Nofovaavaaia le Tina talavou na maua i ai fualaau faasaina

Pago Pago - AMERIKA SAMOA

E 5 tausaga lea ua faanofovaavaaia ai e le Fa’amasinoga Maualuga se Tina talavou ina ua faamaonia tu’uaiga o lona umia faasolitulafono o vaega o le pauta faasaina o le aisa sa tu’uaia ai o ia e le malo. 

O le vaiaso na te’a nei na tula’i ai Fevaiga Tagovailoa i luma o le Fa’amasinoga Maualuga mo le tuuina atu o lana fa’asalaga. Talu mai le taimi na taofia faapagota ai o ia i le Toese i Tafuna i le po o le aso 25 o Tesema 2021, sa taofia pea o ia i le Toese i Tafuna ina ua le mafai ona ia totogi le tupe na faatulaga e le Fa’amasinoga e tatala ai o ia i tua. 

Na ulua’i tu’uaia le ua molia i le moliga mamafa o lona umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese i le faasalaga faa falepuipui e le itiiti ifo i le 5 tausaga ae le sili atu foi i le 10 tausaga, pe faasala foi i le salatupe e le silia i le $20,000.

Ae i lalo o se maliliega na sainia e le ua molia ma le itu a le malo, lea fo’i na talia e le Fa’amasinoga, na tali ioe ai le ua molia i le moliga na toe teuteu e le malo, le solitulafono o le umia faasolitulafono o vaega o le pauta faasaina o le aisa, o se solitulafono mamafa o le vaega D, lea e faasala ai se tasi i le Toese mo le umi e le sili atu i le 5 tausaga, pe faasala foi i le salatupe e le silia i le $5,000, poo le faasala foi i faasalaga uma nei e 2.

I le tali ioe ai o le ua molia i le solitulafono e pei ona ta’usala ai o ia, na ia ta’utino ai e faapea, i se taimi o le po o le aso 25 o Tesema i Amerika Samoa, na maua ai e Leoleo se paipa tioata i totonu o le taga o lona ofu sa faia o lo o i ai vaega o le pauta faasaina o le aisa, ina ua taofi e Leoleo se ta’avale sa tietie ai i le taimi o le poloka a Leoleo mo aso fiafia o le Kerisimasi ma le Tausaga fou.

Ina ua maua lona avanoa mai le Fa’amasinoga, sa ia faatoese ai e tusa o lana solitulafono ma ia taua ai lona salamo faamaoni e tusa ai o le mea sese sa ia faia. 

Na taua e Tagovailoa e faapea, i masina e 7 na taofia ai o ia i le Toese a o faatalitali ai se faaiuga o lana mataupu, sa tele ni lesona taua sa ia aoaoina mai ai, ma ua ia lagona ua aoga nei lesona e fesoasoani i lona mafaufau.

Sa ia taua lona misia o lona fanau laiti e to’atolu aemaise ai si ona Tina. Sa ia taua fo’i le fesoasoani atu o ona uso o loo taofia i le Toese i fautuaga ma timaiga e fesoasoani ai i lona olaga.

Na tautino ma loimata le ua molia i luma o le Fa’amasinoga, na te le toe solia se tulafono a le malo, na te le toe tagofia foi pe faaaoga fualaau faasaina. Sa ia talosaga i le Fa’amasinoga mo se avanoa se tasi se’i toe fo’i atu ai i lona aiga e tausi lana fanau ma mafuta atu i lona Tina. 

Na talosaga le loia fautua a le Tina talavou ua nofosala mo se faasalaga faanofovaavaaia. Na taua e le loia e faapea, o le pauta faasaina sa maua i lenei Tina i le taimi na pu’e faapagota ai o ia e Leoleo, e le o se vaega tele, ae o se vaega itiiti sa ia umia ma le faamoemoe e fa’aaogamo ia lava.

Na finau le loia fautua ina ia faanofovaavaaia Tagovailoa e aunoa ma le toe tuuina atu i ai o se isi taimi na te tulia i le Falepuipui, ae fa’aaoga le umi lea ua mae’a ona ia tuliina e fai ma ana faasalaga i lenei mataupu.

Na lagolago e le loia a le malo le talosaga a le itu tete’e. Na taua e le loia a le malo e faapea, o masina e 7 lea na taofia ai le ua molia i le Falepuipui, ua lava lea ma totoe e fai ma ana faasalaga i lenei mataupu. Ua talitonu le malo, ua matua salamo faamaoni le ua molia e tusa ai o lana solitulafono, ma ua manatu fo’i le malo, ua ia aoaoina se lesona aoga mo lona olaga talu mai le taimi sa taofia ai o ia i le Toese e faatali ai se faaiuga o lana mataupu. 

