TALA I VAIFANUA

Pago Pago - AMERIKA SAMOA

TUAI ONA PASIA LE FAUSAGA UAFU O VA’A FAILA & VA’A FAGOTA

Tali le susuga le Fa’atonu o Uafu ma Malaeva’alele, Christopher King i fa’afesili a sui o le fono faitulafono e tusa o le tuai ona va’aia le amatalia o le galuega mo le Uafu o Va’a Faila ma Va’a Fagota lea na mae’a toina e faatino e le Silva Group i le fa’ai’uga o le nofoaiga a Kovana Lolo Moliga, “E afua ona fa’atuai lea galuega ona e le’i mua’i pasia mai le ata, ma aiaiga uma e tatau ona mua’i usita’ia mo le fausaga i tulaga uma e oo i le a’afiaga ai o le Siomaga, e ua toe leaga uma le tele o mea na fa’atulaga e le Kamupani e fausia ai lea galuega.”

O se tali sa fa’ailoa lava le le fiafia i ai o sui mamalu o le fono faitulafono, peita’i, ua tali sa’o lava le Fa’atonu e tusa o lona silafia o le fa’aletonu na feagai ai ma le Silva Group lea sa matua la’u mai a latou masini tetele mai Samoa e faaaogaina lea i le fa’atinoga o lea galuega tele mo le soso’oga o le Uafu o Va’a Faila ma Va’a Fagota i Malaloa.

O se isi vaega o ni galuega ua tatalia nei ona va’ai tino i ai ta’ita’i o le Malo, o le fa’ao’o mai lea e fa’aaogaina o va’a Pailate fou e 2 e aumaia i totonu va’a o so’o se ituaiga i le Uafu Tele i Fagatogo, le Toloa ma le Tava’e, lea ua fa’ailoa mai e to’ai taunuu mai ia Oketopa 2022. 

Ua i ai nei le auva’a ma le Kapeteni e fa’afoea maia le aumaiga o va’a nei e lua mai Honolulu, ma e le o toe mamao ae tu’uva’a ese mai loa le latou malaga.

TO’ATELE TETE’E I LE ELETISE GAOSI MAI LE MATAGI 

Ua fa’atulaga ni fa’atalatalanoaga ma le mamalu lautele o le atunuu e tusa o le Eletise o lo’o ua fuafua e gaosi mai i le malosi’aga o le matagi. Ua mafua ona faia lea tulaga, ina ia toe saili lava le Tutuila Wind Energy [TWE] ina ia fa’ailoa ma saga fa’apupula atili lea gaosiga ia nofo mautinoa fo’i le atunuu i sona aoga, ma lona tulaga e le afaina ai le Siomaga pe ono lamatia ai le soifua o tagata lautele ona o lea taumafaiga e suia mai le fa’aaogaina tele o le suau’u e gaosia ai le eletise mo le atunuu.

Fa’ailoa e le TWE, e le faia lava se galuega e tasi o lenei poloketi se’ia vagana ua mae’a ona maua uma pemita ma isi tulaga mo lea poloketi i Aoloau. 

O suesuega uma tau le Si’omaga ua toe tolopoina uma lava, se’ia mae’a faia fa’atalanoaga nei ua fa’atulaga mo le mamalu lautele ae maise i latou o loo fia maua le malamalamaga i lea taumafaiga aoga ae maise i le vaitau lenei ua taugata le suau’u ma oloa tau suau’u i le lalolagi atoa.

Ua mae’a sainia se maliliega i le va o Kamupani ua fa’apa’aga mo lenei poloketi, lea ua fa’atula’ia e TWE, o kamupani mai Iapani, Nippon Koei ma Renova, ina ia latou galulue mo le 25 tausaga e fa’auia le malosi’aga fa’aeletise e gaosia mai le Malosi’aga o Matagi i le atunuu. O lea maliliega ua mae’a sainia i le va o ASPA ma le TWE, ma ua fa’atulaga fo’i e faaalu e i latou nei le $100miliona e tau fa’atatau o le aotelega o le Eletise e fa’auia e i latou i le ASPA.

LUSIA AVEOLELA COLE: FAIGALEUGA I LE  DOD

O se tasi o alo o le atunuu Lusia Aveolela Cole ua mae’a ona faigaluega fa’ata’ita’i i le Ofisa Autu o le tatou Sui i le Konekeresi i le Laumua i DC, ae o lea ua faigaluega tumau nei o ia e iloiloa Konekarate mo Galuega a le Matagaluega o le Puipuiga Lautele o le Iunaite Setete poo le USDOD.

O lenei tamaitai talavou o Aveolela, o se fiafiaga sili ia te ia o lona avanoa sa galue ai mo le Ofisa o le Faipule o Amerika Samoa i le Konekeresi, le nuu pele o lona tina o Claire Uila Cole, ua avea ai ma se ala e va’aia ai e ia le olaga fa’a-Samoa na soifua a’e ai lona tina, ma ala e tele ua ia va’aia o loo galue a’ia’i ai lona faipule i le Konekeresi e taumafai mai ai ni faatupega patino mo le Malo Fa’ateritori o Amerika Samoa.

Ua mae’a lona taimi na galue fa’ata’ita’i ai, ae ua ia fa’ailoa mai, “O le tele o se aoga mo a’u ma lo’u ola faigaluega i le lumana’i, sa ou maua mai i le va’ai ma le galue ai i totonu o le Ofisa o le Faipule o Amerika Samoa i le Konekeresi a le Malo Tele. E la’ititi le malo ae maini ana feuiuia’iga fa’apolokiki o lo’o ua feagai ai ma le latou sui filifilia.”

Na fa’au’u mai Lusia Aveolela Cole mai le Norwich University i Vermont ma sa faia lona fa’au’uga ia Aukuso 20. I lona naunau lava i le nuu o lona tina, sa saunia fa’aptoa ai lona ofu fa’au’u o se ofu fa’a-Tausala e sausaunoa ai lava o ia ina ua fa’amae’a le fa’amau fa’ailogaina o ana taumafaiga i lana sausaunoaga a’o silamio le mamalu sa aofia ma vala’aulia fa’apitoa i lona aso.

O lona laei lea sa saunia lelei e le uo pele a lona tina, sa la’ua fa’au’u fa’atasi mai i le Fa’asao High School, Pauline Gebauer White mai Las Vegas Nevada, ma Nuuuli Amerika Samoa, i lana pisinisi mo fefa’ataua’iga o la’ei Samoa o le Urban Islander Designs. O lona lea ofu siva sa gaosia lea mai le Siapo Samoa, Pulu o le Niu ma le Ietoga ma ona teuteuga masani.

I le taimi nei, ina ua maea ona faigaluega ai i le Ofisa o Uifa’atali Aumua Amata Coleman Radewagen i Washington DC, ua galue nei Lusia Aveolela e avea ma se tasi e aiaia konekarate ma filifili se sili ona agava’a e fa’atautaia galuega a le Depart of Defense a le Malo tele.

O ia o le alo e fa’asino ia Claire Uila Cole o Amerika Samoa ma e alaala tumau i latou ma ona matua i Washington DC.