TALA I VAIFANUA

Pago Pago - AMERIKA SAMOA

MANATU LE STAR KIST E FA’ATUMAU LAVA LE AUFAIGALUEGA SAILIA MAI SAMOA:

Ua faailoa mai e le Pule Sili o le Star Kist, o Inioo Ha, lea na asiasi i latou ma nisi o le latou pulega i Samoa mo le vaiaso atoa, ina ia mafai ona feutaga’i ala e mafai ai ona fa’atumau aiaiga uma e sailia mai ai latou tagata faigaluega e tusa ma le 1,000 e faigaluega i le tatou Kamupani I’a i Satala.

Na mafua lea malaga ina ia mafai ona fa’aaoga atoatoa aiaiga uma ua ofoina mai e le Matagaluega o Fefaataua’iga a Samoa fa’atasi ai ma aiaiga uma a le Matagaluega i Leipa poo tagata faigaluega, ma isi uma aiaiga e tatau ona usita’ia pe afai o le a sapalai mai pea tagata faigaluega a le Star Kist mai Samoa.

Na fa’atautaia fonotaga ma le susuga Leatiniu Wayne Fong, le misinisita o fefa’ataua’iga, Falegaosi oloa ma Leipa, Minisita o Fa’ato’aga ma Faigafaiva La’auli Leuatea Schmidt fa’apea fo’i ma susuga Leota Laki Lamositele o le Minisita o Tina, Afioaga ma Feso’ota’iga Lautele.

O lo ua fa’aauau lava ona aumaia tagata faigaluega a le Star Kist mai Samoa e fa’aaoga ai le polokalama na tapena e le faigamalo a Amerika Samoa, peita’i, ua fa’ailoa mai, o lo’o tele lava le mana’omia o lo ua iloga ona tula’i mai pea mo a latou tagata faigaluega ina ia le motusia ona fa’atutumu avanoa faigaluega i taimi uma.

Peita’i o lo ua fa’atulaga ina ia avea le Kamupani ma se pulega e talosagaina pepa nofo mau mo sui uma i Ofisa o Femalaga’iga ae o le eseesega o Niu SIla ma Ausetalia ma Amerika Samoa, ona o lea ua tuu atu le nofoaga e alaala ai le sui faigaluega i se isi o lona aiga.  Peita’i o Niu SIla ma Ausetalia e sapalai fo’i e le Kamupani nofoaga e nonofo ai ma faigaluega sui e malaga atu i fafo mo nei avanoa faigaluega.

Ua faailoa mai oi le aumalaga atu mai Amerika Samoa lea e aofia ai le Konesula o Samoa i Amerika Samoa nei Fata Brian Kaio, CPO Ti’alemasunu Mikaele Etuale, Fa’atonu o faato’aga Solia Mutini sui mamalu o le Pulega a le Star Kist Samoa. 

Na usuia le latou fono ma le Pule Sili o le Shipping Services a Samoa lea e fa’atautaia femalaga’iga a le MV Lady Naomi, ma isi uma va’a folau a Samoa, fa’apea ma le Fa’atonu ole APTC, Lagaia Easter Manila-Silipa lea e va’aia le itu o Matata Eseese o lo’o a’otauina ai fanau a Samoa i le Iunieste o Samoa.

O le masii atu o lea aumalaga taua tele mo nei fonotaga taua, ua foliga mai o se soso’oga lea o le fonotaga a le Atoa Samoa lea sa usuia mai ia Iulai 20222. O lea fonotaga ua fa’ato’a mafai ai ona ta’ita’ia mai e le Palemia o Samoa le latou au usufono mamalu masii mai ae talimalo Kovana Lemanu Mauga ma le faigamalo.

