ae maise i tupulaga talavou. O folasaga uma e auaua’i i ai sui sa i lea itu o le tautua e fa’atino pe a fa’asolosolo atu fanau a’oga talavou mai lea a’oga ma lea a’oga sa auai i le aso lona lua o tima’iga uma i so’o se fa’alavelave fa’afuase’i e a’afia ai le soifua maloloina lelei ma le saogalemu o e uma o alaala i Amerika Samoa.

O le itu a le FEMA sa latou faapupula atili ai le tele o ituaiga fa’alavelave fa’afuase’i ua a’afia ai le atunuu, ae le fa’atuai fo’i le latou fesoasoani mai i so’o se taimi e fa’alauiloa ai e le afioga le Peresetele o tutula’i a le Malo tele, ua tatau ona fa’aoo mai le fesoasoani a le FEMA mo tagata uma ua a’afia.

O nei sui e to’alua sa malaga fa’apitoa mai i latou mo le fa’ao’o mai fo’i o le latou fesoasoani i le mamalu ma a’afia i galu maualuluga ma le malolosi lea sa a’afia ai Aunuu, Manu’atele ma Tutuila nei. Peita’i ua fa’ailoa mai fo’i o le a vave ona malaga ese atu le to’atele o i latou i le malaga lenei a le Hawaiian Air anapo, ae i ai nisi e to’afa o le a nonofo pea e fa’amae’a uma fa’amaumauga moomia mi e ua tatau i ai le fesoasoani a le FEMA mo latou mea totino ua fa’aleagaina ma o latou falenofo, fa’atasi ai ma le fa’amaumauina lea o mea uma ua fa’aleagaina i Uafu, Malaeva’alele, apitagalu ma le alatele a le Malo, ma galuega sa amata fausia ua toe fa’aleagaina, e fesoasoani mai i ai le FEMA e toe fa’aleleia.

Ina ua asiasi atu i ai fanau talavou, sa latou fa’afetaia le galuega alofa e fa’atino pea e le FEMA i le atunuu i so’o se taimi sa a’afia ai i le afa. “E le fou ia i latou le fa’alogo i le upu FEMA i totonu o matou lotoifale, aua e talanoaina e matou matua ma ta’uta’u i taimi uma. E matou te fa’alogologo ma le toto’a i nisi taimi o talanoa e le lava le fa’asoa mai a le FEMA mo le matou fale ma galuega toe fa’aleleia na moomia, ae fa’afetai sa toina mai se vaega mo le galuega toe fa’aleleia o le matou falenofo. O se tala lea mai se tasi o ali’i talavou, e sogasoga tele lona mafaufau, ma ia silafia lelei, o le agaga tonu lava lea o le FEMA, ia fesoasoani mai ae le o le mea atoa.”

Mai le vaega a le Koluse Mumu sa i ai fo’i le latou laulau e fa’alauiloa ai le latou a’ao fo’ai mai i taimi fa’aletonu o le soifuaga i Amerika Samoa. “O le foa’i lea e mautinoa lava e muamua mai lava i so’o se taimi ma fesoasoani mai i so’o se mea e tupu mai i Amerika Samoa, pe mo le aiga e to’atasi pe o le aotelega o ni aiga e to’atele, le nuu ma le itumalo ae maise o le Malo atoa.” O le tali lea a le ali’i talavou mai le a’oga a Manulele Elementary sa asia lea laulau i le taimi fo’i ua fia fa’alogo ai i se folasaga a le Koluse Mumu.

“O le auaunaga fesoasoani lenei, e le fa’atalitali, ae sau sa’o lava i le mae’a ai o le fa’alavelave na tupu, ma ua le fa’atuaoia lenei tautua pe tau faavasega na’o nisi o aiga ma tagata ua a’afia, ua fa’asalafa mo tagata uma.” O se saunoaga lea a le sui sa i ai i le laulau a le Koluse Mumu.

O le vaega a le Matagaluega o le Puipuiga o le Saogalemu Lautele sa i fafo lea i lumafale o le Lee Auditorium i le itu o i ai le matafaga le latou fale’ie mo latou folasaga. O le auau o le latou tautua, e Tautua ma Puipuia le Saogalemu o le mamalu lautele o le atunuu, ma e le fa’avasegaina fo’i le tautua, e fa’asalafa mo tagata uma e tutusa fo’i tagata uma i lea auaunaga.

