TALA I VAIFANUA

Pago Pago - AMERIKA SAMOA

FA’AOPOOPO $200 MO FOOD STAMP O SETEMA - I LATOU E AGAVAA

Ua fa’ailoa e le susuga le Fa’atonu o le DHSS, Muavaefa’atasi John Suisala, ua talia e le Matagaluega o Fa’ato’aga a le Malo Tele, le siitaga e $200 o le Food Stamp mo Setema, 2022.

“O lea siitaga ua mafua ona maua ona o tupe ua totoe nei mai le Polokalama i le tausaga atoa ma ua tatau lava ona paleni mo lenei tausaga fa’aletupe, ua alagatatau ai ona toe fa’aopoopo atu i le penefiti o lenei masina mulimuli o le 2021-2022 tausaga faaletupe.”

O le a le tu’ua ai fo’i le fa’asoa masani ona maua lava e tagata uma ua agava’a fa’alemasina ta’itasi ma ua na’o se fa’aopoopoga lava mo lenei masina e tasi, o le toe masina lea o le tausaga fa’aletulpe 2022.

O nei pepa ‘ai uma lava e tatau ona mae’a fa’aaogaina uma a’o le’i oo atu ia Setema 30, 2022.

Ona o lea fo’i ua fa’asolo atu ona tufa atu P-EPT mo fanau a’oga e lea lava matagaluega i o latou matua, o lo ua tuuina aloa’ia mai ai se fa’asologa maumaututu ina ia le fete’ena’i nei taimi o tufatufaga o pepa ‘ai a fanau a’oga ma i latou fo’i o lo’o tufatufa mai a latou Food Stamps fa’alemasina ta’itasi.

Ua fa’atulaga le tufatufaga lea e faia i le ulua’i 10 aso o le masina ona muta lea. Pe afai e misia mai aso atofa mo i latou i tufatufaga fa’alemasina, e fa’ato’a mafai ona toe gasolo mai nei sui i soo se aso lava mai ia Setema 16 seia oo ia Setema 30, 2022 e toe taua’aoina atu ai a latou pepa ‘ai. 

Fa’afesoota’i le DHSS mo le aso e tufatufaina ai nei alamanuia e amata atu ia Septema 01 -  telefoni numera 633-7720.

TAPENAPENA ‘AE O A’OGA - FA’ALELEIA FALEA’OGA GAUEGA LIPEA

Ua toe o se aga ona amatalia lea o aoga a le fanau. Peita’i o le taimi nei ua fa’atautaia fo’i galuega a le Matagaluega o le Soifua Maloloina ma ua fa’ai’u ane i le toe fa’ailoa mai le tapunia o a’oga se’ia mua’i fa’aleleia mea uma ua latou lisia e ao ina fa’atino a’o le’i a’e a’oga a le fanau.

Ua fa’ailoa e le tamaitai o Aileen Solaita o le Environmental Health Division a le Matagaluega o le Soifua Maloloina, ua i ai nisi a’oga o lo’o fa’aauau lava ona fausia falea’oga i le taimi nei. O nisi a’oga o lo’o tapena i galuega lipea o faia i falea’oga ae maise fo’i o le Polokalama o Mea’ai a le Fanau A’oga o lo’o fa’aleleia latou fale’ai ma nofoaga e Kuka mai ai Meataumafa a le fanau a’oga.

Ua fa’aauau lava pea asiasiga ma suesuega a le Matagaluega o le Soifua Maloloina i a’oga uma e fa’asolo mai sisifo o le Motu se’ia oo atu i sasa’e i a’oga uma lava.

Fa’ailoa e Solaita, ua talosaga le Polokalama o Meaai a le Fanau A’oga e tuu atu se taimi se’ia tapena ai e i latou fale’ai ma Umukuka mo le latou fo’i vaega o le tautua mo fanau a’oga, aua ua mautinoa lava fo’i e tele nisi o mea e toe fia fa’aleleia.

O lo’o malaga fa’atasi atu lava le asiasiga lea a le DOH ma le vaega a le Meniteni a le Matagaluega o A’oga a le tatou Malo, ina ia mataituina mea uma o lo’o fia fa’aleleia i fale’ai, falea’oga, umukuka, potu a’oga, ma faleuia e le fanau.

 le taimi nei e le o taofia lava le fausiaina o falea’oga uma o lo’o fa’aauau galuega i totonu o Laumua o lo’o fausia ai.

Fa’ailoa e Sekone Mafua o le DOE Maintenance Division, “O le taimi nei o lo ua tusa ma le 90% ua mae’a fausia nei o falea’oga sa fa’atautaia i le vaitau o le tu’uaga o a’oga, ma o lo’o fa’aauau pea fo’i galuega toe faaleleia lava o falea’oga, fale’ai ma faleuia o le fanau i lotoa uma ua mae’a asia ae tatau ona i ai mea e fa’aleleia.”

Setema 6, 2022 e tatala aoga a le malo. 