Ua fa’ailoa mai sa asia ma maimoaina e le aumalaga mai Amerika Samoa le vasega o pisinisi o lo’o fa’atautaia e le Ah Liki Group ma Frankie Investments, lea sa matauina ua mae’a oo atu atou asiasiasiga i le nofoaga o lo’o gaosia fa’apitoa mai ai le Taula Beer lea fo’i e fa’atautaia e le Ah Liki lea e gaosia mai ai le  Pia ma faguinu suamalie.

FA’AILOA MAI LE VAEGA 21 O SIAKI LAFOGA I LE ASO GAFUA NEI:

O Setema 19, Aso Gafua lenei ua fa’atulaga ai siaki lafoga totogi uma ua aofia i le Vaega #21 e mafai ona maua e le mamalu o e na faila lafoga mai ia Me 19 se’ia oo ia Iuni 28, 2022 mo lafoga na to’esea mai a latou siaki totogi o le tausaga ua te’a.

Ua fa’ailoa mai e to’a 789 i latou ua faavasega o le a maua a latou siaki lafoga, ma e fa’aalu ai e le Malo le aotelega o lafoga totogi e $2.2miliona. O le aofai o lafoga totogi mo fanau ua fa’ailoa mai e $1.5miliona ae o lafoga a tagata faigaluega ta’ito’atasi ua fa’aalu ai le $710,773.

FA’AOPOOPO AOFAI O PASESE E AUMAIA E LE MV LADY NAOMI - 80 TAGATA I LE MALAGA

O le taimi nei ua fa’ailoa mai ua siitia le aofai o le pasese sa fa’ataga atu e Amerika Samoa ona aumaia i malaga a le MV Lady Naomi i vaiaso ta’itasi mai le 60 i le 80 i le taimi nei.

E ui ina e sili mamao i lea faitauga le aofai o le pasese a le ‘MV Lady Naomi’ e mafai ona aumaia, ae o se tamau lea ua fa’atulaga ai talu mai le vaitau na lutia ai Samoa na Lua i le Covid-19. O le aofai o le pasese e mafai ona aumaia e le va’a lea e 200 ese ai ma le mamafa o le uta e mafai ona la’uina fa’atasi mai ai.

Ua fa’ailoa mai e le Fa’atonu o le DOH Motusa Tuileama Nua, “O le siitaga ua i ai nei mo le pasese e aumaia e le MV Lady Naomi ua siitia nei i le to’a 80 i le malaga e tasi o le vaiaso. Ua fa’ailoa atu fo’i i ta’ita’i o le tatou Komiti Fa’afoe o le Covid-19 ina ia fa’ailoa atu i Samoa lea tulaga fou ua i ai nei i lea tautua.”

Ua fa’ailoa mai fo’i e Nua, “Ona o lea ua le toe fa’anofoesea e le Malo nisi o pasese pe a ulufale mai ae maua ai le verusi o le Covid-19, ma ua le toe faia fo’i ni suega o le Covid-19 pe a ulufale mai nisi mai Samoa, o lea ua manatu ai le Matagaluega o le Soifua Maloloina ina ia siitia le faitauga mai le 60 i le 80 o le pasese i le malaga e tasi a le va’a lea.”

O le fa’aiuga lea na faafofogaina ose tasi o iugafono ole fonotaga a le komiti fa’afoe o le Covid-19 na usuia i le aso Lua na te’a nei.

Peita’i ua fa’ailoa mai e le sui mamalu o le Samoa Shipping Corporation, “E le taitai lava ona maua se polofiti a le va’a pe afai o le a le oo le latalata le aofai o le pasese malaga i le to’a 200 o tagata. Ona o lea ua ta’i lua ai vaiaso ma sau le malaga a le MV Lady Naomi.”

Ua matua toatele lava nisi o e malaga mai Samoa ua atugalu e malaga mai i va’alele ona o le taugata ua siitia i ai pasese, e pei o le va’a lea e fa’amoemoe i ai le to’atele mo ni latou nofoa, ae o lea fo’i la ua fa’afaigata ona o lo ua ta’i lua vaiaso ma fa’ato’a sau malaga a le MV Lady Naomi.

