TALA I VAIFANUA

Pago Pago - AMERIKA SAMOA

MAUA LE FA’ATUPEGA MO LE CRIMINAL JUSTICE MAI LE U.S. JUSTICE

Ua faaalia le agaga fa’afetai o le tatou faipule i le Konekeresi ina ua mafai ona fa’amauina le toina mai o le tinoitupe e $144,923. mai le Matagaluega o Tulafono (USDOJ) mo le tatou Ofisa o le Criminal Justice Planning  Agency.

O lea vaega tupe ua fa’atulaga mai ina ia fesoasoani lea i se polokalama e fa’atautaia mo e o nofosala i falepuipui, ma ia aoga lea polokalama e toe fa’aleleia ai le soifua o e ua a’afia i soligatulafono tau fuala’au fa’asaina ma vaila’au o’ona.

“Fa’amalo atu i le Ofisa o le CJPA, i le tamaitai fa’atonu Mariana Timu- Faiai ma le aufaigaluega, ona o le latou sogasoga ma le mataala e tausailia atu ai fa’atupega nei e aoga mo polokalama eseese e fesoasoani ai i o tatou pelega o nofoaga o sala.”

“Ou te mautinoa fo’i o le a fa’aaogaina tatau nei vaega tupe uma i polokalama ua fa’avasega tonu atu e fa’aaoga i ai e le tatou Ofisa o le CJPA, ae maise ia fa’aitiitia le a’afia o nai o tatou tagata i fuala’au fa’asaina ma vaila’au oona.”

O fa’atupega nei na fa’atulaga ma aiaia e le Koenekeresi mo Ofisa eseese nei o Setete ma Teritori e mana’omia ona fa’aaogaina ma pasia lelei mai e le Matagaluega o Fa’amasinoga i le latou tupe fa’asoa mo le tausaga 2022.

TUMAU MATAGI MALOLOSI & GALU MAUALULUGA - TIMA’I MAI KOVANA “MANUATELE IA LE GAE’E”

O lo’o tumau pea lava lapata’iga i le atunuu mo galu maualuluga ma matagi malolosi i le toega lava fo’i o lenei vaiaso. Ua va’aia lava fo’i le lutaluta o le tai i taimi uma ma ua siisii i taimi uma e sua tutu’i ai le tai.

O le a tumau lea lava tulaga o le tau ma ua iloga ua to’ulu pea lava timuga ma o le a fa’aauau ai i le fa’aiuga o lenei vaiaso.

Peita’i mo le Manu’atele lava ia, ua tima’i mai le tatou Kovana Sili mo le mamalu lautele o e ua alaala i le Manu’atele ina ia le fa’apopoleina i latou ona o le tele o luluga o lo’o fa’alogoina e i latou talu mai le tolu vaiaso ua tuana’i nei.

“E mautinoa o lo’o saogalemu lava i tatou i le taimi nei, e faigata ona mautinoa i o tatou lagona ona o le taso’o mai o luluga, ae ua oo mai ali’i  ma tamaitai suesue fa’apitoa i mafui’e ma maugamu, o lo’o ua fa’agasolo nei a la’ua suesuega fa’atasi ai ma sui mamalu fo’i o le NOAA, ua latou so’otau’au ina ia fa’auia mai se lipoti mautu o se vaitaimi tonu e fa’aoo mai ai galuega lavea’i,” o se tala lea a le fa’atonusili o le Matagaluega Puipuiga o le Saogalemu Fa’alotoifale Samana Ve’ave’a.

Ua mae’a malaga atu le Kovana Sili i le Faleta’u ma ua mae’a saunoa aloa’ia ai i ta’ita’i ma e uma sa fa’atasia ai, ua fa’apena fo’i ona oo atu i Ofu ma Olosega ma ua ia fa’ailoa atu fo’i lea tulaga ia i latou uma.

Ua fa’ailoa e Samana ua mae’a ona fa’ailoa mai e le vasega o suesue faapitoa i maugamu ma mafui’e, o nei mea uma e le o se fa’atalitaliga lea o se Maugamu e Pa tele ma a’afia ai le to’atele. O lea la ua fa’aaoga tatau ai e le Malo le vaitaimi lenei, e vave tapena ai nofoaga maualuluga ina ia fa’aaogaina vave pe a oo ina lutia le Manu’atele i ni fa’alavelave fa’afuase’i fa’anatura, i se taimi lava e oo mai ai.

