TALA I VAIFANUA

Pago Pago - AMERIKA SAMOA

AMATA FA’AAOGA LE EYEVISION CLINIC - TALAVAI A LE MEDICAID

Ua fa’ailoa mai nei e le Polokalama a le Medicaid, ua mafai ona gasolo atu i latou e fia fa’aaoga le Kamupani Fai Mata Va’aiga a le EyeVision a le tamaitai o Laloasi Petaia Steffany, e amata ai ona siakia latou vaaiga ma fa’atulaga ai fo’i a latou mata tioata faitau tusi e moomia mo tagata matutua ia lelei le faitau tusi ma le va’aiga lautele.

Ua mae’a fa’alauiloa e le tamaitai fa’atonu o le Medicaid Office Sandra King Young lea agava’a ua mafai ona pasia mo le My Vision Eye Clinic a le tamaitai o Dr Laloasi Petaia Steffany ma ua mafai ona amatalia le tautua i le aso Lua, Setema 6, 2022.

“Ua ou fa’afetaia lou avanoa ua ou maua e mafai ai ona ou va’aia fofoga o tagata matutua o si o tatou atunuu, ma fuafua lelei fo’i a latou va’aiga e tatau ma talafeagai ma le malosi o le latou va’ai o i ai. O se auaunaga ou te fiafia e fa’ataunuu ma ua avea fo’i ma se fa’amanuiaga lea ia te a’u, ona o lea ua tatala mai le avanoa mo a’u e tautua ai le lautele o tatou matua matutua, ua i ai lea mana’omia taua tele,” o se tala lea a Dr Lalolasi Petaia Steffany.

Ua fa’ailoa mai e King Young, “O lo ua mafai nei ona fa’atino lea tautua mo tagata matutua ua fia faia ni suega i le malosi o latou va’aiga e tatau ona fa’aaoga, ma faia suesuega i ni mafuaga e ala ai ona leaga le va’ai a nisi, ma e mae’a ane e mafai fo’i ona fa’atauina ai lau va’aiga ua mae’a talafeagai ma le malosi o ou mata. Lea ua mafai ona kava nei talavai e le tatou Medicaid.”

“O i latou o le a agava’a i lenei talavai mo mata ma va’aiga fa’atulaga mai ua na’o sui ua mae’a avea Amerika Samoa ma atunuu ua nofo mau ai. O sui foi e agava’a ua fa’amauina lea na’o i latou e na soifua a’e i Amerika, poo Amerika Samoa, o e fo’i ua nonofo mau i Amerika Samoa ma nisi ua umia fo’i green card, o nisi fo’i o latou fanau e le’i atoa le 21 tausaga le matutua ua agava’a i nei penefiti.”

Ua fa’ailoa mai fo’i, “Ona o lea e fou lenei tautua i lona fa’atautaia ai i le tatou atunuu ma le polokalama a le Medicaid, o lea a fa’ato’ato’a lelei ai le fa’atautaiga o lenei polokalama, o lea o le a fa’asolosolo mai ai e le Ofisa o le Medicaid suesuega auiliili i e uma e tatau ona togafitia o latou  mata ma va’aiga, ma e amata ona fa’atulga fa’atalanoaga ma le foma’i i le aso Lua nei, Setema 06, 2022.”

O le sailiiliga lea o le a fa’atautaia nei e le Medicaid Office o le a latou tu’ufa’atasia ai se lisi e fa’atautaia aga’i i ai le talavai o mata ma vaaiga i le My Visio Eye Clinic.

O le a fa’ato’a mafai ona faasolo e le Medicaid Program le fanauiti i le amataga o Setema 2022. “O Matua uma lava o lo’o ua e lagonaina o lo’o i ai se fa’afitauli i lou alo, pe ua e lagona lava e tatau ona va’aia e lou alo le foma’i mata, ua una’ia malosi mai ina ia latou oo mai e talosagaina se fa’atupega a le Medicaid mo lea alo.”

Peita’i o fanau uma e 21 tausaga ma matutua atu e mafai ona fa’atulaga mai a latou i Setema, ma ua talosagaina atu fo’i ma matua fai uma o nisi o fanau o leaga lava latou vaaiga, ina ia amata ona lesitala a latou fanau i le lisi o fanau e 17 tusaga ma sili atu le matutua, ma i latou e i le va o le 18-21 tasuga le matutua e tatau lava ona lesitala uma lava ia Setema mo talavai amata ma le sailiga o latou va’aiga e talafeagai ma le leaga o le siakia atu ai lana va’ai.

E i ai ni si fa’asalalauga aoga o le a toe logo mai mulimuli e tusa o lea tautua.

FA’ATAUTAIA KAMUPANI BLUESKY MEA FAAPAPA - AMATAGA O LE COAST WEEK

Ua toe faia fo’i e le Kamupani a le Bluesky le latou sao i tausaga ta’itasi, ina ia latou matua’i fa’amalamalama le Malae o le Atuvasa i Utulei i mea fa’apapa felanulanua’i, e amata ai le vaiaso o le Coast Week.

O lo ua fa’atulaga lea vaiaso mai le aso 12 - 24 Setema,2022 ma o lea fo’i vaiaso e fa’aletausaga ma fa’atino lea fa’amoemoe o le Matagaluega o le Fefa’ataua’iga, ina ia fa’ataua ai le gataifale ma sosia uma o i ai.

