Asiasi mai i Amerika Samoa peresitene o le StarKist Co.

Pago Pago - AMERIKA SAMOA

O le ali’i Peresetene ma o le Pulesili fo’i lea o le StarKist Co., Mr Andrew Choe lea na to’ai taunuu mai lana faigamalaga asiasi i le tatou Falei’a i Stala ma Atuu i le va’alele o le afiafi o le aso Gafua na te’a nei, mo lana asiasiga i le atunuu e tasi le vaiaso.

O se tala mai le fa’auluuluga o le StarKist i lona ofisa autu i Amerika, ua fa’ailoa mai ai, o nisi o mea taua tele i le ali’i Peresetene i lana asiasiga lenei, o le fia feiloa’i lea ma ta’ita’i o le faigamalo a Tutuila ma Manu’a o lo ua tutula’i mai nei. O lana asiasiga muamua lenei ua faia mai, talu ona suia le faigamalo a le tatou teritori.

Ua fuafua fo’i Choe e fono ma taitai o le StarKist Samoa ae maise le pulega i le kamupani.

O lana malaga muamua na fuafua mai i le tausaga 2020 na toe tolopoina lea ina ua a’afia fo’i le lalolagi i le Covid-19 ma sa tele fo’i fa’asa sa fa’amamaluina i le teritori mo tulaga o femalagaiga i le va o Amerika Samoa ma isi setete uma o le Malo tele.

Peita’i, o le tatalaga o le Ofisa Autu o le Pulega a le Star Kist atoa sa fa’atautaia i Uosigitone DC ia iulai 26, 2022, lea sa mua’i feiloa’i ai fo’i le tatou faipule i le Konekeresi, Uifa’atali Aumua Amata ma le susuga le peresetene ua malaga mai nei.

Ua fa’ailoa mai i se fa’amatalaga aloa’ia na tuuina mai i le Ofisa o le tatou Faipule i le Laumua, “O mataupu sa talanoaina i le latou va ma le pulega a le Star Kist Aoao ua matele lea i tulaga o aiaiga fou ua tau fa’apasia mai mo faigafaiva i le sone a le Malo tele lea e aofia ai ma le sone fagota a Amerika Samoa, o le tulaga moomia o i ai nei a le Star Kist i le tatou atunuu mo le fa’ateleina o ana tagata faigaluega ma le fesoasoani tele a le faigamalo i lea tulaga, o le lafoga 30A, tau o le soifuaga ma isi fo’i mataupu e a’afia tonu ai le sone fagota ma le soso’oga o tau fa’aofi mai.

O nisi o nei mataupu na talanoaina, ua aofia i se folasaga a le Sui Peresetene o le Malo tele i lana saunoaga fa’apitoa i le fonotaga a Taitai o Malo o le Atuvasa sa fa’atautaia lea i Fiti e le’i mamao atu.