TALA I VAIFANUA

Pago Pago - AMERIKA SAMOA

TALI MINISITA FEOA’IGA A SAMOA - ATUGALUGA TAUGATA O PASESE

Ina ua lagoon le fa’asea a fa’ailo e le susuga le Faipule o le Manu’atele ona o le taugata o pasese o feoa’i ai latou tagata i va’alele mo le Manu’atele, sa mua’i fa’amaulalo le susuga le Minisita o Feoa’iga ia Alumamalu Ale Filoiali’i ona o lea tulaga. Ma sa ia fa’ailoa le mafuaga o lea tulaga, ma ua le mafai ai ona ‘alofia le siitaga ua i ai nei le totogi mo feoa’iga i le ea ua i ai nei.

O le susuga le Minisita Leatinuu Wayne Sooialo lea e nafa ma le fa’atautaiga o le Samoa Airways, o le sui tonu fo’i lea e tatau ona tali sa’o mai i atugaluga ua fa’alogoina, ae maise o le siitaga o pasese mo le feoa’iga i le ea a le atunuu e ala i va’alele a le Samoa Airways. 

Ua ia fa’ailoa, “Ona o le maualuluga o le tau o nisi o vaega o le tautua, e mafai ai ona fa’aauau le auaunaga e ala i femalaga’iga i le ea mo le Manu’atele, ua tuufa’atasia ma ua afua ai ona siitia le pasese i le mea ua i ai nei. Ua le ma’alofia ona totogia nei mea uma, ma afai ae le totogia, o le a le mafai ona fa’aauau ona tautuaina le tatou vainuu lea e le tatou va’alele.”

“O mea nei e aofia ai le tau o le kesi mo va’alele, totogi o le aufaigaluega, totogi o le lisi o le ofisa va’alele i Tafuna, le totogi fo’i o le tulaueleele i Tafuna ma isi malaeva’alele i le Manu’atele ma le totogi o le tu’uva’a ese atu mo so’o se faigamalaga i le va ma le Manu’atele,” o se toe fa’aopoopo mai lea a le Minista.

“Ou te manatu, ua le tu’utasi lea fa’afitauli na’o le tatou Kamupani Va’alele, ae ua fa’asalafa mo Kamupani Va’alele uma i le Lalolagi, aua ua taugata uma lava feoa’iga i le ea i so’o se va o atunuu eseese uma, i le lalolagi atoa.” 

SOSO’O LE ISI 5 TAUSAGA E AVEA TUIMALEALIIFANO MA “AO MAMALU O SAMOA”

Ua fa’ailoa mai le agaga fiafia o aiga i Amerika Samoa nei, ona o lo ua toe fa’ae’e le isi lima tausaga e avea ai pea le afioga le Tamaaiga Tuimalealiifano V. Sualauvi ll ma “Ao Mamalu o Samoa.”

Ona o lea tofiga sa iloiloina e le Palemene a’o i ai lana afioga le Tamaaiga ma le Faletua i Amerika Samoa nei, o lea sa agaga tele ai aiga ma talosia se fa’ai’uga lelei e maua mai e lo latou fa’atama, aua o se tasi e agamalu ma tausiaiga lelei lava o ia mo i latou uma i lenei itu o le aiga.

Peita’i ina ua fa’ailoa mai le fa’aiuga ua i ai le iloiloga a le Palemene o Samoa, sa latou fa’afetaia lava le Atua ona ua toe pale le latou fa’atama o aiga, i lea tofi maualuga o le Malo Tuto’atasi o Samoa.

O lea fo’i la ua toe soloia uma ai olo o masalosaloga sa fa’alele e nisi e to’atele, “E suia nei ele faigamalo a le FAST se isi Ao Mamalu o le Malo o Samoa, ina ia avea o se tasi ua latou tofia fa’apitoa i le latou ulua’i nofoa’iga.”

O lea i’uga a le Palemene sa tomua lava i ai galuega a le Palemene i lana tauaofiaga na soso’o ai ma le aso ua mae’a faia ai le filifiliga lea. Ma o le tusi mai le afioga le Palemia Fiame Naomi Mata’afa ua fa’ailoa mai ai i le Fofoga Fetalai o le Palemene, o lo ua filifilia nei Tuimalealiifano e le latou vaega fa’aupufai a le FAST e avea ma Ao Mamalu o le Malo o Samoa.

Na tuuina atu loa le fa’afesili mo le tofiga o Tuimalealiifano i le Palemene e le Fofoga Fetalai, peita’i, ua leai se tasi na te’ena lea tofiga.

