TALA I VAIFANUA

Pago Pago - AMERIKA SAMOA

NOFOUTA MANU’A ONA O LE MAUGAMU I LE TAELE O LE SAMI -VAILULU’U

O le afiafi o le aso Lua o le vaiaso lenei sa fa’alauiloa ai e le Matagaluega o le Puipuiga Faalotoifale, le fa’atulaia o Nofoaga Autu mo Fa’alavelave fa’afuase’i (EOC) ona lipoti mai nisi o le atunu’u i Manu’a, le maluelue o le eleele, e foliga mai o se mafuie ona o le  Maugamu mai lalo le alititai o Vailulu’u, lea e i le itu i sasa’e o le Motu i Tau i le va ma Rose Atoll.

Mai ia Aukuso 09, 2022 ua amata ai ona fa’atula’ia galuega uma a le EOC ae maise ai le EOC i Ta’u ma Ofu, aua o i latou ia o lo’o tulata i le Vailulu’u.

Ona o lea ua matauina pea le tele o luluga o le Mafui’e i le Manu’atele ona o Vailulu’u, ua fa’atonuina ai le tatalaga o le EOC i Ofu ma Ta’u ina ia amata ona fa’agaoioia galuega tima’i ma tapena mo fesoasoani mo i latou uma o e alaala i le Manu’atele ina ne’i tupu mai lenei fa’alavelave fa’anatura ae ua lava tapena e fa’ao’o atu le lavea’i mo tagata lautele.

Ua lipotia mai ia i latou o alaala i Fitiuta ma Ofu, na amata fa’alogoina le gatete o le eleele i le itula e 3:00 i le afiafi, Aukuso 09, 2022. 

Mo tagata uma i Manu’a, fa’afesoota’i Tupuola i Ta’u EOB i le telefoni 733-4142 poo Lameko i le Ofu EOB i le telefoni 770-4053, pe moomia vave lava se fesoasoani.

I suesuega a le NOAA, ua latou amata fa’amaumauina mai le tausaga e 2012, ma toe asia fo’i i le 2017, ua mataulia ai ua mae’a oo i le 16,400 futu le maualuga o Vailulu’u mai le alititai, ma sa mataulia fo’i ua amata pusapusa mai ai le ea i vaisi ua matauina i lona tumutumu o lea mauga oneone mai le alititai.

O suesuega a le NOAA lea ua fa’aigoaina o le “Suesuega o le Moana o Amerika Samoa,” ia Fepuari 24, 2017 lea ua latou fa’ailoa patino ai o le Mauga afuafua o Vailulu’u o se maugamu o lo’o ua latalata ona pa i le itu i sisifo o le Atu Samoa.

Mai fa’amaumauga amata o le suesuega i le tausaga 2005 ma le toe fa’amaumauga i le tausaga e 2012, toe soso’o mai le asiasiga mulimuli i le tausaga 2017, ua mautinoa ma iloga ai le tele o le suiga ua i ai le maualuga o lea mauga e afuafua mai le alititai poo Vailulu’u.  E ese mai lea o le tumutumu tonu o lo’o ua va o lo’o ua amata pupusa mai ai le ea vevela, poo Nafanua lea ua fa’aigoaina ai nei i suesuega a le NOAA, ua fa’ateteleina lona tele. Ua mautu mai fo’i ua lua tumutumu o Nafanua ia matauina ma faamau mai i nei suesuega.

MOOMIA TAGATA FAIGALUEGA A LE TSA - $21.13 TOTOGI I LE ITULA

Ua fa’alauiloa e le Transportation Security Administration [TSA] i latou ia e siakia ato ma uta uma e fia malaga ma se tasi i le va’alele, ua moomia nisi o tagata faigaluega mo i latou i le Malaeva’alele fa’avaomalo i Tafuna ma i le taimi nei, e tolu avanoa o lo’o ua moomia ona fa’atumulia.

O le totogi amata mo nei avanoa o fia maua ai nisi e faigaluega ai e $21.13 i le itula. E ese mai lea totogi, ua ofoina mai fo’i e le TSA le ta’i $500. e toina mai mo le sui fa’ato’a amata ona faigaluega ma le isi $500. mo le sui ua atoa le tausaga talu ona tautua i le TSA.

O se faaaliga ua maua mai nei le pulega o le TSA, ua latou fa’atauanau mai,  “Talosaga mai mo nei avanoa lelei e tautua ai fo’i i lea vaega o le Malo tele ma avea ai oe o se tasi o le aufaigaluega fa’alotoifale a le Malo Tele, o lo’o galulue i o tatou laufanua ma tautuaina o tatou tagatanuu ma e uma e femalaga’i i le va o Amerika Samoa ma isi atunuu uma i fafo.”