Ua fa’ailoa mai o le tausaga lenei ua ese le polokalama fa’ataoto a le Matagaluega o Fefa’ataua’iga o le a fa’atinoa le fa’amanatuina o le gataifale ma ona sosia, o le a fa’auluulu le fa’atinoga o lea vaiaso le Coastal Zone Management a lea matagaluega.

O le tausaga lenei ua fa’amau fa’ailoga ai le atoaga o le 50 tausaga o le National Coastal Zone Management  Act CZMA ma ua i lalo o le polokalama a le Coastal Zone Management, ma o lo’o fa’atupe mai ai fo’i.

Ona o lea ua atoa ai le 50 tausaga o le CZMA, ua toe manatu ai le Bluesky e latou te toe ofo mai e fa’atautaia e i latou Fireworks i le malae mo le maimoaga a le mamalu lautele ae fa’ataua ai le Coastal Week.

Ua malamalama lelei lava fo’i le Bluesky i le tele o mea na omia ai le atunuu i le vaitau o le Fa’amai tele o le Covid-19, ma ua fiafia ai i latou e fa’aaogaina tatau le latou sao lenei i mea fa’apapa e fa’ateia ai lagona fa’agae’etia o tagata uma ina ia fa’aosofia lo latou fiafia ua sao mai le tele o fa’afitauli sa feoma’i ai lagona ma maua ai tino i gasegase fou ma le tiga.

“O le taumafaiga lenei ina ia toe fa’afo’i mai le agaga fiafia ma le fa’agae’etia o le atunuu, e toe galulue fa’atasi e fa’aleleia le siomaga, ma matau mea e tatau ona fa’aleleia mo le soifua maloloina o tagata uma ma ia soifua fiafia i le tatou siomaga. Ia tumau le fiafia ma le olioli e soifua i le siomaga.”

O le a fa’atuataia le sao lea o le Blueksy i le aso 24 Setema, 2022 i le Malae o le Suigaula o le Atuvasa i Utulei. Ua fa’ailoa mai fo’i e le pule sili o le Bluesky Justin Tuiasosopo, “Ua matua fiafia tele le Bluesky e latou te fa’atinoa lea sao mo le vaiaso o le Coastal Zone Management e fa’ailoga ai le Costal Week 2022. O le lona 50 lenei o tausaga o lea tautua, ma o se fa’afetai tele lea e ao ina auai fo’i le Bluesky e fa’amanatu ma fa’afetaia. Ua tuai mai le aso atofa mo lea fa’amoemoe, ma ua matua nofo sauni fo’i le Bluesky e faia le mea sili mo lea fa’amoemoe lelei.”

“Le mamalu lautele o Amerika Samoa, susu mai e tatou te fa’ailogaina fa’atasi lea aso fiafia ma ia utupupuina o tatou loto i mea lelei e ao ina tatou fa’atinoa mo le fa’aleleia atili o tatou Coastal Week,” o se toe tala lea a Tuiasosopo.

FA’AILOA MAI E LE AIR NEW ZEALAND - FA’ATELEINA ANA MALAGA E AFEA AI SAMOA

Ona ua leai se va’alele ale Samoa Airways e faimalaga i le va o Niu Sila ma Ausetalia ma Samoa, o lea ua fa’ailoa mai e le kamupani va’alele a le Air New Zealand o le a fa’aopoopo isi ana malaga i le va o Niu Sila ma Samoa i le taimi nei.

Ua mafua lea tulaga ona ua matauina nei e i latou le tele na’ua o lemana’omia o loo i ai mo ni va’alele e faimalaga i lea va i le taimi nei.

Ua fa’aulaga nei la le va’alele lea o le a siitia le aofai o ana malaga mai i Samoa ma toe taliu atu i le masina fou o Oketopa 2022.

Ua fa’ailoa mai e le tamaitai o lea Kamupani va’alele, “Talu mai ona tapunia femalaga’iga i le va o malo e lua ona o le covid-19, ua toe tatala mai nei femalaga’iga ua matua to’atele tagata ma pasese ua fia malaga i fafo atu o Samoa, ma nisi fo’i ua fia malaga mai fo’i i totonu o Samoa.”

“Ua tula’i mai na amata mai lava ia Aukuso 01, 2022 le tumutumu o va’alele se’ia oo mai ai lava ia Oketopa lea tumutumu.

Ua va’aia e manatu nisi e toe taliu mai i aiga e asiasi mai, ua fai si leva na punitia avanoa nei e mafai ai ona femalagai.

Ua taugata le Kesi o va’alele ma ua siitia fo’i totogi o tautua a va’alele i malaeva’alele uma lava, o le ala tonu lea o le si’itia fo’i o totogi o pasese a le Kamupani va’alele ua masani ona malaga i alava’a nei ma afea ai malo fa’aatumotu o i tatou ma Fiti.

O nisi foi mea ua a’afia ai le totogi o pasese ona o lo ua toe fa’afaigaluega mai nisi e to’atele o le aufaigaluega pe afai o le a moomia ona fa’ateleina malaga a le va’alele tele fa’avaomalo, le vasega o inisinia mo va’alele e tatau lava ona siali va’alele tetele nei a’o le’i faimalaga.