TALA I VAIFANUA

Pago Pago - AMERIKA SAMOA

TUPULAGA MO A TAEAO - DHR AMATA FATUFATU LE FANAU I LE TAIMI NEI:

I le aso Fafaile na te’a nei sa amatalia ai le polokalama sa tapena e le Matagaluega o tagata faigaluega a le Malo e tofu sao uma i ai fanau o lo’o fa’afaigaluega i le tu’uaga umi o a’oga i le tele o matagaluega o le Malo, Ofisa eseese ma Kamupani tumaoti i totonu o le atunuu.

Sa vala’aulia fa’apitoa le susuga Rev. Alapi mai le EFKS i Tafuna na te ta’ita’ia lea fa’amoemoe i se tatalo ma se upu fa’amalosi. O lea sa ia siitia mai ai le fa’atonuga a le Atua na fa’ao’o mai ia Noa, ina ia fausia se va’a, ma aumai uma lava le fausaga o le va’a i lea avea’i. O le fa’amoemoe sa i ai o le Atua ia fa’asaoina ona tagata mai le lolo, peita’i, ua emo ane le ata fa’ai’u o lea taumafaiga, ua na’o Noa ma lona aiga na fa’asaoina mai le lolo tele i le lalolagi.

“O le tatou folauga lea ua tau fa’ai’ui’u lenei vaitau, ae ua manatu ta’ita’i ina ia so’o le fau ma le fau i le folauga o lumana’i. O le taimi nei lava e amata tapena ai le fanau mo le lumana’i. Lea ua tatou aleaga ai fa’apenei i le aso, se tau va’ai poo fea tonu o i ai le fa’amoemoe mo le folauga i le lumana’i.”

Ina ua mae’a le sauniga e tatala ai le fa’amoemoe maualuga sa fa’agasolo loa le polokalama fa’ataoto o le aso e afua lea i le ava usu na tapena e le fanau a’oga o loo fa’afaigaluega e le DHR a le Malo ma sa matagofie le avana latou tapena ma muamua fo’i tapa ipu le susuga le Ao Fa’alupega ma fa’asolo ai i vasega o fa’atonu sa auai ae moto le ‘ava i le sui fa’atonu o le Matagaluega o Tagata Faigaluega a le Malo, Fa’agau Steven Lefiti, o i latou o lo’o lalamua i lenei fa’atofala’iga.

O le tausala sa ia palua le ‘ava o le tamaitai lea o Malaefono Kaleopa ae agaia le ‘ava e taulele’a uma o lo’o faigaluega ai i le SYEP i le DHR.

Ona alo faiva loa lea i fa’afiafiaga fa’asamoa, sa mua fo’i le sao o le aufaigaluega a le DHR e pei ona fa’atulaga ai, ina ua mae’a le ava usu. O Mauluulu a teine, soso’o ma tama ae mulimuli ina latou sisiva fa’atasi. Mae’a loa lea tula’i loa le susuga Maugaotega e na te fa’atautaia ta’aloga Samoa, ma sa amata mai lava i le lalaga o le mailo. Ua iloga e to’atele nisi e le’i iloa lava lalaga le ma’ilo e tautu mai ai mea’ai pe a fai ua leai ni ipu mafolafola.

Uma lena soso’o ma le fofo’e o fa’i, ua feololo lava le to’atele e iloa faia lea fe’au fa’asamoa ae sa fa’amaumauina lava togi o e na muamua mae’a fa’atino latou fe’au ia ma ua sa’o lelei ona fa’atino.

Uma le fofo’ega o fa’i ma le o’aina o popo, Oka sa to’atele paga ma ua iloga fo’i o lo’o tumau le atamai lea i alo alii o le atunuu. Vave lava le o’a popo a le fanau o lo’o to’aga latou aiga e fa’apulou le suavai aua le sua taute a latou matai ma faife’au i taeao taitasi o Aso Sa.