Ua fa’ailoa mai fo’i, “O lo ua ofoina atu mo le tagata faigaluega i le TSA totogi lelei ma ua mae’a tuufa’atasia i ai ma ni penefiti ma e fetuuna’i fo’i lava taimi faigaluega ina ia fa’afiafiaina fo’i le aufaigaluega e fa’atino o latou tiute i taimi uma. O le sao o i latou e mautu atili ai le saogalemu o feoa’iga i le ea a le mamalu lautele o lo’o femalaga’i i le va o Amerika ma isi uma atunuu. Ia filifili toto’a ma filifili tatau, fa’atasi i se aufaigaluega e mataala ma e fa’atino leleia o latou tiute mo le puipuiga o le saogalemu o tatou Malaeva’alele ma fela’ua’iga o uta ma femalaga’iga o tagata lautele.”

O lo ua i ai fo’i le avanoa o le TSA e fa’aalia ai a latou galuega ma tima’iga fo’i ina ia amana’ia e le mamalu o e agavaa ona talosaga mo galuega i le latou fo’i tautua i le fa’alauiloaga o avanoa faigaluega eseese a matagaluega eseese a le Malo tele lea na faia i le aso ananafi i le lotoa a le Ofisa Va’ai Tau i Tafuna, mai le itula e 9:00 se’ia oo i le itula e 1:00 i le aoauli.

Ua fa’ailoa mai o agava’a o lo’o ua mataituina mo i latou e talosaga, e tatau ona avea oe o se sitiseni poo se Nesionale o Amerika, lea e fa’amauina ai sa e soifua a’e i Amerika Samoa poo se isi lava setete o Amerika.

E tatau ona 18 tausaga le matua ma ua mae’a umia lou fa’ailoga Tipiloma mai A’oga Maualuluga poo le tusi pasi o le GED.

O lo ua moomia lava i latou sa mua’i tautua i le Malo tele i ala ana vaega au, ae ua avea nei ma Vetereni. O i latou o le a galulue i le TSA i Pago Pago nei, o sui i latou o le aufaigaluega a le Malo Tele ma e faia lou siakiga mai le matagaluega o le Puipuiga o le Saogalemu fa’alotoifale i tulaga o le tagofia o fuala’au fa’asaina ma vaila’au o’ona, ae maise ai o le tulaga o au soligatulafono mai le vasega o Fa’amasinoga. E faia fo’i lau suesuega tau le soifua maloloina lelei pe afai o le a moomia oe e te faigaluega.

O penefiti ua tapena e tutusa lelei ma isi uma aufaigaluega a le Malo tele, ua tapena le inisiua o le soifua faapea le soifua maloloina, e tele fo’i avanoa e fa’atino ai aoaoga faapitoa mo sui uma e talia talosaga e faigaluega. Ua le moomia fo’i se isi ou silafia mai o tulafono ma aiaiga fa’aletulafono e mafai ai ona talia lau talosaga i nei avanoa.

Pe afai o le a mae’a le 6 masina o e galue fa’amaoni pea i le TSA, e siitia ai fo’i lou totogi ma o le a fesuia’ia fo’i sifi ma maua isi avanoa e fa’atele ai itula faigaluega ovataimi lea e totogia mo itula ma le afa.

MALAGA A LE FIJI AIRWAYS - SAMOA I HONOLULU

Ua amata nei ona fa’aulu atu avanoa e faimalaga ai nisi mai Samoa i Honolulu i le va’alele a le Fiji Airways mai Fiti. Ua fa’atulaga mai avanoa i luga o le latou Uepesite mo le mamalu lautele e fia faimalaga ai.

I se lipoti a le nusipepa o le Samoa Observer i Apia, ua fa’ailoa ai e le Minisita o Femalaga’iga i le Ea, Olo Fiti Va’ai, “Ua mae’a toina mai le fa’atagaga a le Malo tele i lea faigamalaga e mafai ona fa’atino.”

Ua fa’ailoa fo’i, “O le a amatalia lea auaunaga a le Fiji Airways ia Aukuso 26, 2022, aua ua mae’a uma ona pasia va’alele ma aiaiga uma e tatau ona faia e le Kamupani Va’alele a Fiti e agava’a ai ona tulaueleele ma femalaga’i i le va o Samoa ma Honolulu.”

Ua faailoa mai fo’i i Samoa, o lea ua mae’a fa’atulaga mai le Virgin Australia a latou femalaga’iga e tautuaina le va o Samoa ma Ausetalia ma le va ma Niu Sila ina ua tatala nei femalaga’iga fa’avaomalo a Samoa ma isi malo uma ia Aukuso 01, 2022.

Ua tatalia nei le fa’amautu a’ia’i mai o nei feagaiga ua mae’a fa’atulaga i se aso lava o le masina nei.

O lona uiga o le Quantas, Virgin Australia, Air new Zealand, ma le Fiji Airways lea ua saunia e tautuaina le tele o le femalaga’i i le va o Samoa, Ausetalia ma Niu Sila, faapea ma Fiti ma Honolulu i le taimi nei, ua motusia uma femalaga’iga a le Samoan Airways mo nei atunuu tetele uma, aua ua le toe i ai se va’alele tele e gafatia nei femalaga’iga i le taimi nei.

Ua tumau nei le tautua a le Samoa Airways ma le Talofa Airways na’o le va o Pago Pago ma Samoa, ae le’i mautu mai fo’i se malaga mo Tonga ma nisi malo uma fa’aatumotu o le pasefika.