Mai ia Iulai 21, 2017 i lalo o le tofiga a le faigamalo a le HRPP ma le Palemia o Tuilaepa Sailele Malielegaoi, sa amata mai ai le ta’ita’iga a le afioga le Tamaaiga Tuimalealiifano V. Sualauvi ll, ua toe soso’o nei le isi lima tausaga mo lona lea lava tofiga, ma o le a fa’ato’a toe filifilia se isi sui fou pe toe soso’o fo’i ia Iulai 21, 2027. O lona uiga o le tofiga lea sa muta i le masina ua te’a, peita’i e le’i tauaofia le Palemene mo ana fonotaga, o lea ua fa’asalafa ai le iloiloga se’ia tauaofia le Palemene.

O le afioga le Tamaaiga Tuimaleali’ifano o se ali’i Loia, peita’i sa mua’i avea o ia ma Leoleo a le Malo o Samoa fa’ato’a taumafai ai mo lona tofi loia. Ua mae’a fa’atulagaina fo’i lana fa’atautoga i le aso na soso’o ai ma lona filifiliga.

TAMAITAI FA’ASE’E E FA’AAOGA LE KITE - A’AU VA O SAMOA NA LUA

O se Kamupani Fai Ata Tifaga mai Siamani, Iconoclast Production, ua latou fa’aaogaina le va o Tutuila ma Upolu o le atu Samoa, e a’au ai le tamaitai Fa’alele Maua Fa’apolofesa o Olivia Jenkins, e a’au ai ma faalele lana Maua, ae pu’ea lona ata, ma ua ausia ai e ia le ulua’i matati’a o se tasi ua ia kolosi le laina fa’avaomalo i le va o itulagi e lua, sasa’e ma sisifo.

Talu mai ona se’e Samoa e aofia i le isi itulagi i sisifo, ua fa’amauina i le ese’esega o aso i le va o Samoa na lua, o lea ua mataituina e lea au fai ata tifaga, e avea ai le tatou vaimotu ma se atuvasa e pu’ea ai le latou lea ata tifaga.

O aiaiga uma sa tatau ona usita’ia e le au pu’e ata tifaga lenei i le tatou Malo ma Samoa sa amata aiaia mai ia Iulai 2022, ina ia mafai ona fa’ataunuu. Peita’i o le fa’atagaga na talosagaina sa’o mai i le American Samoa Search & Rescue Department ina ia mafai ona fa’ataunuu lea taumafaiga, ma sa talia e le Fa’atonu ia Sinauli Fa’amasino Galoia. 

Sa aofia ai le Marine Patrol Division i lea taumafaiga atoa. Sa tapena mai nisi o mea faigaluega e tatau ona faaaogaina pe a tupu mai se fa’aletonu a’o fa’atautaia lenei faatofala’iga i le tai. O mea ia sa nafa ma le EMS le isi fo’i vaega o le matagaluega fou lenei a le malo.  Sa auai fo’i le tamaitai tausima’i o Sandra Ho Ching mai le LBJ Medical Center i lea fa’amoemoe. 

Na oo mai sui o le Kamupani Viliata Tifaga a le Iconoclast Production ia Aukuso 9 se’ia oo i le aso 15 Aukuso e fa’atino ai le fa’amoemoe ma ua ame’a fo’i ona fa’ataunuu lea tulaga ma le fiafia, ma ua lisia ai nei le tamaitai a’au Fai Maua o Olivia Jenkins ma se sui muamua ua ia a’au i le va o Tutuila ma Upolu ua kolosia e ia le laina o itulagi e lua, Sasa’e ma Sisifo.

Ua fa’ailoa i se tusitusiga fa’asalalau a le Iconoclast Production, “O le tala lenei ua avatu i fafo mai lenei taumafaiga a Jenkins, o le a avea ma mea e ta’uta’ua atili ai nei malo e lua i le mamalu lautele o atunuu tetele e tusa o taumafaiga o ta’aloga i le sami, tulaga o le tau saogalemu, ae maise o le gataifale ua mae’a tamau i suesuega fa’asaeanisi e saogalemu mo le fa’atinoga o ta’aloga i le tai. E ese mai lea, o le a fa’alauiloa atu ai ma le aganuu matagofie a Samoa na lua, o le talimalo lelei mo tagata malaga maimoa mai e fia auai i ta’aloga i le tai.”

“E ese mai lea, ae o le a fa’alauiloa atili ai le matagofie o le gataifale o nei atu motu i le Atu Samoa, e ui ina eseese itulagi ua fa’atulaga ai nei, toe eseese fo’i faigamalo ua fa’atautaia ai. Ae o le isi mea taua lava, ua fa’alauiloa atu ai Samoa na Lua i lenei fo’i taumafaiga mo ata tifaga.”