Nofovaavaaia le Tina i lona faaoolima i lona to’alua

Pago Pago - AMERIKA SAMOA

E 5 tausaga lea ua faanofovaavaaia ai e le Fa’amasinoga Maualuga se Tina e 35 tausaga le matua, ina ua faamaonia tu’uaiga o lona faaoolima lea i lona to’alua i le tausaga na te’a nei, atoa ai ma lona fealua’i ma se agaese i totonu o le fale e faafefe ai lona to’alua. 

E ui e leai se tasi na manu’a pe na aafia i le agaese na fealua’i ma le Tina ua nofosala nei, peita’i o se tasi lenei o mataupu e tulaga ese fo’i mai le tele o mataupu e tofu atu i luma o le Fa’amasinoga, faasaga lea i se Tina e molia ma faa falepuipui i lona faia o ni sauaga i lona to’alua.

Talu mai le masina o Oketopa o le tausaga na te’a nei na taofia faapagota ai e Leoleo le Tina na a’afia, sa taofia pea o ia i le Toese i Tafuna e le’i mafai ona tatalaina i tua, ina ua le mafai ona totogi le tupe e $10,000 na fa’atulaga e le Fa’amasinoga e tatala ai o ia i tua ao faagasolo ai taualumaga o lana mataupu. 

O le vaiaso nei na tula’i ai le ua molia i luma o le Fa’amasinoga mo le tuuina atu o lana faasalaga, i le mae’a ai lea ona ta’usala o ia i le moliga o le faaoolima i le tulaga lua e aofia ai sauaga i totonu o le aiga.  

E 3 moliga na ulua’i tu’uaia ai e le malo le ua molia. O ia moliga e aofia ai le faaoolima i le tulaga 2, o le vaega D o solitulafono mamafa, lea e faasala ai se tasi i le Toese mo le umi e oo atu i le lima tausaga, poo le faasala foi i le salatupe e oo atu i le $5,000, poo le faasala foi i faasalaga uma ia e 2; atoa ai moliaga mama e 2 o le faatupu vevesi i totonu o lona aiga faapea ai ma le faaleaga meatotino i le tulaga 3, o le vaega A lea o solitulafono mama, lea e mafai ona faasala ai se tasi i le Toese mo le umi e le silia i le tasi le tausaga, pe faasala i le salatupe e le silia i le $1,000, poo le faasala foi i faasalaga uma ia e 2.

I le tali ioe ai o le Tina ua ta’usala i le moliga e pei ona ia tali ioe ai, sa ia ta’utino ai e faapea, i se taimi o le aso 28 o Oketopa, 2021 i le latou fale i Tafuna, na ia faaoolima ai i lona to’alua, atoa ai ma lona fealua’i ma se agaese i totonu o le fale e faafefe ai lona to’alua. 

Ina ua maua le avanoa o le ua molia e faaleo ai lana faamatalaga, sa ia faatoese ai loa i le Fa’amasinoga e tusa ai o lana solitulafono sa faia, ma ia talosagaina ai se isi avanoa e toe fo’i atu ai i lona aiga e tausi lana fanau ma mafuta atu i lona to’alua. Sa ia faatoese foi i lona to’alua ona o le faalavelave e pei ona tula’i mai i lo la aiga. 

Na taua e le ua molia e faapea, ua aoga le faalavelave na tula’i mai ua ia aoaoina ai se isi lesona aoga i lona olaga. Ao nofo ai i totonu o le Toese mo le silia i le 10 masina, sa ia lagona le misia o lona aiga aemaise lana fanau laiti. O lona manatu, ua avea lona ita ma lona faatamala ma itu ua motusia ai le mafutaga ma lona aiga, ma ua le mafai ai fo’i o na faatino ona tiute faa Tina i totonu o le aiga. 

Na ta’utino atili le ua molia i le Fa’amasinoga e faapea, afai ae maua se isi avanoa mo ia, o le a taumafai e avea o ia ma se Tina e tausisi i tulafono a le malo i taimi uma, na te le toe solia se tulafono pe na te toe faatupuina se vevesi i totonu o le aiga, ae o le a fesoasoani i lona to’alua i le tausiga o le la fanau. 

Na talosaga le Loia Fautua na tula’i mo le Tina ua molia i le Fa’amasinoga mo se faasalaga faanofovaavaaia, e aunoa ma le toe tuliina o nisi masina faaopoopo i le Toese. Na taua e le Loia Fautua e faapea, e le masani le olaga o le Tina talavou ua aafia i lenei ituaiga olaga, o le faatupu vevesi i totonu o lona aiga, peita’i, ua avea lona ita i lea aso ma auala ua tula’i mai ai lenei faalavelave.

