Fa’amaonia Ofisa o Palota, palotaga o le 2022 mo Novema aso 8

Pago Pago - AMERIKA SAMOA

I se fa’aaliga fa’alauaitele ia Aukuso 16, ma ina ia talafeagai ai ma tulafono, ua fa’alauiloa aloaia ai e le Komesina o Palota ia Dr. Lealofi Uiagalelei e fa’apea o le palotaga i Amerika Samoa mo le 2022 e faia lea ia Novema, 08, 2022 mai le itula e 6 i le taeao e o’o atu i le itula e 6 i le afiafi, i fale palota fa’atulagaina i itumalo eseese i Amerika Samoa.

E pei ona i ai i tausaga palota ua fano, o le lisi o fale palota fa’atulaga e le Ofisa o Palota, e fa’alauiloa ae le’i o’o i le aso o le palota. O le tele o fale palota o “hall” a ekalesia po’o faletalimalo a aiga. 

Ua fa’alauiloa foi e Uiagalelei e fa’apea, i le aso o le palota o le a palotaina ai mataupu nei:

• faipule o Amerika Samoa i le Konekeresi a Amerika mo le nofoaiga amata mai ia Ianuari 03, 2023 e oo atu ia Ianuari 03, 2025;

• nofoa uma o faipule o le Fono Faitulafono a Amerika Samoa a le Maota o Sui, mo le nofoaiga amata mai ia Ianuari 03, 2023 e oo atu ia Ianuari 03, 2025;

• suiga o le Fa’avae Toe Teuteuina o Amerika Samoa ia talafeagai ai ma tulafono. 

Mo suiga o le fa’avae, o nei mataupu e talanoaina ma iloiloina i le Fono Aoao o le Fa’avae, lea ua ma’ea ona valaauina e le kovana sili, e tauaofia ia Aukuso 29 e oo atu ia Setema 02, 2022 i le Fale Laumei i Utulei. 

O suiga uma e pasia ma fa’amonia i le Fono Aoao, o le a tuuina atu loa i le au palota e palota i ai ia Novema. 

E fa’amanatu ai e le Ofisa o Palota ia i latou uma lava o lo’ fia tauva o tofiga i lenei tausaga palota, e tatau ona faila pepa i le Ofisa o Palota ae le’i tapunia galuega ia Setema 01, 2022. 

Mo le Maota O Sui o le Fono Faitulafono a Amerika Samoa, e 20 faipule e palotaina e itumalo eseese i le teritori. Ae o le sui faipule lona 21, o le sui lea mo Swains Islands, e filifilia e tagata nu’u o Swains Island, i se fonotaga e valaauina e le Ofisa o Palota i se taimi o i luma. 

Ua fa’amanatu mai fo’i e le Ofisa o Palota e fa’apea o lo’o fa’auau lava ona talia lesitala mo i latou e agava’a e palota i Amerika Samoa. Mo se fesili fa’afesoota’i le Ofisa o Palota i le telefoni 699-3570.