O le tu’uga taga sa soso’o ai, ma ua va’aia le ese o nei ituaiga o tu’uga, tasi le isi a le tagata ae afa le malae tutu’u ai. O le tosoga maea i le va o ‘au e fitu sa fa’atulaga i lanu eseese, o le pa’epa’e, efuefu, samasama, lanumoana, lanumeamata, lanu moli ma le lanu uliuli.

E lei faigofie lea tauvaga ae na fa’amalieina le maimoa a le to’atele ona o le faigata ona maua o le manumalo i nisi o tosoga sa mata’ina ae maise lava ina ua fetaui ‘au malolosi sa mua’i manumalo. E ivi tele le vaega lea o ta’aloga sa fa’atautaia.

Ina ua mae’a mai ta’aloga sa fa’aauau loa ona faia fa’afiafiaga a nisi o matagaluega o lo’o to’atele i ai fanau o faigauega ai i le tu’uaga o a’oga.

O se tasi o nei vaega o le DYWA i Pago Pago ma le DYWA i Tafuna, sosoo lea ma le faafiafiaga a le aufaigaluega SYEP a le ASTCA. O Siva Mauluulu sa fa’atulaga ma ua iloga le talenia o fanau i lea fo’i agaifanua a le atunuu. Matagofie fo’i le tula’i mai o fa’afiafiaga a le ASTCA ma ua iloga ai le to’atele fo’i o fanau o lo’o fa’afaigalega fa’amasani i faiva uma o tautuaina ai le mamalu lautele e le tatou matagaluega o feso’ota’iga a le tatou Malo.

O le au faafiafia ma i latou o lo’o faigaluega i le matagaluega o Tagata Faigaluega a le Malo na latou toe taualugaina foi fa’afiafiaga uma mo le vasega o fanau uma o lo’o faafaigaluega i le taumafanafana e toa 1,000 lelei i latou i lenei tausaga.

O se aso matagofie lea fo’i aso fesilafa’i mo le fanau uma, peita’i e mautinoa e le’i tofusia i latou uma ma tofu sao i mea na fa’atulaga e ta’a’alo ai ma fa’amasani. ai le tupulaga. Ua iloga fo’i ua aoga lea aso i le to’atele e fetaui ai ma fa’amasani i ala ua latou fiafia i ai, e ese mai ta’aloga na fa’atino ma fa’afiafiaga.

E le ‘asa se faiva ma le maumau, ua iloga na aoga fo’i lenei fa’atofala’iga sa tapena e le DHR a le Malo, e fa’amasani ma fefa’auoa’i ai le fanau talavou, le lumana’i o le tatou nei malo.

TATALA OFISA AUTU FOU O LE ECE I LE LIMA STREET - PAKA LIONA:

I le taeao o le aso Lulu na te’a nei sa potopoto ai le faigamalo i le Lima Street mo le tatalaina aloaia o le Ofisa Autu fou o le ECE poo le Early Childhood Education, ma o se tasi fo’i lea o galuega sa fuafua ma ua fa’atuina e le faigamalo fou lea e tula’i nei a Lemanu /Talauega.

O le Ofisa lea sa mua’i fa’atuina ma fa’agaoioia mai uma latou galuega i le Ofisa autu i Utulei, lea e fa’aigoaina o le Iutita Savali ECE Head Start, ma ua fa’atulaga ina ia amatalia ai ona a’oa’oina ma fa’amasani le fanauiti ia fiafia e a’o’oga ae o ese mai le malu o latou fale ma le puipuiga a matua i le li’o o le latou lotoifale.

“O le aso lenei o le aso o le agaga faafetai ae o tatou fa’agasolo o tautua eseese ua tatou maua mai le alofa o le Atua,ma mea uma ua mafai ona tatou faia ma fa’atino ona o lona mataisau ma lona poto saili, lea ua tatou gafatia se tasi o mea na faatulaga ia mafai ona fa’atino i le tatou nei nofoaiga. Ia lelei le nofoaga e mafai ai ona fa’atino le tautuaina o fanau faia’e o le atunuu. O le mea lena ua amata fuafua ai le tautuaina o tatou tagata, ia fa’aleleia le tulaga e fa’atino ai tiute o le aufaigaluega ma i tatou o e fa’aaogaina le auaunaga lenei.” O le amataga lea o le tautalaga fa’apitoa a le afioga Kovana Lemanu PS Mauga i le aso o lea fa’amoemoe ua mae’a fa’atino.