FA’AILOA FINAGALO KOVANA - SAUNOA MA LE AVA PE A FAAALIA O TATOU MANATU

I le tatalaga o le Fonotaga o le Faavae na saunoa ai Kovana Lemanu P. Mauga i sui usufono, “Pe a fa’aalia o tatou manatu i lenei fonotaga ma lafoga uma fo’i e fa’afofogaina e le mamalu lautele o le atunuu, e ao ina tatou saunoa ma le ava.”

“E tatau fo’i ona fa’aali tonu lou taofi ia feliuliua’i le tofa ma le  mau, ae le fa’aitiitia ai le taua o le fonotaga i le tatou malo ma le mafuaga lelei na fa’atulaia ai.”

Na toe fa’amanatu e Kovana Lemanu le taua ma le ava tele ma le fa’aaloalo o le Tualauta na mafua ai ona latou malilie fa’atasi o le a tuu le isi latou nofoa i le fono mo Manu’a i le taimi o tau soalaupule ai se i’uga lelei i lea mataupu i le vaitau au tuanai. I lona taofi sa ia fa’ailoa ai, “O le ava ma le fa’aaloalo e afua ai ona maua se autasi lelei o finagalo, e tusa ai ma le tatou aganuu.”

I le saunoaga a le tamaitai Sui Falautusi o le Initeria i mataupu fa’avaomalo, Carmen Cantor, saia fa’ailoa ai  lona agaga a’afetai ua mafai ona ia tulai i eleele o Amerika Samoa ma luma fo’i o le Fonotaga o le Iloiloga o le Fa’avae, ae maise o lona sao ua toina mai mo le tatalaga o lea fonotaga taua i le Malo Fa’ateitori o Amerika Samoa.

“Ou te mautinoa lava i le faigamalo o lo’o tula’i nei a Peresetene Biden, ua mae’a fa’atulaga e i latou mea uma ina ia fa’atautaia tutusa setete ma teritori uma lava i soo se alagamanuia ua atofa ina ia fesoasoani i ona tagatanuu ma latou faigamalo taitasi, tusa lava poo le a le tetele pe itiitima ua atofaina ai le Initeria latou te va’aia toto’a mea uma tau le soifuaga fiafia o ona tagatanuu i lona teritori o Amerika Samoa, ia alagatutusa lelei fo’i ona latou maua mea uma ua fa’asoa mai e fa’aleleia ai ona tautuaina i latou ma le latou faigamalo.”

Sa tautalagia foi e Carmen Cantor le tulaga o loo atugalu i ai le atunuu ona o luluga o le Maugamu i Ta’u, ma ua ia fa’ailoa manino mai, “Aua lava ne’i outou popole, ua mafuli mai le USGS ma le NOAA ina ia latou sailiilia auiliili fa’amaumauga e mafai ai ona iloa patino le taimi tonu e ono pa ai le maugamu ma taimi fo’i e tatau ona lava tapena i ai o tatou tagata ma le malo ini fa’alavelave fa’anatura e tupu mai.”

O le tolaulauina o le fa’asalalauga fa’alaua’itele e tatau ai ona tauaofia le fonotaga o le Fa’avae na tolaulauina lea e le susuga le fa’atonu Tapa’au Dr Daniel Aga i le gagana Peretania. Ina ua mae’a lea sa ia fa’alauiloa fo’i o le mea e soso’o ai o le tolaulauina lea o tulafono fa’ataoto mo le fonotaga o le fa’avae i ona sui totino tofia uma ina ia usita’ia a’o fa’agasolo iloiloga ma tauaofiaga o le Fonotaga o le Fa’avae.

O le afioga le Ma’opu Soliai Tuipine sa fa’auilavea loa ae  ua ia fa’ailoa, e tatau ona mua’i fa’atauto loa lava sui usufono uma o le fonotaga toe Iloilo o le Fa’avae.

Na tula’i fo’i le afioga le Matua Senatoa Togiola Tulafono, ma ia fa’ailoa atu, “Ua tonu nei manatu uma e lua, ae ua alagatatau ona tuuina muamua fo’i se avanoa mo sui mamalu sa pa’au atu mo le tatalaga o le fono Toe Iloilo le Fa’avae, ma e tatau lava ona tula’i muamua le afioga le Kovana Sili Lemanu Mauga ma le sui mai le Pulega o le Initeria e tu’ua le fonotaga fa’ato’a faliu ai le usugafono mo a latou mataupu fa’apitoa mo le ulua’i aso o latou iloiloga.”

Ina ua mae’a nei saunoaga matagofie sa fa’atautaia loa le Ava o feiloa’iga ina ia tapa ipu malo fa’aaloalogia faapea ma le au usufono mamalu i lea taeao fesilasilafa’i. Na tolopo fo’i le fa’atautoina o sui usufono.

O le Peresetene o le Maota Maualuga Tuaolo Fruean ua avea ma ta’ita’i fono, sui ta’ita’i fono Faiivae Iuli Godinet , ma le o le failautusi o Ti’alemasunu Dr. Mikaele Etuale.