TALA I VAIFANUA

Pago Pago - AMERIKA SAMOA

TAU O LE KESI & SUAU’U I LE ATUNUU - FA’AITITIA TEISI LAVA:

O le tau ua i ai nei le suauu ia Aukuso 15, 2022 ua i ai sina pa’u teisi lava i le tau ua fa’atau atu ai i pamu kesi mo le mamalu lautele o feoa’i i ta’avale afi. Ma o lea pa’u ina ua mae’a fo’i ona fa’apa’u mai le tau e le MAP - po’o tau siiatoa e fa’atulagaina e le malo e le Ofisa o le OPADM. 

O le tau o le MAP o le suau’u ma oloa tau suau’u i le atunuu ua fa’aititia mai le $5.09 sa i ai i le $4.33 i le kalone i le taimi nei mo le Unleaded poo le kesi lea e fa’aaogaina e le tele o ta’avale.

O le Kiso o le MAP mo ta’avale ma le kiso mo va’a feoa’i i le sami, ua fa’aititia nei i le 73 sene i le kalone mai le tau sa fa’atau atu ai mai le amataga o le masina. O lona uiga o le tau sa i ai e $5.21 i le kalone kiso ua fa’aititia nei i le $4.47 i le kalone kiso.

Ua fa’ailoa e le tamaitai faatonu sili o le ODAPM, Lisa Tuatoo “E ui lava ina va’aia se suiga teisi o le tau o le suau’u ma oloa tau suau’u e le MAP mo le kesi, a e o le tau si’iatoa lea o lo’o fa’atau mai ai e i tatou le suau’u ma oloa tau suau’u i le atunuu, ae o le a le suia tele ai le tau ua fa’atau atu ai i le mamalu lautele e kamupani fai pamu kesi, e tauau ina le va’aia lava se suiga tele e tagata lautele, aua o lo’o i ai pea lava toega o le kesi sa totogia muamua i le tau maualuga i totonu o le sapalai a Pamu kesi, ma ua le suia vave ai e i latou a latou tau o le kesi mo le atunuu.”

“Peitai, ua tau iloga mai se suiga lelei i le isi masina o soso’o mai, e fa’apa’u atili ai le tau o le tatou suau’u ma oloa tau suau’u uma e gaosia mai ai. O se taumafaiga lava ina ia maua se mapusaga a le atunuu mai le maualuluga tele o le tau o le suau’u o lo’o fa’atau mai ai e le tatou Malo, peita’i e ao fo’i ina maua se faasiliga lelei mo nai faipisinisi e toomaga i ai aua e totogia fo’i tagata faigaluega ma isi uma mau pili a i latou e mafai ai ona tumau le olaola o pisinisi latou i le atunuu.”

TAPUNIA E LE DOH FALE’AIGA I TOTONU O LE FALEMA’I - LBJ CAFETERIA

I le vaiaso na te’a nei i le aso Faraile ua fa’ailoa mai ai le tapunia e le Matagaluega o le Soifua Maloloina (DOH) le tatou fale’aiga fa’apitoa i totonu o le Falema’i tele LBJ Medical Center  Faga’alu. 

E tusa ma se lipoti a le tamaitai suesue a le DOH Eileen Solaita, sa latou mauaina ni tulagavae ma fe’au fo’i a isumu i nofoaga tonu e saunia lelei ai mea tausami i totonu o le umukuka a le falema’i. O se mea e ao ina mita’i lelei ma ia le oo i ai nei manu fa’alafua i totonu o nofoaga e tapena ai mea taumsami mo le mamalu o le aufaigaluega a le Falema’i tele.

Ona o le nofoaga tonu e tausasami ai le mamalu lautele e tapunipunia mai le to’atele, ae o le umukuka lava latou e le o fa’apena, e mafai lava ona matala ma e aoga e fa’aalu ese atu ai le ausa o mea’ai gaosia. O le ala fo’i lea e mafai ai ona uia ane e manu fa’alafua e pei ona matauina nei. O le uaea valavala fo’i na saunia lelei ina ia le sao atu le isumu i totonu, ua le gafia ona fa’asaoina ai le umukuka mai nei meaola.

Peita’i i le nofoaga o lo’o tausasami ai le atunuu o loo ua matauina le mama ma e le o sao atu i ai nei manu fa’alafua. O lea ua asiasia ma ua fa’ailoa mai, “E tatau i le pulega a le falema’i ona latou fausia se fale’ai fou ae maise se umukuka fou, pe puipuimalu mai le umukuka e gaosia ai mea taumafa a le atunuu fa’apea ma gasegase taofia, ia pei lava ona tulaga lelei o i ai le fale’ai i le taimi nei.”

O le tulaga o le fale’ai ma le umukuka fou, ua leva ona taoto le galuega lea a le falema’i sa tatau ona oo mai i lenei vaitau ua mae’a fausia le fale’ai ma le umukuka fou mo le falema’i. Peita’i ina ua lutia i tatou i le oo mai o le Covid-19 i le atunuu, e le’i toe fa’agaoioia loa lea itu o le galuega fa’ataoto a le falema’i, ae ua tamau se’ia mae’a lelei le Code Red a le falema’i o lo’o fa’agasolo pea lava i le taimi nei.”

