Tolu suiga o le Fa’avae pasia Fono Lona 6 o le Fa’avae

Pago Pago - AMERIKA SAMOA

E tolu suiga fuafua mo le Fa’avae ua pasia e le Fono Lona 6 o le Fa’avae o Amerika Samoa, o lo’o tauaofia i le vaiaso lenei i le Fale Laumei i Utulei ma le fono aoao e ma’ea ia Setema 02. 

O nei suiga ma fa’aiuga sa pasia i le aso Lulu, ina ua ma’ea le fa’atalanoaina ae maise manatu fa’ailoa o sui usufono, e pei ona tofia e itumalo eseese a Amerika Samoa. 

O le mataupu muamua sa fulisia i ai le pasia e sui usufono, o le suiga o Mata’itusi faaPeretania o le Suafa o le Malo o Amerika Samoa - Suia mai le GAS (Government of American Samoa) i le ASG (American Samoa Government).

O le isi mataupu pasia i le aso Lulu, e fa’atatau lea i le Tofiga o le Faamasino Sili - O le suiga taufaaofi e suia ai le tofiga o le Faamasino Sili ma Fa’amasino sili lagolago e le Failatusi o le Initeria ae tuu atu ile Malo o Amerika Samoa e faia le tofiga.

E ui e le’i fulisia le palota i lea suiga, ae sa pasia ma fa’amaonia i le palota e 100 le ioe, ae 22 e leai. Ae le’i faia le palota sa tele manatu fa’alauiloa e sui usufono. 

Na saunoa ia Senetoa Soliai Tuipine - o se tasi o sui usufono mai Ituau - e pasia lea suiga, ae na fa’ailoa manatu tete’e mai ia Malemo Tausaga, o se tasi o sui usufono ma o ia fo’i o le Teutupe a le malo o Amerika Samoa. 

Saunoa Malemoa e fa’apea e $300,000 le alagatupe i tausaga tupe ta’itasi mai le Matagaluega o le Initeria e fa’atupe ai totogi o le Fa’amasino Sili ma fa’amasino sili lagolago. Sa ia finau e fa’apea e tolu vaega maoti o le faigamalo, ma o lenei suiga o le a aveesea ai le tutoatasi o le vaega o Fa’amasinoga. 

Ona o lea, ua ia tete’e ai i lea suiga o le Fa’avae. O isi manatu fa’aalia sa lagolagoina le saunoga a Malemo,  ae o isi sui usufono ua latou sapaia lea suiga o le Fa’avae, ma le talitonu, o lea suiga e le afaina ai le vaega o Fa’amasinoga.

O le matupu lona tolu ua ma’ea pasia, o le Suiga i le Faaleaogaina o le Vito (veto override). lenei suiga taufaaofi o le Faavae o le a faaleaogaina ai le malosiaga o le Failautusi o le Initeria e pasia ai po’o le pasia ose pili taufaaofi e teena e le Kovana ae na pasia e le Fono Faitulafono.

E fa’ailoa atu e le Samoa News, o lenei mataupu, e le o se suiga fou pe o se suiga fou, aua o nisi o tausaga palota ua te’a sa teena ai e le au palota lea suiga i le Fa’avae.