TALA I VAIFANUA

Pago Pago - AMERIKA SAMOA

FA’ALAUILOA KOVANA - MANU’ATELE NOFOAGA O FA’ALAVELAVE FA’AFUASE’I

O le aso Lulu o lenei vaiaso, 17 Aukuso, 2022 ua fa’amauina ai le fa’alauiloaga a le afioga Kovana Lemanu PS Mauga, o le Manu’atele ua i ai nei i se nofoaga o se fa’alavelave fa’afuase’i e ono tupu i so’o se taimi lata mai.

Mai le lipoti lata mai a le vasega o Saeanisi Suesue fa’apitoa i Mafui’e ma Maugamu, ua mae’a tuuina mai ai se latou lipoti e ala i fa’amaumauga ua mafai ona fa’ailo mai e masini e sailia ma fa’alogoina luluga o mafui’e ma maugamu ua mae’a fa’ataoto i ogasami e tolu o le Manu’atele.

O lea lipoti ua fa’ailoa mai ai, ua ta’i 20 luluga o lo’o ua matauina i le itula i le alititai o le Manu’atele. O le malolosi o nei luluga ua i le va o le 2-3 o fua o mafui’e, peita’i o lo’o i lalo tonu le afuaga o nei mafui’e o motu o le Manu’atele, e matele i le faleta’u nai lo Ofu, Sili ma Olosega.

Peitai, ona o le Manu’atele o motu e mautu ona fa’avae papa, o lea e le tauau ina tupu se maugamu e tali tutusa ma le maugamu o Tonga-Hunga Ha’apai lea na pa i le amataga o lenei tausaga i le malo o Tonga. O motu o Tonga o motu oneone. Ona o mafui’e a tetele ona afua mai ai lea o galulolo tetele poo tsunami, o lea ua nofo lapata’ia ai le mamalu o pelega uma o lo’o alaala tumau i atumotu o le Manu’atele ina ia nofouta i latou o lo’o nonofo i auvae mauga poo eleele tumatafaga, aua e oo gofie i ai galu maualuluga.

Ua amata nei la ona lapata’ia faapea ma galuega fa’amautu o nofoaga maualuluga i Tau fa’apea ma le atumotu uma o Amerika Samoa, ina ne’i lutia i se galulolo e afua mai ni mafui’e tetele ona luluga i se taimi lata mai. Ua amata tapena e le malo ala sopo i nofoaga maualuluga e tua i ai afioaga o le Manuatele pe a tutupu nei fa’alavelave fa’afause’i fa’anatura.

E afua mai ia Aukuso 10, 2022 ua amata foi galuega a le EOC o fa’amaumauga ma mata’i galuega lavea’i o le soifua o tagata lautele ae maise lava i le Manu’atele lea e sofa’i nei e le tele o luluga o mafui’e, lea ua fuaina mai e le USGS/NOAA, e tusa ma le 20 mafui’e ua lulu i le itula.

Lapata’ia le mamalu lautele ina ia mata’i mo mea nei i taimi uma o luluga: (a) Soo se tasi e fa’alogoina se luluga o le mafui’e, mata’i le sami, pe mou vave atu le suasami ma toe sua mai, fa’alogoina le gogolo tele mai le tai, ona e fa’ata’alise loa lea i nofoaga maualuluga o lo’o ua e silafia e te malu ma saogalemu mai le galulolo; (b) Afai e te fa’alogoina se luluga o le se mafui’e ia e taumafai e lipoti i le EOC poo le Ofisa o le Va’ai Tau a le tatou malo i Pago Pago Amerika Samoa. Ia fa’amau le taimi na lulu ai ma fa’ailoa le nuu sa e i ai ae lulu lea mafui’e.

O le fa’alauiloaga lenei a le kovana, ua fa’amauina na afua mai ia Aukuso 10, 2022 mo le teritori atoa o Amerika Samoa, ma o le a taualoa mo le 30 aso ona toe soso’o mai lea ma se isi fa’alauiloaga o lenei nofouta mo faalavelave fa’afuase’i e fa’aolioli mai.

Na to’atele se aumalaga na oo atu fa’atasi ma le tatou Kovana i le Manu’atele ina ia latou mita’i ma ia lapata’ia fo’i le mamalu o le atunuu o loo alaala tumau i le Manu’atele i le Faleta’u ma le Faleluanuu.

O lo ua mae’a fa’atoai mai i fanua nisi o lo’o iloga agava’a mo le fuaina o faalavelave fa’anatura tau Maugamu ma Mafui’e ma ua mautu fo’i a latou masini fa’apitoa e fuaina le gatete ma luluga o mafui’e ma maugamu i le gataifale o Ofu ma Olosega ma le Faleta’u. 

O le a fa’aauau ona fa’ailoa mai ni a latou lipoti mae’ae’a e afua mai fa’amaumauga ua maua mai i nei masini i le alititai o le Manu’atele.

