SOLOIA NISI O AIAIGA NA FA’AMALOSIA MO LE FA’ASA O LE COVID-19

Pago Pago - AMERIKA SAMOA

Ua fa’ailoa e le kovana sili nisi o aiaiga sa fa’amamalu mo le Fa’asa o le Covid-19, ae maise lava i le va o tagata faigaluega a le Malo ma latou fo’i galuega sa galulue ai.

O le aiaiga sa tamau mai ina ia le toe faigaluega se tasi e le’i faia o latou tui puipuia o le Covid-19, ua toe soloia nei, ma ua mafai lava ona toe faigaluega i latou e le’i faia ni tui puipuia o le Covid-19.

Peia’i i le taimi nei, mo so’o se tasi lava e fia ulufale e faigaluega i se galuega a le Malo, e le talia lau talosaga pe afai o le a le fa’aalia lou pepa tui o ou tui puipuia o le Covid-19.

O le aiaiga lea a le Malo sa fa’amalosia, o se tasi lea o mea o lo’o fa’asagasaga i ai solo tete’e sa fa’atautaia a nisi o le atunuu, ona ua le o gatusa ma aia tatau a nisi o le Malo.

Ua fa’amalosia lava fo’i le fa’aalia o le pepa tui ua mae’a fa’atulaga e ao ina taua’aoina i taimi uma e lesitala ai fanau a’oga, e pei fo’i ona mataituina isi tui puipuia uma mo le fanauiti e a’e i le a’oga mo lenei vaitau.

O nisi o mea ua fa’atulaga mai e fa’amalosia i lenei vaitau i le Fa’asa mo le Covid-19:

● E tatau ona fa’aaogaina e le sui ua maua i le Covid-19 le pupuni fofoga mo le 10 aso, ae lima aso mo so’o se tasi lava e fetaia’i pe ola fa’atasi ma lea sui ua maua i le Covid-19.

● E tatau ona fa’aaoga le Pupuni fofoga e i latou uma o lo’o tale pe flu ina ia le pesia nisi i le ma’i ua e maua ai pe a’afia foi i se verusi o lo’o ua e a’afia ai.

● O lo’o fa’atulaga lava le pepa tui puipuia o le Covid-19 lea e mafai ai ona e toe ulufale mai i Amerika Samoa.

● O lo’o tumau ona fa’ae’e atu i le aufaigaluega a le DOH e faia le fa’ai’uga ia te oe poo le a le ituaiga togafitiga poo le fa’anofoesea e puipuia ai oe mai le to’atele o le mamalu lautele o le atunuu pe afai ua fa’amaonia ua e maua i le Covid-19, ae le o toe lesitalaina i le TalofaPass.

Mo i latou e malaga mai i totonu o Amerika Samoa:

● E tatau ona e lesitala mai i le TalofaPass , poo fea lava e sau mai ai

● E tatau ona fa’ailoa i le malaeva’alele lau pepa tui o ou tui puipuia ua ma’ea faia pe afai ua silia ou tausaga mai le 5 tausaga.

● E tatau ona fa’aulu mai lau talosaga e te fia malaga i le tusa ma le 10 aso a’o le’i malaga mai i Amerika Samoa.

● O so’o se tagata lava e malaga mai Samoa poo Hawaii e tatau ona mua’i fa’aalia se suega o le Covid-19 ua mae’a faia ae le o maua i le Covid-19, ae ia fa’aulu mai i le TalofaPass muamua lava, e le’i pasia le 72 itula fa’ato’a malaga mai ai.

I lea lava fa’alauiloaga o aiaiga o le Covid -19 e ao ina usita’ia, ua fa’ailoa e Kovana Lemanu Mauga, “O le lipoti mai le Matagaluega o le  Soifua Maloloina ua i ai nei le aotelega o e ua a’afia i le na’o le 2%.”

Ua ia toe fa’amanatu mai fo’i i le mamalu o le atunuu, “E ui lava ina ua to’aititi i latou ua a’afia i le Covid-19 i le taimi nei, ae aua ne’i se’etia ai i tatou aua o lo’o i ai lava le verusi fa’atasi ma i tatou i o tatou laufanua. Ia usita’ia pea nei aiaiga o le fa’asa, ina ia soloia a’ia’i le Covid-19 mai o tatou tagata.”

Ua fa’atauanau mai pea le afioga le Kovana i le mamalu lautele o le atunuu ina ia fa’aauau pea ona fa’aaogaina a tatou pupuni fofoga ia mautu ai lou silafia lelei o lo’o e maloloina mai lea fa’ama’i pipisi ma le fita. Ia fa’aauau foi ona fa’amamaina o tatou lima ma ia fa’amama fo’i nofoaga e mafuta ai o tatou aiga.