I le mae’a ai ona iloilo e le Fa’amasinoga o mau faamaonia uma o lenei mataupu e aofia ai faafinauga a Loia atoa ai ma le talosaga faatoese a le ua molia, na manatu ai le afioga i le ali’i Fa’amasino sili lagolago ia Fiti Sunia ina ia talia talosaga mo se faasalaga nofovaavaaia.

O nisi o itu lelei sa silasila i ai le Fa’amasinoga mo se faasalaga mo lenei Tina talavou, e le gata o le ulua’i taimi lenei ua aafia ai o ia i se solitulafono, ae o ia fo’i o se Tina talavou e to’a 3 nai ona alo laiti o loo faatali mai i lo latou aiga. 

Ae i le silasila a le Fa’amasinoga, e ui e laititi le vaega o le pauta faasaina sa maua ia Tagovailoa, o le faatupulaia o lenei ituaiga solitulafono i le atunu’u, ma ua aafia ai le toatele o tagata e oo lava fo’i i ulugali’i ma fanau talavou, na manatu ai le Fa’amasinoga e le o se solitulafono mama lea ua ta’usala ai le ua molia. 

Saunoa le Fa’amasinoga, o le taimi o le poloka a Leoleo mo aso fiafia i le tausaga na te’a nei na taofi ai e Leoleo le taavale sa tietie ai le ua molia. Ae ina ua saili e Leoleo le tino o le ua molia, na maua i ai le paipa tioata o loo i ai vaega o le pauta faasaina o le aisa. 

I le silasila a le Fa’amasianoga, o le Tina ua molia, o se tasi lenei o tagata o loo tele sona sao i le atina’eina o le atunu’u mo le tele o tausaga, seia oo i le taimi na tula’i mai ai le faalavelave na pue faapagota ai o ia.

Saunoa atili le Fa’amasinoga e faapea, i ni nai masina e le i mamao atu, e 13 isi foi mataupu e aafia ai fualaau faasaina na tofu atu i luma o le Fa’amasinoga. O le 7 o nei mataupu o mataupu e faatatau i le umolia faasolitulafono o vaega o fualaau faasaina, le ituaiga o le aisa.

I le silasila a le Fa’amasinoga, o le to’atele o tagata o loo molia atu i luma o le Fa’amasinoga i solitulafono e aafia ai fualaau faasaina, o i latou ia o loo aga’i atu ma faatau mai fualaau faasaina ma le faamoemoe e fa’aaoga mo latou lava. 

E pei lava o lenei Tina talavou, o nisi nei o tagata o loo lagolago malosi i le atina’eina o pisinisi tau fualaau faasaina, ma mafua ai ona naunau tagata o loo faia nei ituaiga pisinisi e aumai pea le sapalai o fualaau faasaina i le teritori. 

Saunoa Sunia e faapea, afai e leai ni tagata e faatauina le fualaau faasaina, o le a le mafai fo’i e i latou o loo tulei ina fualaau faasaina ona faatau atu a latou fualaau faasaina, ona le mafai ai fo’i lea ona ola a latou pisinisi.

E 5 tausaga na manatu le Fa’amasinoga Maualuga e faasala ai Tagovailoa i le Toese i Tafuna, peita’i ua manatu le Fa’amasinoga e faamalumalu lona tuliina o lea faasalaga faa falepuipui, ae o le a nofovaavaaia o ia mole 5 tausaga i lalo o tuutuuga e ao ona ia usita’i i ai. 

O nisi o ia tuutuuga e aofia ai lona usitai i tulafono uma a le malo, e le tatau ona ia toe tagofia le ‘ava malosi poo fualaau faasaina i totonu o le taimi o lana nofovaavaaia, o le a faia fo’i ni suega i lona tino e faamaonia ai o loo ia usitaia lea poloaiga. 

E 20 masina lea ua faatonu o ia e le Fa’amasinoga na te tuli i le Toese i Tafuna, o le a faitau ai ma masina e 7 lea e oo mai i le taimi nei ua mae’a ona ia tuliina i le Toese. O le umi o loo totoe ai o le a faamalumalu lona tuliina. 

O le vaiaso lava na te’a nei ina ua mae’a ona tuuina atu le faasalaga a Tagovailoa, na tatala ai loa o ia i tua mai le Toese i Tafuna. 

O isi tuutuuga o lana nofovaavaaia e aofia ai lona totogi o le salatupe e $2,000 i totonu o le ulua’i 12 masina o lana nofovaavaaia, ma ia auai i ni aoaoga faa faufautua e faatautaia e le Matagaluega o Auaunaga ma Tautua lautele e fesoasoani ai i le faafitauli o le tagofia o fualaau faasaina o loo aafia ai o ia. 

Na fautuaina malosi e le Fa’amasinoga le Tina ua molia, afai na te soli se tuutuuga o lana nofovaavaaia, o le a le toe i ai loa se isi avanoa o ia, ae o le a poloaina loa o ia na te tuli le 5 tausaga i le Toese i Tafuna.