TO’ALUA SUI AGAVA’A SUESUEGA O MAUGAMU & MAFUI’E 

Ua mae’a silafia e le atunuu le tamaitai suesue fa’apitoa mo Maugamu ma Mafui’e na muai fa’ato’ai mai i Amerika Samoa, Natalia Deligne, peita’i lea ua oo mai ma le ali’i suesue o Dr Drew Downs. I le taimi nei ua mae’a fa’atutu masini e fuaina luluga o mafui’e ma maugamu i le alititai o le Manu’atele, ma ua mita’i nei e le tamaitai o Deligne fa’amaumauga uma mai nei masini ma ua ia fa’ailoa mai ai, “O le a ititi lava se avanoa e mafai ai ona pa se maugamu i le Manu’atele”.

Peita’i ia galulue fa’atasi nei i la’ua ma Downs aua o lo’o ia Downs se tomai fa’apitoa o le fuafuaga fa’ataoto o le tele o Maugamu i le lalolagi. 

O le a aoga tele fa’amaumauga uma mai nei masini fa’atasi ai ma le masini tele ua tatalia nei le fa’atoai mai i le atunuu i le malaga anapo a le Hawaiian Air ma e tatau ona avatu i le Manu’atele e ala i se va’a folau.

Peita’i o lo’o i ai fo’i le fa’afitauli o tulaga louloua o le tau e fa’auilavea i taumafaiga e faaoo atu lea masini tele i le Manu’atele mo le fa’amoemoe e fa’aaogaina ai. E tusa ai ma le faamatalaga a le ali’i suesue i Maugamu i le lalolagi ua ia fa’ailoa ai, sa i ai le maugamu i le Manu’atele i le vai tausaga 1860.

Ua ia fa’ailoa fo’i o nei fa’amaumauga sa fa’amauina mai e misionare ma tagata o Manu’a, o le maugamu i Manua lava ia, ae le ona o Vailulu’u e pei ona fa’aiteite ai tagata o le afuaga o nei luluga uma i le lua vaiaso talu ai.

Ua faailoa e Downs le eseesega o le Vailulu’u lea na fa’ato’a amata afuafua mai le 20 i le 30 tausaga talu ai, ma e tele eseesega pe a fa’atusatusa i le maugamu i Manu’atele o le 1866.

Ua fa’ailoa mai fo’i e Natalia Deligne e ala i sana fa’ai’uga o fa’amaumauga mai masini o fuaina luluga o mafui’e ma se maugamu o fa’aolioli mai, “E le o tau lata mai se taimi e pa ai le maugamu o Vailulu’u.”

FA’AU’UGA COHORT 35 FAIA IA AUKUSO 19

Ua fa’ailoa mai le fa’au’uga o le vasega o Faia’oga ua ausia fa’ailoga maualuluga BEd i le polokalama soofa’atasi a le ASDOE ma le Iunivesite o UH Manoa, o le a fa’ataunuuina lea i le Rex Lee Auditorium i le itula e 4:30 ia Aukuso 19, 2022.

O le vasega lea ua fa’amauina o le COHORT 35 ma e to’a 17 i latou ma ua latou fa’aalia foi o latou agaga fa’afetai tele i le avanoa ua latou maua e tausailia ai latou fa’ailoga maualuluga ao faiaoga pea i latou mo le fanau a’o’oga a Amerika Samoa.

O le vasega lenei o faia’oga sa latou faia se tautua mo le mamalu lautele o le atunuu ma latou fagaina ai le mamalu o foma’i ma le aufaigaluega uma a le Falema’i LBJ Medical Center mo le masina atoa o Aperila 2022. Na mafua ona latou fa’atinoa lea tautua lautele ina ua talosagaina fo’i e le susuga le Foma’i o Dr Ledua Akapusi le fesoasoani mai le atunuu lautele mo ni mea taumafa mo le aufaigaluega aua ua le mafai ona maua se taimi avanoa mo i latou e saili ai se fa’amalositino tau mea taumafa ma vaiinu ona o le fa’asa o le Covid-19 ma le tele o aiaiga tamau tau tiute faia mo i latou o tausia ma taofia i le maota gasegase e oo lava i le falema’i taofia o gasegase covid-19.

O le sauniga fa’apitoa o le a i ai se avanoa o le afioga le Kovana Sili Lemanu PS Mauga e tapena ai se upu fa’amalosi mo i latou o e fa’amoemoe i ai le Malo mo le a’oa’oina lelei o fanau aua le lumana’i manuia o le atunuu. E le gata i lea ua i ai foi se avanoa lelei mo le Fa’atonu o A’oga Talauega Dr. Samasoni Asaeli e saunoa ai e tusa o le polokalama ma lona aoga ua va’aia ma tino mai talu ona amatalia i le va o le Matagaluega o A’oga a le tatou Malo ma le Iunivesite o Hawaii Manoa.

O vi’iga o lea foi sauniga mamalu o le a saunia fa’apitoa lea e le aufaipese a le CoHort 36 lea e lumana’i nei le latou fo’i fa’au’uga i le fa’aiuga o le isi tausaga a’oga 2023.