O i latou nei e muamua lava vala’au e le mamalu lautele ina ia oo ane e feosoasoani i soo se mea e tula’i mai, e afua mai vevesi fa’aleaiga lava ia, se’ia oo ina fa’aletonu ma va ma tuaoi, se’ia oo i ni fa’aletonu ua va’aia ua tagofia ai e nisi vaila’au oona ma fuala’au fa’asaina, seia oo i fa’aletonu i mafutaga fa’aleaiga ma ua vevesi ae ua le mataituina le fanau o lo’o matamata mai, ma oo i taimi o fa’alavelave fa’afuase’i tuga e a’afia ma lamatia ai le soifua o tagata uma i totonu o afil’aga eseese. 

Sa i ai fou malu o le malo e latou te fa’amatala o latou tiute fai ma taumafai e fa’afilemu soo se ituaiga vevesiga i totonu o soo se fa’atasiga a nisi e to’atele poo totonu lava fo’i o aiga. O le malu puipuia o le soifua lautele, o le isi lea a latou tiute fai i aso uma, ma ua latou fa’ailoa, “E sili ona faigata ia i matou pe afai e va’aia atu se tasi ua a’afia, o nisi o matou aiga, e tuu atu i se isi e ese mai ia i matou, e nate faia se fa’aiuga ma fa’ataunuu o matou tiute i na sui. E le faigofie, ae tatau lava ona faia le mea tonu ma tusa ai ma le tulafono.”

O le lipoti fa’apitoa ua mae’a fa’amauina mai Mafui’e o loo lulu i Manu’atele, ma o fa’ailo fo’i lea o se maugamu o lo’o tau pa mai lalo ane o le motu o Ta’u e pei ona fa’ailoa mai, ua mae’a nei ona fa’amauina uma faitauga a masini ma ua iloa ai, e moni o lo’o afuafua mai se maugamu, peita’i e le’i patino se vaitau tonu e tupu ai lea fa’alavelave fa’anatura e oo mai lava.

Ua fa’ailoa mai ua le toe tele ni luluga o lo’o toe faitauina e masini fa’apitoa sa fa’atutu i le alititai o motu o Ofu, Olosega ma Ta’u fa’apea ma Tutuila nei. Ua mou malie atu lava le tele o luluga sa lutia ai le Manu’atele ma ua toe moe le toa i le fa’amoemoe atonu ua latalata mai le taimi e pa ai le maugamu. O fa’ailo nei e le o fa’atinoa e se tasi, ae o gogolo ia e lagona mai le foafoaga o mea fa’anatura e fafagu ai le tagata ia mataala.

I se taimi o le maugamu, o tusitusiga o le a mafai ona tima’ia ai le mamalu lautele, ae ua fa’aaogaina lanu ina ia mataituina mai e le vasega o e feoa’i mai le vateatea poo va’alele ma isi va’a uma e femalaga’i ia iloa patino ai poo a fa’ailo ma o latou uiga ua va’aia mai e i latou i le ea.

Lanumeamata o se fa’ailo o lo’o tutumau mea uma i le lelei, leai se afaina, lanu samasama ua tatau ona nofouta e i ai le mea ua fa’aolioli mai, e ono tupu ae le’i afaina ai se tasi.

Lanumoli ua tatau ona mataituina fa’aaliga o lo ua i ai suiga va’aia i le mea o tupu, ua amata ona a’afia ai le siomaga ma tagata nai lo le mea masani sa i ai.

Ina ua fesiliia le Matagaluega o le Puipuia o le Saogalemu Fa’alotoifale, le susuga Vinnie Atofau, mo le Polokalama fa’ataoto o Galuega Lavea’i uma a le tatou Malo i vaitau e sofa’i ai le atunuu i so’o se ituaiga o fa’alavelave fa’afuase’i, ua fa’ailoa mai, “O le tatou fuafuaga lea ua taoto ai nei o le fuafuaga lea sa tapena mai e le faigamalo ua tuana’i ia Kovana Lolo Moliga, peita’i o lo’o ua i ai fo’i ni suiga ua mae’a iloiloina lea fuafuaga tuai ma o le a tatau ona fa’aofi i le fuafuaga fou ma fa’amalosia fo’i ona fa’aaogaina pe a mae’a ona pasia ma sainia mai e le afioga le Kovana Sili Lemanu PS Mauga. E le o toe mamao la ae oo mai nei suiga taua aua o lo’o tatalia nei le va’ai toto’a i ai o le Kovana ma sainia mai pe a pasia ia te ia ma lana taupulega atoa o le Kapeneta lava lea.”

Lanu Mumu, ua tupu le mea ma ia amata loa ona matatuina le fa’alavelave ua tupu.

A’oga na va’aia o asia le fonotaga i le aso lona lua, e aofia ai Lupelele Elementary, Matafao Elementary, Samoana High, Coleman Elementary, Manulele Tausala Elementary, Laulii Elementary, Siliaga Elementary, ma Alataua II Elementary.