TALA I VAIFANUA

Pago Pago - AMERIKA SAMOA

MOOMIA AUSIVA ATISI MA PU’E ATA MO LE MOSO’OI FEST 2022:

Ua I ai nei le vala’au fa’apitoa ona o lo’o ua i ai le mana’omia mo nisi o e fa’afiafia mo le Moso’oi Festival lea e fuafua e amata ia Oketopa 01, 2022.

O le au fa’afiafia lea o lo’o tau tuufa’atasia e Eterei Sala ma ua fa’ailoa mai ua leva ona tau tuufa’atasia mo lea fa’amoemoe lelei ua le o toe mamao fo’i ae fa’atino loa. O le siva sili ona mata’ina o tau tuufa’atasia ua fa’ailoa mai “O le Nanamu o le Moso’oi”. O lea e talia pea nisi e fia sisiva ai, aua ua mautinoa, “Afai o le tagata o lo’o i ai le talent fa’afiafia lea i lona fatua, e matua faigofie lava ona siva ma iloga lana taumafaiga i soo se taimi aua o lo’o ia te ia le naunau e siva ma fa’afiafia.”

“O lo ua moomia lava lou fa’afesoota’i mai ina ia e auai i le ausiva mo lea fa’amoemoe i lending tausaga, aua nei maumau atu lau Taleni aua o se mea e ao ina e galue atili e fa’atumau. O lo’o faia afoga siva nei i le TAOA i Tafuna i lona fale Samoa ma e fa’aauau lava ona faia nei fa’atinoga se’ia va’aia ua lava tapena sui uma mo levei fa’amoemoe ia Oketopa 01, e tatala aloa’ia ai le Moso’oi Festival.”

“O itula o nei fa’atinoga ma fa’ata’ita’iga o le 4:00 seia oo i le 6:00 i le afiafi i aso fa’atulagaina. A e va’aia loa o faia fa’afiafiaga, afe ane loa e fai sou sao mo le tatou vaiaso o le Moso’oi 2022. Ua le gata fo’i la i le au fa’afiafia ae ua talia uma fo’i ma nisi e fia ta fa’atagata, sauniez o lavalava poo la’ed Samoa Moni, o se nisi e lelei le siufofoga i pesega,o se tasi e pu’eata, ma nisi lava ituaiga o taleni poo nisi o i ai tomai i galuega alofilima fa’asamoa moni i le atunuu,” o se fa’asalalauga lenei ua fa’ailoa mai e le tamaitai o Isabella Ah Mu-Mageo.

O lo ua tuufa’atasia fo’i se ausavali fa’apitoa mo le savaliga o le Moso’oi 2022 i lenei tausaga. O lona uiga e aoga uma lava i tatou o le a auai mai mo lena faaaliga tele o Tu ma Agaifanua a Samoa.

Ua moomia nisi e fa’aalia la’ei Samoa o le a tapena fa’alelei, o oe la lea e lelei fo’i ona e fa’alauiloaina la’ei e mafai fo’i ona faia lou Sao i lena avanoa lelei. E te savali ai fo’i i lea la’ei o le a e ofuina ma fa’alauiloa lona matagofie.

Ua fa’ailoa mai ua tapena fo’i mo se fa’aaliga a tupulaga talavou e autu lea i le sailiga o se tasi e fa’amanuiaina i le Tauvaga Tausala na te faaaogaina se avanoa fa’asikolasipi e a’oga lelei ai, ma e fa’atino lena tauvaga i le aso 15 Oketopa, 2022. O lena vaega o le tauvaga tausala o loo galue mai ai Elisaia Mailo ma o ia o se tasi e ona le J & E Productions ma o le fa’atua ina ia fiafia le fanau e saili le atamai.

O lo ua fa’atautaia le polokalama fa’atino mo le Moso’oi Festival i lenei tausaga e le ABLE, poo le Agency for Better Living Endeavors, ma e mafai ona e maimoaina nei taumafaiga uma e tau tuufa’atasia e i latou i le latou Facebook Page - ABLE Facebook.

TALIA PERESITENE BIDEN FESOASOANI MO AMERIKA SAMOA

Ua fa’ailoa mai le agaga fa’afetai ma le fiafia o le tatou Sui i le Konekeresi, ina ua faliu le afioga le Peresetene o Joe Biden ma ia talia le fa’atupega a le FEMA e toe fa’aleleia ai nisi o mea ua fa’aleagaina a le Malo ma tagatanuu uma o Aunuu ma isi vaega o Amerika Samoa, ona o le maualuluga ma le malolosi o galu na lutia ai le atunuu ia Iulai 12-15, 2022.

Ua mautinoa o se tasi o nei nofoaga o le Malaeva’alele o Ofu lea sa toe faaleagaina lava ae ua mae’a tapena ma saunia lelei i le aso na muamua atu e sese’e atu ai le va’alele e tatala aloaia ai.

O le aso 15 Setema, 2022 na mafai ai ona fa’auia mai e le FEMA le fa’aiuga a Peresetene Biden mo lea fesoasoani e ao ina fa’aoo mai i le mamalu o aiga ma le Malo o Amerika Samoa ua fa’amaonia lava lo latou a’afia ogaoga i lea fa’alavelavel fa’afuase’i fa’anatura i le atunuu.

