Mafai ona faailoa patino e Saeanisi le mafuaaga o mafui’e I le Manu’atele

Pago Pago - AMERIKA SAMOA

Ua mae’a le vaiaso atoa o le aumalaga a le NOAA – le Ofisa Vaai Tau ma le Aumalaga a Saeanisi o le USGS mo Maugamu ma Mafui’e i le Manuatele ma ua maua foi a latou faamaumauga amata mai a latou masini o fuaina luluga mafui’e ae maise o fa’amaumauga e maua ai ni tali maumaututu o le vaitaimi tonu e lutia ai i tatou i se mafui’e i Manu’a.

Ua fa’ailoa mai nei e Dr Natalia Deligne lana lipoti ua ia fa’apea mai, ”O luluga ua fa’alogoina nei e le to’atele i Ofu ma Olosega, e le o se fa’ali’ali’a mo se Maugamu e pa i Ofu ma Olosega, ae ua latou lagonaina fa’ali’ali’a o le maugamu e ono pa i Ta’u.”

O le taimi nei la ua to’esea nei le fa’ailo lanu samasama sa i ai mo le Luanuu a Ofu ma Olosega ma ua toe suia nei i le lanu Meamata, o se lanu ua fa’atulaga e le o toe i ai se afaina o fa’aolioli mai. Peita’i o le Faleta’u lea ua tumau pea lava i le lanu samasama e fa’ailo ai o i latou lea o lo’o fa’aolioli mai i ai se fa’afitauli i se maugamu e ono pa ma a’afia ai.

Peita’i ua toe fa’ailoa mai fo’i e le vasega o Saeanisi suesue a le USGS, “Ona o le tulaga vavalalata o Ofu ma Olosega i Ta’u, Fitiuta ma Faleasao, e ono a’afia uma lava i latou mai le maugamu.  Aua o fa’alavelave fa’anatura uma lava e ono a’afia fa’atasi uma ai le atumotu o Amerika Samoa pe a oo ina pa le maugamu o Ta’u.

“O fa’alavelave fa’anatura e ono a’afia fa’atasi uma ai atumotu e aofia ai, tauasuasu mafiafia, kasa o’ona e mapuna fa’atasi mai ma le tauasuasu, mafui’e lulu malolosi e ono lamatia ai falenofo ma sologa tetele i atumauga, o le galuafi mai le lava e sosolo mai i le laueleele, ae maise foi o galulolo e mafua mai i maugamu ua pa, e le faigofie uma lava nei mea uma pe a oo ina a’afia ai le atumotu atoa o le tatou teritori.”

Ona o lea ua iloga nei o le maugamu o Ta’u lea e afua ai nei luluga uma o mafui’e i le Manu’atele, ua toe talosagaina nei fo’i isi meafaigaluega malolosi atu ina ia auina mai fafo mo suesuega uma lava a le USGS ma e to’ai taunuu mai i le teritori i lenei vaiaso ua amatalia.

I le taimi nei ua mae’a fa’atulaga o ni masini se ono (micro seismometers) e fuaina le malosi ma tuufa’atasia mai ni fa’amaumauga aoga mo le taumafaiga e fa’ailo se vaitaimi tonu o le a pa ai le maugamu ina ia fua i ai le tele o galuega lavea’i ua taumafai nei a le Malo mo tagata uma o loo alaala tumaui le Manu’atele.

O masini lona tolu lea ua tatalia nei mo le Manu’atele ua fa’ailoa mai o le a fa’atulaga i le itu i sasa’e o le motu o Ta’u, ae ya mae’a fa’atulaga masini nei i Tutuila, Ofu, Olosega ma Ta’u fo’i.

Pe afai o lo’o moomia lava ona maua pea ni fa’amatalaga e tusa o suesuega nei mo le silafia e le mamalu lautele ua mafai ona e maua lea i le sootaga tafailagi (https://volcanoes.usgs.gov/vns2/) ma o’omi le Ta’u Island i lau masini e maua uma ai fa’amaumauga o nei suesuega i aso ta’itasi.

Ua mae’a fo’i ona feiloa’i alii ma tamaitai saeanisi na malaga mai fa’apea ma sui o le tatou Ofisa o le Va’ai Tau i Tafuna ma le mamalu o le atunuu o lo’o alaala tumau i Ofu ma Olosega. Ua taumafai foi i latou nei na malaga atu i le Manu’atele e talia fa’afesili ma atugaluga o le mamalu lautele na fia malamalama ma iloa lelei se taunu’uga o nei luluga o lo’o latou fa’alogoina lava i le tele o taimi.

Na faia lea fonotaga taua a le afioga le Sui Koavana Talauega Eleasalo Ale ma le aumalaga o saeanisi ma le aufaigaluega a le Ofisa o Va’ai tau, ma le mamalu lautele o Ofu ma Olosega i le EOB i Ofu i le aso Tofi na te’a nei. O fa’afesili sa matele lava i so latou saogalemu pe a oo ina pa le maugamu, poo le a fo’i se tele o le fa’aletonu o le a latou taga’i mamao atu i ai ina ia vave fo’i ona faia gaoioiga e malutia ai.

Tulaga o a’oga a le fanau pe a’e pe tolopoina poo le a se isi lava mafuaga e le o latou iloa, ua atili ai ona fa’atetele le luluga o mafui’e i le Manu’atele?

O le tali mai le susuga le Sui Kovana, ua fa’ailoa ai, “E a’e lava le a’oga a le fanau ia Setema 06, 2022 i Ofu ma Olosega. O lo ua mae’a tapena e le Malo ala i nofoaga e saogalemu ai tagata uma i le taimi nei, i eleele maualuluga o latou motu.

I le taimi nei ua tapena lava le malo i taumafaiga e lavea’ia tagata mai le Tsunami poo se maugamu ua pa. Ma ua fa’agaoioia uma nei taumafaiga e le Malo, aua galuega lavea’i a’o lava le taimi e tapena ai.

Ua fa’ato’ato’a fo’i le to’atele ina ua fa’ailoa mai e le vasega o saeanisi suesue, “O luluga nei ua fa’alogoina i le Manu’atele atoa, e afua mai le maugamu o Ta’u, ae le o Olosega ma Ofu.”

Ua nofo sauni fo’i faia’oga ma le fanau a’oga, aua o nisi sa malaga mai i Tutuila nei ina ua amata luluga o le mafui’e, ina ia a’e a’oga e pei ona fa’ailoa atu e le tatou Sui Kovana Talauega Eleasalo Ale.

O se mea lelei aua o lea ua fa’ailoa mai, e talu mai le aso Tofi ua te’a, ua va’aia le tele o faitauga o lo ua fa’ailoa mai i luga o feso’ota’iga tafa’ilagi ua mafai ona fa’auia mai e le Masini o lo ua mae’a fa’atuina i Ofu ma Olosega e le aumalaga lea sa fono ma le mamalu lautele o e o alaala i le Manu’atele.