TALA I VAIFANUA

Pago Pago - AMERIKA SAMOA

TOINA MAI VAEGA TUPE $394,521 - TAUTUA MO E NOFOSALA I LE TO’ESE I LE TERITORI:

O le aso Faraile na fa’ailoa mai ai fo’I le agaga fa’afetai tele o le tamaitai Faipule i le Konekeresi, ona o le sogasoga ma le mata’alia o le pulega ma le aufaigaluega a le Ofisa o le CJPA, ina ua gafatia fo’i ona toina mai le latou fa’atupega mo a latou polokalama fa’atino e fa’atutu mo e o nofosala pe tuli fa’asalaga i le To’ese i Tafuna.

O le aofai e $394,521. lea ua fa’amatu’u sa’o mai e le Matagaluega o Fa’amasinoga a le Malo tele USDOJ, mo le ofisa o e nofosala ona o soligatulafono i le atunuu.

Ua fa’afetaia e le tamaitai faipule i le Konekeresi ia le Fa’atonu o Marianna Timu Faiai ma le aufaigaluega mamalu aua o lo ua maua fo’i lea vaega tupe mo tautua eseese mo i latou ua nofosala ona o soligatulafono.

“O le fa’atupega lenei e tatau ona fa’aaoga tatau lava i taumafaiga ina ia toe fa’afo’i mai se si mai lona tulaga solitulafono sa nofosala ai ma toe fa’afo’i i totonu o lona aiga, e aunoa ma se fa’aletonu fa’alemafaufau ma isi tulaga uma e a’afia ai a’o nofosala o ia i le Toese.”

Ua aoga tonu fo’i lenei fa’atupega ina ia toina mai nisi o fa’alapotopotoga e tuusa’o a latou tautua ina ia fa’aleleia atili le mafaufau ma le tino o e uma o lo’o nofosala, ina ia toe fia fo’i mai e nofo i lona aiga ma toe tausi lona aiga pe a mae’a le taimi na fa’atulaga e nofosala ai.

TOAI TAUNUU MAI LE SUI FAILAUTUSI O LE INITERIA - TALIMALO AMERIKA SAMOA:

Ua mae’a fa’ato’ai mai le faigamalaga a le Sui Failautusi o le Initeria, o Carmen Cantor, i lo tatou nei teritori ma ua mae’a fa’atulaga fo’i ni fonotaga taua tele o le a latou faia ma ta’ita’i o le tatou Malo fa’apea foi ma sui mamalu o le Fono Faitulafono a’o i ai i o tatou eleele lea sui mamalu o le Matagaluega o le Initeria lea e va’ava’aia sa’o mai Amerika Samoa.

Ua fa’ailoa mai o lo ua i ai le avanoa mo ia e auai ai i le tatalaga o le Fonotaga o le Fa’avae o le tatou malo, lea e amatalia ma ua mae’a fa’atulaga a latou fonotaga ma Kovana Lemanu ma le Lutena Kovana Talauega Eleasalo Ale, fa’atulaga fo’i le fonotaga ma le Fono Faitulafono ae maise o le Vasega o Fa’amasinoga.

O lo ua malaga fa’atasi mai i la’ua ma le Fa’atonu o Aiaiga o Maliliega a le Initeria ma le tatou teritori, Basil Ottley, lea o le a auai lava i le fonotaga atoa o le fa’avae i lenei tausaga. 

O Cantor o le a avea ma sui e saunoa fa’apitoa i le tatalaga o le fonotaga lenei ma ua fa’atulaga fo’i le asiasiga a lenei sui iloga i le Kamupani a le Star Kist Samoa.

O Cantor sa avea ma Emepasa o Amerika ile Federated States o Micronesia poo le FSM. Ua tele fo’i avanoa sa galue ai lenei tamaitai o fa’atonu i nisi o Ofisa iloga o le Malo tele ma ua tele sona taimi sa nofo mau ai o ia i Atumotu a’o ia tautua i na tofiga mo le FSM ma sa soifua a’e o ia i Puerto Rico.

Sa mua’i maua lona fa’ailoga BA mai le Iunivesite o Puerto Rico ma lona MA sa maua lea ina ua mae’a ana a’oa’oga i le Inter American  University of Puerto Rico. O le a fa’ato’a toe tu’ua e ia le teritori i le va’alele o le aso Gafua nei.

FA’AVAELOTO TAGAVAI A LE MALO TELE & AMERIKA SAMOA - TUUA LE MALO LEALAO MELILA PURCELL:

O lo ua matauina le sisia fa’avaeloto o tagavai a le Malo Tele ma le Malo o Amerika Samoa e taualoa ai le auaunaga ma tautua sa galue punoua’i ai a’o soifua ma galue i le tatou Malo, le afio’aga ma le pa’ia o Aiga. Ua fa’atulaga lea fa’avaeloto o tagavai a malo e lua e amata mai le 6:00am se’ia oo i le 5:00pm, e taualoa ai le tautua a Lealao Soloatoa Melila Purcell Jr.

Ua tu’ua nei le malo e lea tama a le malo o Amerika Samoa i le atoaga o lona 70 tausaga o le soifuaga.

I le saunoaga fa’apitoa a le afioga le Kovana Sili Lemanu PS Mauga e tusa o le soifua galue faatasi ma i latou sa ia fa’ailoa ai, “O Lealao e matua alofa lava i ona tagata ma e taua tele ia te ia lona Malo.”

“E le gata i le tautua a le tofa Lealao Melila i le Malo tele e ala i le vaega au lea na atoa lelei le 20 tausaga, na auai fo’i i le autau na masi’i mo le Taua i le Faga Ina ua taliu mai i fanua ma ua toe fa’aauau lana auaunaga i le Malo o Amerika Samoa ma sa i’u lava ina avea ma Fa’atonu o le Matagaluega o Fa’ato’aga mai le 2012 - 2016.

E ese mai lea sa avea fo’i sona taimi tele o tautua ai i le Pulega a le Star Kist Samoa lea sa matua feso’ota’i ai lava ma le to’atele o le mamalu lautele o tatou tagatanuu.

Na auai o ia o se totino o le American Samoa National Olympic Committee ma o se tasi na ia matua galue e amatalia le Samoa Bowl lea e ta’a’alo fa’atauva ai tatou fanau i le liki ma fanau a Samoa i Hawaii ma Kalefonia i le fa’agatama o le American Football.

Sa talosagaina fo’i e lana afioga le Kovana Sili sina taimi e fa’aavanoa e talosia ma fa’afetaia ai le Atua ona o se meaalofa sili ona taua sa fa’aaogaina lelei e le tatou Malo ma le Malo tele, o se tama fanau a le tatou Malo, ua fa’ia mai nei i le fuifui, le tofa Lealao Soloatoa Melila Purcell. “O se meaalofa aoga ma ua fa’afetaia ai pea lava le agalelei ma le foa’i mai a le Atua ia Amerika Samoa ma le pa’ia o ona aiga. O ia o se tasi o ta’ita’i lelei o le tatou malo.”