“O se tala fiafia lea ua tatou malo, ma e tatau lava ona fa’afetaia le va’ai mamao o le tatou peresetene o tula’i nei ona o le a’afiaga ua feagai nei ma le tatou Malo o Amerika Samoa fa’apea le mamalu lautele o nai aiga ma e uma sa a’afia meatotino ma falenofo ona o le maualuluga ma le malolosi o galu mai le gataifale fa’apea ma matagi na lutia ai le atunuu. Ua faaleagaina tumau nisi o falenofo o aiga i lea fa’alavelave fa’anatura, ma e fa’afetaia le agalelei o le Malo tele ae maise i lona ta’ita’i i lana tali mai,” o se tala fiafia lea a le tatou Faipule i le Konekeresi Uifa’atali Aumua.

“Ua fa’aauau lava ona va’aia toto’a i tatou uma e le Malo Tele mai le tele o tausaga, e aofia ai fo’i taimi na lutia ai le atunuu i afa tetele e i ai Gita aemaise o le a’afia ai i le Fa’ama’i o le Covid-19 ma ona fa’atupega uma ua tatou maua. Ou te fa’afetaia lava le FEMA aua e i ai taimi e lutaluta ai le mafutaga feso’ota’i, ae tumau lava le latou fa’apalepale ma toe feso’ota’i mai e galulue fa’atasi ma le tatou atunuu ae maise o le tatou faigamalo. O se mea taua tele le toe fausia lelei ia mautu o tatou talafatai ma apitagalu e taumafai ai ona tete’e atu le malolosi o sofa’i mai e galu maualuluga ma le malolosi ma taimi fo’i e tetele ai ma matautia le malolosi o matagi,” o sana toe tala mai lea e tusa o lea fa’amanuiaga ua tatou toe maua.

O le a fuafua mai e le FEMA le fa’atupega o galuega toe fa’aleleia mo aiga ma galuega mo le mamalu lautele o le atunuu a le Malo o Amerika Samoa. Ua mataituina lava foi galuega uma ina ia fa’atautaia e tusa ai o aiaiga uma o tupe foa’ia mai e le FEMA e toe fa’aleleia ai le soifuaga o le tagata i lona aiga ma lona Siomaga.

TALOSAGA VISA MO NZ - FA’ATUMU I LAINA FESOOTA’I INITENETI

Ona e toatele lava i tatou e fia ulufale i Niu Sila mo talavai a le Medicare, o lea ua fa’ailoa mai ai, afai e fia fa’atumuina sou visa e te malaga ai i Niu Sila ua mafai ona faia lea tautua i laina feso’ota’i a le Initeneti.

Ae ona ua fa’afaigata ona maua ni avanoa e fa’atumu ai talosaga nei mo visa i Niu Sila, o lea ua toe fa’alogoina ai se leo mai le mamalu lautele o le atunuu, ina ia alofagia, o lo’o feso’ota’i atu, ae le mafai ona ulufale i lea tuatusi i laina feso’ota’i a le Initeneti.

Ua fa’ailoa atu fo’i i le mamalu o e fia talosaga, aua le vave ona fiu, ae ia faia lava i taimi uma nei feso’ota’iga e i ai lava le taimi atofa e mafai ai ona matala mai mo lau pepa fa’atumu.

O le faiga fou lea o talosaga sa mafai ona fa’atautaia ai galuega i le vaitau o le Covid-19 ma sa i’u lava ina taofia tumau mai ina ua fa’amamalu mai le fa’asa a lea fo’i Malo se’i tapena mo suiga tetele o latou tautua ona o a’afiaga o le Covid-19.

Ua fa’ailoa e le malo o Niu Sila, “O lenei suiga e le faigofie mo tagata uma e fia talosaga le ulufale atu i Niu Sila, ae ua iloga mai o se faiga tumau lea o le a tautuaina ai le mamalu fegasoloa’i i le va o Niu SIla ma isi malo uma o le lalolagi.”

“Ina ia taumafai e fa’afaigofie i nisi le talosagaina o nei visa, o lea ua fa’atula’ia mai ai se pusameli ma le telefoni e mafai ona fa’afesoota’ia e le mamalu lautele o talosaga visa e ulufale ai i Niu Sila, pe afai o le a fia mautinoa atili lava o mautu lona visa na talosaga pe leai.” O se isi lea toe faamatalaga mai le Ofisa autu o visa mo Niu Sila.

Ua fa’ailoa mai e le tamaitai o lea ofisa, i le taimi nei e tusa ma le 1,300 talosaga mo visa o e nonofo i Samoa ua fa’ato’ai mai ma ua fa’aaoga ai lava lenei ala o feso’ota’iga fa’anatinati a le Initeneti.

Ua fa’ailoa mai e Ms Hogg o le Ofisa o Visa a Niu Sila, “O le faiga fou lenei ua fa’aaogaina uma lava ma e lalamua lava le tele o talosaga mai Samoa i nei talsoaga uma ua fa’amautu mai.”