TALA I VAIFANUA

Pago Pago - AMERIKA SAMOA

SOLO TETE’E - IA AMANA’IA AUNUU MA AAFIAGA O FEAGAI AI

Ua faailoa mai le agaga fa’afetai tele lava o le sui sa ia matua’ina le solo tete’e fa’aaloalo na fa’atautaia i le aso Faraile ua te’a, ina ia amana’ia a’afiaga faanatura ona o suiga o le tau o lo’o a’afia ai le motu o Aunuu. O le susuga Peter Taliva’a o lo’o alaala tumau ma lona aiga i Aunuu lea lava o lo’o faauatu i ai nei taumafaiga, ia amanaia e le malo le latou fa’amoemoe, ma galulue fa’atasi mai mo le latou fa’amoemoe taua.

Fa’ailoa mai fo’i e Taliva’a, “Ua mae’a fautuaina i matou e nisi o tama matutua ma matai o le afio’aga o Aunuu ina ia tu’u le matou taumafaiga, peita’i, ua matou agaga ina ia faliu le malo e fesaosoani mai i le oia o le motu ma ona tagata o alaala tumau ai, ona o a’afiaga faifaipea i le malolosi o galu o le sami ma ua faaleagaina lava o matou apitagalu i le taimi nei.”

Ua le gata ai i lea, ua ia fa’ailoa mai, “Ua matua tele lava vete ua iloga mai i le Uafu ma ua mautinoa e le o toe mamao ae tupu mai ai nisi fa’aletonu i va’a ma feoa’iga i le va o Aunuu ma Tutuila. Ua iloga fo’i le fa’aleagaina uma o le tele pa sa siomia ai le apitagalu ma ua oo lava ina va’aia le tele o le vaega o le eleele ua solo atu i le sami ona o le malolosi o galu ua sofa’i ai lea pa ua solofa. Ua lamatia fale nofo o aiga, ua va’aia le fa’aleagaina o mea totino a nai aiga ua a’afia.”

Ua fa’atino le faamoemoe o Aunuu e i latou na mafai ona auai, ma ua va’aia ai le fanau talavou, o matua o le fanau, o fanauiti ma ua latou fa’alealea fu’a ma saini ua fa’ailoa ai le latou naunau i se suiga. “Aunuu lives Matter - “E taua Tagata Aunuu” “911 - Fesoasoani Fa’aleleia Aunuu”, No More Delays, Aunuu Needs Help Now - Aua le Fa’atuai - Moomia e Aunuu lau Fesoasoani!”, “Moomia e Aunuu lau Fesoasoani - Pe faliu le Malo e Fesoasoani?”

O le tamaitai o Va’asa Simanu lea o lo’o tauva i le nofoa o le Sa’ole lea e se’ei ai le susuga Kitara Vaiau i le Maota o Sui, sa auai fo’i le tamaitai tauva i le palotaga i le solo tete’e fa’aaloalo i le aso Faraile na te’a nei. Fa’atasi ai ma le tele o lologa i na lava vaitau, ma ua a’afia fo’i le 

Ua fa’ailoa mai e Taliva’a, “O le to’atele o tagata Aunuu sa auai i le solo tete’e lenei, o nisi o le motu o lo’o alaala i le itu i sisifo lea e matua a’afia lava i le tele o galu maualuluga malolosi i taimi o matagi malolosi ile atunuu.”

“Ou te fa’afetaia lava e a’u ia le sapaia o le matou fa’amoemoe e le to’atele o nai o matou tagata ae maise i latou a mafai ona o mai e sapaia le matou fa’amoemoe maualuga, ia alofagia o matou fa’afitauli o feagai ai ma i matou i taimi uma e lutaluta ai le tai ma a’afia i matou i galu maualuluga ma le malolosi.”

AMATA ONA FA’ATAUTAIA  FA’AMAUMAUGA MO TALAVAI O MATA & VAAIGA

O lo ua mae’a tapenapena le Ofisa o le Medicaid a le tatou malo e fa’atautaia ma fa’amaumau uma fa’amaumauga moomia a sui e fia talosagaina le tautua poo talavai o mata ma va’aiga e talafeagai ma le tulaga malosi o latou mata o i ai. 

Ua amata fo’i ona siakia uma i latou e mafai ona faia latou talavai mata i le My Vision Eye Clinic i Amerika Samoa. O nei fa’amaumauga uma o le a mafai ona fa’ao’o ane i le Ofisa o le Medicaid i le Faletele o le ASTCA i Tafuna, lona fogafale lona lua mai le itula e 9am i le 3pm o aso faigaluega ta’itasi. Ua faailoa mai o le a amata ona lesitala le fanauiti mo le masina nei o Setema, 2022.

Mo le fanau e 17 tausaga le matutua ma fa’asolo mai i lalo e moomia latou matua poo matua fai ma ia taulimaina lava pepa fa’amaonia fa’aletulafono i nei mea uma. Pepa Fanau, Pepa fa’amaumau o Tuiga a le falema’i  ma latou ID ma o pepa fo’i nei e moomia ona lesitalaina ai i latou.

O le a mafai ona maua fa’amaoniga o fa’amaumauga nei ma lesitala mo le auai i nei talavai i le isi 72 itula o lumana’i. O le a vala’au mai ia te oe le matua sa talosaga i le telefoni sa fa’amaumau mai lau talosaga sa fa’atumu e lesitala ai. 

Pe afai e fia i ai nisi fa’afesili e tusa o lenei tautua, e mafai lava ona e fa’afesoota’ia le susuga Austine Asiata o le Benefits Division, poo le sui Fa’atonu o le Medicaid  Faiilagi Poufa-Faiai i le telefoni 699-4777 poo le emeli  [email protected].