E ui fo’i sa ia umia se agaese i le taimi na tula’i mai ai le faalavelave, peita’i o le mea moni, na te lei faaaogaina le agaese e faaoolima ai i lona to’alua, ae sa na o lona fealua’i lava ma uu le agaese e faafefe ai lona to’alua.

E talitonu le Loia Fautua, e agavaa lenei Tina talavou i se faasalaga faanofovaavaaia, atoa ai ma se isi avanoa e toe tuuina atu ia te ia e toe faaleleia ai lona olaga ma mafuta atu ai i si ana fanau.

Na lagolagoina e le Loia a le malo le faafinauga mo se faasalaga faanofovaavaaia. Na taua e le tamaitai loia sa tula’i mo le malo e faapea, o le faamatalaga ua mae’a ona tuuina atu e le ua molia i luma o le Fa’amasinoga, au atagia mai ai lona taliaina o lana gaioiga sa faia, ma ua ia lagona fo’i lona salamo moni e tusa ai o le mea sa tula’i mai i lona aiga. 

Na talosaga le loia a le malo i le Fa’amasinoga mo se faasalaga nofovaavaaia, e aunoa ma le tuuina atu ai o se isi taimi e tuli e le ua molia, a ia usitai i poloaiga uma o le a tuuina atu e le Fa’amasinoga ia te ia.

I le maea ai ona iloilo e le Fa’amasinoga o mau faamaonia uma e faatatau i lenei mataupu, o le ripoti sa tapena e le Ofisa Faanofovaavaaia, faapea ai ma faafinauga a Loia e uiga i lenei mataupu, na manatu ai loa le Fa’amasinoga e talia le talosaga mo se faasalaga faanofovaavaaia.

Na faamanatu e le afioga i le alii Faamasino Sili lagolago ia Elvis P. Patea i le Tina ua molia e faapea, pau le itu taua e fia faailoa e le Fa’amasinoga ia te ia, o le umi e 5 tausaga lea laa faanofovaavaaia ai o ia e le Fa’amasinoga, e le tatau lava ona toe molia mai o ia i lona faia o ni sauaga faasaga i lona to’alua.

Afai ae toe molia mai o ia i lona sauaina o lona to’alua, o le maualuga atu i le vasega e tasi le mamafa o le faasalaga e faasala ai o ia pe afai ae faamaonia ma ta’usala o ia e le Fa’amasinoga.

O nisi o tuutuuga o le faasalaga nofovaavaaia e 5 tausaga a le Tina ua nofosala, o lona tuliina lea o masina e 20 i le Toese i Tafuna e aunoa ma le tatalaina o ia i tua, sei vagana le auina atu i le Falema’i pe afai e ma’i poo se poloaiga fo’i na avatu e le Fa’amasinoga. 

O le a faitau ai ma masina e 9 lea na taofia ai le ua molia i le Toese a o faatali ai se faaiuga o lana mataupu. O le paleni o loo totoe ai i le faasalaga faa falepuipui, o le a taofi lona tuliina, fuafua lava i le usitaia e le ua molia i poloaiga a le Fa’amasinoga. 

E le faatagaina ona ia tagofia le ‘ava malosi poo fualaau faasaina, o le a mafai fo’i ona suesueina lona tino i soo se taimi ina ia faamaonia ai, o loo ia. usitaia le poloaiga lea a le Fa’amasinoga. Afai ae faatonuina o ia e se Leoleo poo se sui o le Ofisa nofovaavaaia mo le faia o le suega i lona tino e saili ai poo ia tagofia le ‘ava malosi poo fualaau faasaina, e le tatau ona ia teena lea faatonuga. 

Ua poloaina foi e le Fa’amasingoa le Tina ua nofosala ina ia auai ma faamaea lelei ni aoaoga o le a faatulaga e le Ofisa o Tautua ma Auaunaga Lautele e fesoasoani ai i le vave o le ita faapea ai auala e foia ai vevesi i totonu o le aiga. 

Na fautuaina e le Faamasinoga le Tina ua nofosala ina ia tausisi i tuutuuga uma ua tuuina atu mo lana faasalaga. Afai ae i ai se taimi e le usitai ai i soo se poloaiga o nei uma poloaiga, e ono avea lea ma auala e faaleaogaina le avanoa ua tuuina atu ia te ia, ae poloaina loa o ia na te tuliina masina o loo faamalumalu i lana faasalaga.