“O le amataga o le soifua fa’afailele o le fanau i aoaoga, poo le taimi fo’i ua amata fatufatu ai le atamai i o latou mafaufau ma’ale’ale o le taimi tonu lea e sili ona uiga i lona soifua tuputupu a’e, aua o isi mea uma e mulimuli mai i lona soifua aoaoina, e na’o na fa’apipi’i atu lava i ai, ae ua mae’amautu le amataga poo le fa’avae lelei ona fausia.”

“O le ofisa autu lenei o le ECE sa fa’akonekarateina lea i le Kamupani a le Nana’s Construction ma o loo ua tula’i nei le fale tele lea e tusa ma le 12,521 sikuea futu lona fa’avae. O lo ua mae’a fa’atulaga ai le potu mo le siakiga o nifo o le fanau, i ai ma le potu o talavai masani a le fanau e siakia ai lo latou soifua maloloina, potu a’oga, e i ai le potu fono e i ai fo’i le potu ua fa’atula’ia ai na’o masini komipiuta mo le fanau e fa’atautaia ai latou vasega, ua i ai le umukuka, ua fa’atulaga foi le potu tele ua fa’aavanoa lelei mo le fa’atautaiga o le lesitala o fanauiti ma le potu o le teutupe a le polokalama.

O le tau o le galuega lea e tusa ma le $2.5miliona ma ua fa’atupeina lea e le Matagaluega o Aoga, mai le latou saoga o le ARPA. O le tusi pasi na tapena e le matagaluega o Galuega Lautele a le Malo, sa taua’aoina sa’o lava e le tamaitai fa’atonu Faleosina Faiai Voigt i le susuga le fa’atonu o A’oga Talauega Dr Samasoni Asaeli.

“Ou te fa’afetaia le to’atele o le vasega o faia’oga ua mafai ona latou tausailia o latou fa’ailoga e avea ai ma faia’oga i nei vasega tau amata o aoaoga a le fanau. Aua o outou ua matua atu i ai le matagaluega o a’oga ma le vasega o matua, e fa’aauau ona outou faia le galuega o le ta’ita’itama i fanau fa’ato’a taumafai e tu’ua aiga e ulufale i potu a’oga e fa’aauau le taumafai i a’oa’oga. E le faigofie pe afai o le a le ia te oe le alofa tele fa’amatua i le fanau, aua e faigata ona so’o le fau ma le fau i agaga o le fanau, e le’i tu’ua muamua e i latou o latou matua, ae aga atu i aoaoga.”

“Fa’afetai tele mo la outou pito la’au, e fa’amoemoe le tatou malo i ate outou e gafatia ona outou faia lea tiute ma fa’afiafia loto i le fanau ina ia aga’i atu e a’oa’oina lelei i potu a’oga.”

“O la outou galuega o le so’otaga lea o le tatou atunuu ma le taumafaiga ia amata fafau mai ni agaga laiti ina ia latou fa’ataua le soifua a’oa’oina, o fua o a outou galuega e fa’ato’a va’aia pea oo ina mae’a aoaoga ma ua toe taliu mai fanau ma tusi pasi maualuluga ua avea ma foma’i, loia, auauna a le Atua i so’o se fata faitaulaga, o Inisinia, o tagata ua agava’a i masini fa’atekonolosi o lenei vaitau ma le lumana’i, o nisi ua agava’a e toe fa’afo’i le tautua i o tatou tagata. Fa’afetai i la outou auaunaga ma lo outou sao i si o tatou atunuu.” O se toe upu lea a le Kovana e tusa o lea fo’i taeao iloga i le atunuu ma lona fa’amoemoe e amata fatufatu le tamatiti o a taeao i le taimi nei lava, a’o itiiti i latou.