Fa’amauina sui tauva agava’a palota ia Novema 2022

Pago Pago - AMERIKA SAMOA

Ua fa’alauiloa e le Komesina o Palota i Amerika Samoa, Dr. Lealofi Uiagalelei i se tusi fa’alaua’itele e fa’atatau i le “Fa’amauina o le Agavaa o Sui Tauva” mo le Faiga-Palota Tutotonu o le 2022 ia Novema, ma na fa’alauiloa ai i le mae’a ai o le itula e 4:30 i le afiafi o Setema 01 - le Aso Tofi ua te’a.

Na fa’ailoa fo’i e Uiagalelei e fa’apea, “o sui tauva uma o le a Fa’amaonia Aloaia”- pe a mae’a le vaitaimi o le “Lu’itau o Sui Tauva” (challenge) e tusa ai ma tulafono o faiga-palota a le atunu’u.

O lo'o ta'ua i se vaega o le tulafono e mafai e so'o se tagata palota ua resitalaina ona lu'iina le aia a lea tagata e avea ai ma sui tauva mo le tofi i le palota.

O le lu'i e tatau ona faia a'o le'i o’o atu i le 4:30 i le afiafi i le aso faigaluega lona tolu talu ona tu'uina atu e le Ofisa Sili o Faiga Palota lana fa'ai'uga o sui tauva filifilia e agava'a mo le palota.

O lona uiga e tatau ona faila le lu’itau ae le’i o’o i le itula e 4:30 i le afiafi o le aso 07 o Setema i Amerika Samoa, ona e umi le tolu aso o le fa’aiuga o le vaiaso ua te’a i le teritori, lea e aofia ai le Aso Gafua o le aso malolo lea o le atunu’u i le aso ananafi.

O le aso 8 Novema e aga’i atu ai le au palota i Amerika Samoa i le palota mo le filifilia o le Faipule o Amerika Samoa i le Maota o Sui o le Konekeresi i Amerika, ae maise ma faipule mo nofoa e 20 ua filifilia mo le Maota o Sui o le Fono Faitulafono a Amerika Samoa.

I luga o le fa’aaliga a le Ofisa Sili o Faigapalota, e na’o le to’atasi le sui tauva ua mautinoa e agava’a mo le nofoa o Amerika Samoa i le Konekeresi, o le afioga i le ali’i faipule ia Uifa’atali Amata - lea o lo’o fa’aaogaina pea lona suafa ia “Aumua Amata” i le palota o lenei tausaga. 

O se tasi e ono avea ma sui tauva, le faletua o Meleagi Suitonu-Chapman, o ia lea na muai faalauiloa lona fa’amoemoe e ma sui tauva, i lenei tausaga, ae ua le faatonuina lea faamoemoe. 

Mo le Moata o Sui i le Fono Faitulafono a Amerika Samoa ua mae’a fa’amauina e le ali’i Ofisa Sili o Faiga Palota sui tauva e 38 e agava’a mo nofoa e 20 e fai ma sui o itumalo e sefulufitu.

O sui agavaa e aofia ai le to'a 19 o faipule o lo'o nofoia nofo i le taimi nei ma le to'alima o i latou e le o feagai ma ni lu'i ia Novema i le taimi o le palota.