“Ua mae’a fo’i ona fa’ataoto le fuafuaga e fa’atino i le taimi tonu lava e tupu mai ai ni fa’alavelave fa’anatura i le Manu’atele, o lo ua tapena mamao atu ina ia mautinoa lava ia saogalemu tagata uma,” o se tala lea a le ali’i fa’atonu sili.

Na faia se fonotaga fa’apitoa a le tamaitai suesue o Mafui’e ma Maugamu Natalia Deligne, i le taeao o le aso Lua ina ia fa’ailoa mai ai e ia sana lipoti e tusa o le tele o luluga o le Vailulu’u i le Manu’atele.

Peita’i ua vala’au mai fo’i se tasi o faiaoga o lo’o i ai i le Manu’atele, Ofu ma Olosega, Will Thompson, ma ia fa’ailoa mai sona taofi, “Ua tatau ona fa’atino e le Malo se fuafuaga mautu e ave’esea mai ai le to’atele mai le Manu’atele seia mae’a le tele o luluga o lo’o fa’apopoleina atili ai tagata o i ai i Manu’a, pe pa fo’i le Vailulu’u.”

Mai tusitusiga a le faia’oga i le Manu’atele i luga o le Facebook e fa’aautu mo le silafia o le Kovana Sili, ua ia fa’ailoa mai ai, “Ua amata ona soso’o luluga, ua oo ina silia ma le 20 taimi e lulu ai i le aso e tasi. Peita’i e le o maua e i matou se tali maumaututu e fa’anofofale ai lagona fefe ma le mata’u pe a oo ina lulu mafui’e nei. E le o mautu mai se fuafuaga e ao ina tapena i ai le mamalu o e alaala uma i lenei itu o le atunuu, ia mautinoa ua fa’asaoina le soifua pe a tutupu fa’afuase’i se fa’alavelave fa’anatura.”

O le latou lava fa’ai’uga ua talosaga mai, o le fa’atulaga lea e le Malo o va’alele e la’u mai ai o latou tagata i Tutuila nei.

“Faatulaga mai se matou pasi e mafai ona malaga atu ai ma fa’anofoia matou aiga i Tutuila se’ia mae’a na tupu le fa’alavelave o lo’o fa’aolioli mai o le Vailulu’u. Afai e leai ni aiga o matou tagata mai Manu’a i Tutuila, e mafai ona fa’aaogaina le falema’i i le Malaeva’alele i Tafuna mo na sui.”

Ua fa’ailoa mai fo’i e le faia’oga lea, “Ua tatau fo’i ona fa’aaoga mai matou tagata i Manu’a nei mo le taina o ala e a’e ai tagata i nofoaga maualuluga i le Motusa. O loo to’atele fo’i tagata o Manu’atele ua loa e le o toe oo mai i Manu’a, masalo o se taimi lelei lea e ao ina oo mai ai, ona o lea o le a galuea’ina se auala e mafai ai ona sopoia nofoaga maualuluga o Manu’a e fa’asaoina ai le soifua o ona tagata.”

“Pe afai o le a oo mai se fa’alavelave tuga ae o le maugamu e pa, o le a se tele o le afaina mo le soifua o tagata o lo’o alaala tumau pea lava i Manu’a? O le a se umi ona tupu lea o se fa’alavelave fa’apea ina ia nofouta tonu ai tagata mo se mea tele e ono tupu mai? Pe tali tutusa ma le Maugamu na pa i Tonga, pe a mai fo’i la le Manu’atele i se tulaga o se galulolo e mulimuli mai i nei fa’alavelave fa’anatura?”

Peita’i e tasi le mea ua mautinoa nei ua saunoa i ai le tamaitai suesue o Maugamu ma Mafui’e, “E le pei se maugamu e pa iinei e pei o le Maugamu i Tonga lea e le’i leva ona a’afia ai lea malo.”

Ua fa’ailoa mai e Deligne, “Pe afai e pa se maugamu i le Manu’atele, e tali tutusa ma le maugamu i Hawaii ae le pei o le Maugamu na pa nei i Tonga ia Ianuari.”

Mai fa’amaumauga o le a maua mai i masini e fua ai maugamu ma mafui’e ua mae’a fa’atulaga nei i le gataifale o le Manu’atele, o le a mafai ai ona tuuina aloaia mai nisi o tali o lo’o mo’omia uma e le mamalu o le Manu’atele, ma e fa’ato’a maua mai i se toega o lenei vaiaso.