Tuai ona malaga ese le Hawaiian Airlines i le po o le Aso Tofi; le fiafia nisi o le aumalaga

Pago Pago - AMERIKA SAMOA

E to’atele le mamalu o le pasese a le malaga a le Hawaiian Airline 466 na faaalia lo latou le fiafia i le pulega a le Hawaiian Airline, i le leai o se fesoasoani mo i latou mo le toe fo’i atu i o latou aiga, ina ua le faataunu’uina le malaga sa fuafua i le po o le aso Tofi na te’a nei mo Honolulu, ona o nisi o mafuaaga fa’afuase’i.

O le aoauli o le aso Faraile na sosoo ai, Aokuso 19, 2022 i le itula e 2:00 i le aoauli na faataunuuina ai loa lea faiga malaga mo Honolulu.

O le malaga a le HAL sa faamoemoe e taunu’u mai i le itula e 9:00 i le po o le aso Tofi na te’a nei, na tuai ona taunuu mai i Pago Pago International Airport. Na faatoa taunu’u mai lea malaga pe tusa o le 11:30 i le po.

Pe tusa o le itula e 12:40 i le po lava lea na faailoa aloaia mai ai loa e sui o le HAL i le mamalu o le au malaga, ua le faataunuuina le malaga sa fuafua mo Honolulu i lea po, ona o nisi o mafua’aga.

Na faamalulu sui o le HAL i le mamalu o le pasese i lea po ona o tulaga faaletonu ua le mafai ai ona taunuu le faigamalaga. O nisi o faaletonu i tulaga o le va’alele ua le mafai ai ona faataunuuina le faigamalaga, e le gata fo’i i lea, ua moomia e le pailate ma le aufaigaluega le tatau lea ona fai sa latou malologa, ona ua ova le taimi sa faatulagaina e tatau ai ona malaga i luga o le ea.

O le itula e 10:00 i le taeao o le aso Faraile na sosoo ai na tatala ai le laulau mo le siakiina o pasese mo le malaga, ma le faamoemoe o le itula e 2:00 i le aoauli e tatau ai loa ona tu’uvaa ese atu le malaga mo Honolulu. 

Mo le mamalu o le pasese e fuafua e fa’aauau a latou malaga mo Amerika, o le a galulue le aufaigaluega a le HAL mo le toe faatulagaina o taimi o a latou malaga.

Na fa’aalia e nisi o le mamalu o le pasese lagona le fiafia i lea po, i le leai o se fesoasoani a le HAL mo se nofoaga e momoe ai i lea po e faatali ai le vaalele i le taeao e sosoo ai, ona o le mamao o le nofoaga e malaga mai ai.

Na taua e se ulugalii mai le afioaga o Amouli e faapea, sa tatau lava i le pulega a le HAL ona totogi ni Faletalimalo e mapu i ai le pasese atoa e faatali ai le vaalele i le taeao e sosoo ai.

“E le o se faaletonu na mafua mai i le pasese, o le faaletonu lava na afua mai i le HAL, e tatau fo’i la i le HAL ona latou saunia ni nofoaga mo le mamalu o le pasese, ona o le mamao o nofoaga o le a toe aga’i atu i ai,” o le saunoaga lea a se tasi o Tama mai Amouli sa fuafua e malaga mai si ona faletua i Hawaii i lea po.

O le lagona fo’i lea na fa’aalia e se tasi o aiga na faamoemoe e malaga i lea po. O le ulugalii ma le la fanau e to’a 3 sa faamoemoe e malaga i Hawaii peita’i na toe fo’i atu i lo latou aiga i Lauli’i.

Na taua e le Tina o le aiga e faapea, pau le auala e mafai ai ona toe fo’i i le fale o le vili o le taxi e toe fo’i atu ai i le fale. 

O le toatele o le mamalu o le pasese i lea po, na totogi taxi e toe fo’i atu ai i o latou aiga. O le isi aiga na saili o latou aiga e tau lalata ane i le malae vaalele e mapu i ai mo le po, e faatali ai le taimi o le vaalele i le taeao e sosoo ai. 

Pau le faanoanoaga i nisi o le pasese i lea po, o le tuai lea ona faailoa ane e le pulega a le HAL o le faaletonu i le malaga a le va’alele. 

I le taimi na siaki ai ato ma tusi folau o tagata malaga pe tusa o le itula e 8:00 i le po o le aso Tofi, na faailoa ane ai e le aufaigaluega a le HAL i nisi o le pasese, e ono le faataunuuina le malaga a le HAL mo Honolulu, ona ua tatau ona fai se malologa a le pailate ma le au va’a. 

Sa latou faaalia atili fo’i e faapea, faatoa mautu lava le fuafuaga i le malaga o le vaalele mo Honolulu pe leai fo’i, pe afai ae taunuu mai le malaga mai Honolulu i lea po ma fesiligia le pailate i sona finagalo, poo lava lona malosi e toe faaauau ai le malaga pe leai fo’i. 

O pasese uma lava na faamoemoe e malaga tu’u sa’o mo Amerika pe a taunu’u le malaga a le Hawaiian Air 466 i le taeao o le aso Faraile, ua mae’a ona toe faatulaga uma taimi o a latou malaga i le taeao o le aso Toona’i, Aokuso 20.  Na tapena e le Hawaiian Airlines ia Faletalimalo e mapu i ai pasese uma lava nei ina ua taunuu le malaga i Honolulu i le po o le aso Faraile na te’a nei i le itula e 8:00p.m, e aofia ai ma le taumafataga o le po atoa ai ma le taumafataga o le taeao o le aso Toona’i.

Sa tufa tufa fo’i e le HAL i le malae vaalele i Tafuna pepa taumafa maua fua (free meal coupons) e amata atu i le $15 - $30 mo pasese uma lava.