“Ona o lea ua tuumamaina mai le Code Red a le atunuu atoa, ae o le falema’i lava latou o lo’o fa’amamalu pea lava le Code Red e oo mai i lenei taimi aua o lo’o i ai pea lava le Covid-19 i o tatou laufanua, ae o le taimi lava e tatou te le toe popole ai i lea fa’ama’i, o le taimi lea ua toe fa’agaoioia uma isi fuafuaga sa tauau ina amata ae taofia loa. O se tasi o ia galuega o le Umukuka fou ma le fale’ai fa’afou.” 

“Ina ne’i vevesi le atunuu ua fa’aletonu ona gaosia lelei mea tausami a i latou o lo’o fa’ataotolia i le tatou falemai tele, o lo’o aluga lelei mea uma ma e le o a’afia fo’i mea tausami a ma’i i ni fa’aletonu e pei ona ta’ua i luga. O le mau fa’afuatuaina lava o le galuega o faia nei mai le tatou umukuka, ua le o pepesi atili ai ni fa’ama’i e afua mai ona o manu fa’alafua i le atunuu. Peita’i e faia galuega fa’amama a le aufaigaluega o lea fo’i tautua i taimi uma lava a’o le’i amata gaosia meataumafa, seia oo ina ua mae’a galuega uma e tusa o le 5:30 i le afiafi e tapunia aloa’ia ai le tatou umukuka!”

Mo le silafia e le atunuu, na tapunia aloa’ia fo’i le toe tautuaina mai o le mamalu lautele o le atunuu mai le tatou fale’ai lea i talu mai le taimi na lutia ai loa i tatou i le fa’ama’i Covid-19 Fepuari 21, 2022. E oo mai i le taimi nei e le’i toe tatalaina lava e fa’atau ai ni mea tausami a le mamalu lautele o le atunuu, se’i vagana ai lava le aufaigaluega a le falema’i lava latou. Ua mafai ona oka atu mea tausami, tapena ma saunia ona fa’ato’a piki mai lea mo le fofoga taumafa o le aufaigaluega.

MANUMALO LE COST-U-LESS - TELE O FA’ATAUGA I LENEI VAITAU

Ua fa’amautu mai se fa’ailoga fa’apitoa ma le taua mo le Cost-U-Less i le taimi nei ma ua fa’ailoa mai ma le fiafia e le susuga le Pule Sili o le tatou faleoloa o oloa si’i atoa, Marvin Raps. “O se fa’ataua sili ona maualuga ua siitia i ai le tatou nei pulega ma le aufaigaluega ina ua faailoa mai e le Pulega o Faleoloa uma o le Cost-U-Less i le atuvasa, ua matou mauaina nei le fa’ailoga o le sili ona tele fefa’ataua’iga ua fa’atino ai. O lona uiga ua sili ona maualuga le alumia o oloa fa’atau atu i le mamalu o le au fa’atau i le atunuu.”

“O se mea e faafetaia ai, ona sa mua’i maua fo’i e le tatou faleoloa Cost-U-Less lenei lava fa’ailoga i le tausaga e 2021, ma e aofia fa’atasi le faleoloa iinei, le faleoloa i le vasa Pasefika, mai faleoloa uma o lea ituaiga i le Iunaite Setete atoa o Amerika fa’apea ma faleoloa fo’i i le atu Karipiana.”

“O lenei se ulua’i vaitau i lenei fo’i faleoloa ma fefa’ataua’iga ua matua tula’i mai fefa’ataua’iga i se tulaga sili ona alumia, ma ua to’atele lavai latou e fiafia i oloa o lo’o fa’aoo mai e le tatou faleoloa tele. Ua vave tele le piki e tagata fa’atau o oloa i luga o fata, ae tuai ona toe tuu atu i luga oloa fou mo fa’atauga. Ua iloga mai fo’i o lo’o ua i ai le latou fa’aaliga ua fia maua ni sui fa’atau oloa fou ma ua talia fo’i talosaga mai niisi e fia maua ni glaauega i le taimi nei.”

Ua i ai le latou tagata faigaluega ua ia umia nei le “F’aailoga Fa’apitoa mai le Peresetene “ o le susuga lea Lafitaga Isa’ako poo Lafi lea ua fa’apuupuu ai lava lona suafa.

“O Lafi lea ua ia mauaina le tagata fa’atau oloa matua mata’alia lava ma o lana lava manulauti e fiafia e fa’atino i aso ta’itasi uma e faigaluega ai, Ia tautuaina tagata uma ma lau fofoga fiafia. E le gata i lea, ae o le vave ona toe fa’atumu atu efata o oloa ia alumia ma vave taulia. E fiafia tele o ia e iloa patino mana’oga o tagata fa’atau, ina ia mautu lona taofi, ua fa’atino le galuega i lona soifia tautua ma le fa’amaoni, e fa’amalie le tagata fa’atau.”

“O lo ua fa’ailoa fa’alaua’itele lo matou agaga fa’afetai tele lava i o matou tagata fa’atau mai Samoa fa’apea ma Tutuila nei, aua o le alumia o oloa fefaataua’i, o lo’o fa’amoemoe tele lea ia te outou o e ua o mai ma fa’atau atu mai le matou faleoloa. Ana le seanoa outou le ‘au fa’atau, matou te le pale i lenei fo’i fa’aeaga sili i le atuvasa.”