17 FAIA’OGA FAAU’U COHORT 35 MA FA’AILOGA “BACHELORS IN EDUCATION”

Pago Pago - AMERIKA SAMOA

O le sauniga mamalu sa faatautaia mo le vasega fa’ai’uaso o Faia’oga sa latou fa’aaoga tatau lelei le avanoa ma le feagaiga osia i le va o le ASDOE a le tatou Malo ma le Iunivesite o Hawaii mo faia’oga Amerika Samoa, e sailia ai latou fa’ailoga maualuluga, e agava’a ai mo a’oa’oga fa’apito augafa i le a’otauina o fanau i lenei vaitau, i ala eseese e fa’aosofia ai lo latou naunau i a’oa’oga. O le vasega lenei o faia’oga ua atoa i ai le to’a 35 o vasega eseese ua fa’au’u mai ma fa’ailoga BEd.

Na auai le afioga le Kovana Sili Lemanu PS Mauga faapea ma le fa’atonu o Aoga, Talauega Dr Samasoni Asaeli mo lea fa’atasiga taua tele, ma ua i ai fo’i la’ua avanoa e tima’ia ma fa’afetaia ai le soifua suesue, soifua onosa’i, ma le soifua tausaili o nei faia’oga uma.

“E mautinoa e matua tele lava mea e fa’atino i totonu o tou aiga, o le aoaoina o fanau, e mana’omia masini e fa’aaogaina e outou mo nei a’oa’oga e fa’aauau ai, e i ai mea e faia i totonu o tatou ekalesia ma afio’aga, ae ua outou tumau ma tausaili pea lava, ua outou to’ai mai i le fa’ai’uga o la outou folauga, fa’amalu ua tau lau o la outou taumafaiga. Malo le fa’amalolosi, ae o fua o lenei taumafaiga, e fa’ailoa i le soifua a’oa’oina lelei o fanau a le atunuu.”

I le sauniga sa tula’i ai lana susuga le Faife’au Solomona Faiva mo le tatalo amata ma toe fa’ai’uina ai fo’i le faamoemoe o le CoHort 35.

O le susuga Ronald Turituri sa avea ma fofoga o le polokalama fa’asolo mo le fa’au’uga o lea vasega o faia’oga, ma o ia fo’i sa ia tula’i ina ia saunoa fa’alaeiau ma fa’afeiloa’ia le mamalu lautele sa poto i le Gov.Lee Auditorium i le afiafi o le aso Faraile na te’a neie molimauina lea fo’i aso iloga i le soifua taumafai o le to’a 17 o nei faia’oga loto tetele.

Sa tula’i Dana Love Ili mo le fa’alauiloaga fa’asaini o le sauniga ma saunoaga fa’apitoa uma o le aso iloga, ma ua mafai fo’i ona fa’amalamalama atili ai ma uso uma e fa’aaogaina saini e malamalama ai i fa’amatalaga o le sauniga.

Ina ua mae’a le tufatufaga fo’i o fa’ailoga o faia’oga nei e to’a 17 na tula’i fo’i le tofa le fa’atonu o a’oga Talauega Dr Samasoni Asaeli mo lana saunoaga fa’afetai mo nei faia’oga uma ona o le loto tetele ma le fa’ai’uina o latou faiva i a’oa’oga mo fa’ailoga maualuluga.

“Ua outou tau ma ua manumalo, aua le faiva o le a’oa’o atu i fanau a le atunuu i ala e fa’aosofia ai lo latou naunau  e tausailai le atamai. Malo le fai o le faiva, ma ua tau lau o lo outou fa’amoemoe e pei ona saunoa i ai le tatou ta’ita’i i lenei sauniga mamalu,” o sana tala lea i le vasega o faia’oga.

O i latou o faia’oga ua umia nei o latou fa’ailoga BEd, ua lisia ai: Celeste Segaula Galea’i Annandale; Va’aiilealofamonioleatua Kilitina Laumoli Fiti Aofia; Metanoia Anne Punimatatogo Solomona Ta’ase Faiva; Henipira Eros Taumatou Faumuina; Alice Fa’atasiga Fa’afana Gaoa-Harmon; Fa’aa’e Fetala’i Seanoa Koloi Taumailelei; Me Epifania Tupuola Kalolo Iosefo; Amanda Siatumotu Lafua; Wilmamina Iupeli Mata’utia Tuliloa-Leafa; Taufao Tamaolelupelelesalelavalusoa’a Lealaimatafao; Epati Simanu Lili’o; Lavea’i La’apui Lefano Faumuina Logoa’i; Tilofia Natasha Apelu-Moetala; Amelia Cecile Jasmin Molia Suimalua Matua-Samuelu; Healani Fuarosa Fatifatiao Misipati Leama Tatupu;Itumalo tautinoga Asoiva Tava’i Tufi ma Elisiva Utuone-Solomona.