Ua atili nei ona faigata ona maua se avanoa e malaga mai ai se tasi mai Samoa i le Lady Naomi talu mai ona ta’i lua vaiaso ma fa’ato’a malaga mai le va’a ma ua na’o le to’a 80 fo’i le faitauga o e malaga mai ma toe fo’i atu.

AMATA ONA VA’AIA FUA O GALUEGA FA’ATINO I AUNUU:

Ua fa’ailoa mai e se tasi o sui sa lalamua i le taumafaiga ina ia fa’ailoa atu i le Malo le a’afia o Aunuu ona o lologa, matagi malolosi ma peau sousou, Peter Taliva’a, “Fa’afetai ua va’aia ua amata ona galuea’ina mai nisi o vaega o mea na a’afia o le matou nei motu e le Malo, fa’afetai le manatu mai.”

E to’a 50 sui na savalia le Maota o le malo e to’atele lava o sui o aiga i Aunuu na latou fa’ailoa fa’alaua’itele le mana’oga tupito o Aunuu, ia amana’ia i latou ma fa’atino nisi o galuega toe fa’aleleia atili ai apitagalu, le uafu ma auala ua fa’aleagaina i Aunuu ona o galumalolosi ma le maualuluga sa a’afia ai Aunuu i le masina ua te’a.

Ua fa’ailoa mai fo’i sa talo se fonotaga fa’apitoa a le to’atele o le afio’aga ma nisi o matai iloga e to’afa o Aunuu, ma le afioga I le Faipule, Vaiau Kitara, ma fa’atalanoa le mataupu ina ia le alu se solo tete’e a i latou.

“E tatau ona fa’ailoa atu i ta’ita’i o le Malo, o lea e afaina fo’i Aunuu, ma ua tatau ai ona amanaia mai e le malo se galuega toe fa’aleleia vave mo lea aotelega o tagata o lo’o nonofo mau ma soifua fo’i i Aunuu. O lona uiga e le na’o Manu’atele o loo ua i ai a’afiaga fa’anatura i o latou nofoaga, ae ua aofia ai fo’i ma aunuu.

“Ua matauina ua amata ona vetevete le Uafu i Aunuu f’apea ma le Uafu i Auasi. O lo ua fa’atama’ia lea apitagalu o itu o le motu o Aunuu lea e masani ona lutia i galu maualuluga ma le malolosi. Ua au fo’i mea fa’aleagaina i falenofo o nisi o aiga ma ua ootia ai lo latou soifua saogalemu lelei sa i ai a’o lei lutia i nei ituaiga o fa’alavelave fa’afuase’i fa’anatura.”

Ua faailoa mai fo’i e se tasi o sui iloga o le Matagaluega o Galuega Lautele a le Malo Falavai Ta’ase, “O le taimi nei ua fa’ao’o atu i Aunuu se tasi o tatou masini sua palapala ma le Loli Pusa Sasa’a ina ia amata faia galuega toe fa’aleleia o le talugalu o le apitagalu lea e masani lava ona a’afia i galu tetele ma le malolosi. Ua auina atu fo’i ma nisi o le aufaigaluega agava’a a le matou matagaluega ina ia latou fa’atautaia galuega sue’esea o le apitagalu tuai ae toe fa’aleleia atu ina ia malosi e toe fa’ataututu nisi galu maualuluga ma le malolosi.

Ua fa’ailoa mai e Ta’ase, “O le galuega e tatau ona fa’atino mo Aunuu e le la’ititi ae ese foi ina ia mafai ona toe agava’a le motu e fa’ataututu faafitauli e pei o galu maualuluga ma le malolosi, lologa ma le toe fa’aleleia atili o Uafu i mea ua va’aia ua amata ona mavetevete ma aga’i ina solofa i se taimi lata mai.”