Nofovaavaaia alii e to’alua na ta’usala i le faaoolima i o la taitoalua

Pago Pago - AMERIKA SAMOA

E to’alua ni ali’i ua faasala e le Fa’amasinoga Maualuga i faasalaga nofovaavaaia, ina ua faamaonia tu’uaiga o le faaoolima faasaga i o la taito’alua e pei ona tu’uaia ai i laua e le malo. 

Talu ai le puipuiga o Tina e to’alua o loo aafia i lenei mataupu, o le a le mafai ai e le Samoa News ona faalauiloa suafa o i laua e to’alua ua nofosala i le Fa’amasinoga.

O le isi mataupu na tula’i mai i le afioga i Pago Pago ae o le isi na tula’i mai i Ottoville.

MATAUPU NA TULA’I MAI I OTTOVILLE

E 20 masina lea ua faasala ai e le Fa’amasinoga se Tama e 39 tausaga le matua, ina ua ta’usala o ia i le solitulafono o le faaoolima i le tulaga lua, e mafua mai i le fa’alavelave lea na ia fa’aaoga ai le au u’amea o se pulumu salu fale e faaoo ai manu’a i lona to’alua i le tausaga na te’a nei.

Na ulua’i molia e le malo le alii ua nofosala i le moliga o le faaoolima i le tulaga muamua, o le vaega A o solitulafono mamafa, lea e mafai ona faasala ai se tasi i le Toese mai le 10 e oo atu i le 30 tausaga, poo le faasala foi i le faasalaga e solo atoa i le Falepuipui.

Ae i lalo o le maliliega na sainia e le malo ma le ali’i ua nofosala, lea fo’i na talia e le Fa’amasinoga i le masina o Iuni o le tausaga nei, na tali ioe ai le ua molia i le moliga na toe teuteu e le malo, le solitulafono o le faaoolima i le tulaga 2, o le vaega D o solitulafono mamafa, lea e mafai ona faasala ai se tasi i le Toese mo le umi e le silia i le 5 tausaga, pe faasala foi i le salatupe e le silia i le $5,000, poo le faasala foi i faasalaga uma ia e 2.

I le tali ioe ai o le alii ua nofosala i le moliga e pei ona ta’usala ai o ia e le Fa’amasinoga, na ia ta’utino ai e faapea, i se taimi o le masina o Aperila o le tausaga na te’a nei, na ia faaoolima ai i lona to’alua e ala i lona faaaogaina o le ‘au u’amea o le pulumu salu fale ma sasa ai lona ulu ao ‘ona o ia.

Sa ia taua atili e faapea, ina ua mae’a ona ia sasa le uluo lona to’alua i le ‘au o le pulumu, sa ia tago ma toso o ia i totonu o le fale ma toe fasi ai e ala i lona kiki ma ta tu’i ona foliga seia oo ina matapogia lona toalua.

 Na faatoese le ua molia e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i tua e tausi lona aiga aemaise nai ona matua.

Na taua atili e le ua molia le aafia o lona aiga talu mai le faalavelave na tula’i mai, lea ua mafua ai ona manatu lona to’alua e faila lana talosaga i le Fa’amasinoga ina ia aloaia Faa le Tulafono le tete’a o le la ulugali’i.

Na ta’utino le ua molia, ua ia lagona lona salamo e tusa ai o lana solitulafono, ma ua ia sauni fo’i e talia soo se faasalaga e tuuina atu e le Fa’amasinoga ia te ia. Ua ia iloa fo’i, e le mafai e upu ona toe tuu faatasia lo la aiga ua malepe, ona ua filifili lava lona to’alua e faamuta le la ulugali’i.

Na talosaga le loia fautua a le ali’i ua molia i le Fa’amasinoga mo se faasalaga faanofovaavaaia. Na taua e le loia fautua e faapea, ua lagona le salamo o le ua molia e tusa ai o lana solitulafono sa faia, ua ia a’oa’oina fo’i se lesona taua talu mai le taimi na taofia ai o ia i le Toese.

I le mae’a ai ona iloilo e le Fa’amasinoga o mau faamaonia o lenei mataupu, atoa ai ma faafinauga a Loia, faapea ai fo’i ma le talosaga a le ali’i ua molia, na manatu ai le Fa’amasinoga e talia le fautuaga mo se faasalaga faanofovaavaaia. 

E 5 tausaga i le toese i Tafuna na manatu le Fa’amasinoga e faasala ai le ua molia, peita’i ua faamalumalu le tuliina o lea faasalaga a nofovaavaaia ai o ia mo le 5 tausaga i lalo o tuutuuga e ao ona ia usita’i i ai.

O nisi o ia tuutuuga e aofia ai lona tuli o masina e 20 i le Toese i Tafuna e aunoa ma le tatalaina o ia i tua, e le faatagaina ona ia toe tagofia le ‘ava malosi poo fualaau faasaina, a ia avea o ia ma tagatanu’u lelei e tausisi i tulafono uma a le malo.

A o tuli ai lana faasalaga i le Toese i Tafuna, e le mafai ona avea le ua molia ma se tasi e Faatuatuaina e Leoleo (trustee), o le a mafai fo’i ona talia se talosaga e faataga ai le tatala o ia i tua e faigaluega ao tuli ai lana faasalaga.

MATAUPU NA TULA’I MAI I PAGO PAGO

E 24 masina lea ua faasala ai e le Faamasinoga Maualuga se ali’i e 41 tausaga le matua mai Pago Pago, ina ua faamaonia le moliga o le faaoolima i le tulaga 3 e pei ona tu’uaia ai o ia e le malo.

E 2 tagi na faila e le malo faasaga i le alii mai Pago Pago. I le tagi muamua, na tu’uaia ai e le malo le ali’i ua molia i le solitulafono o le faaoolima i le tulaga tolu e aofia ai sauaga i totonu o aiga, atoa ai ma le faatupu vevesi i totonu o lona aiga, o solitulafono mama o le vaega A. 

I lalo o le maliliega na sainia e le ua molia ma le malo, na ia tali ioe ai i le moliga o le faaoolima i le tulaga tolu e aofia ai sauaga i totonu o aiga, ae solofua e le Faamasinoga le moliga na totoe ai.

I le tali ioe ai o le alii ua molia, sa ia ta’utino ai e faapea, i se taimi o le masina o Setema o le tausaga na te’a nei, na ia faaoolima ai lona to’alua e ala i lona kiki ma tu’i ona foliga ma lona papatua, ina ua ia masalosalo o loo fai se faanunumi a lona to’alua ma le isi tamaloa. 

O le tagi lona lua a le malo faasaga i le alii ua molia, na alia’e mai i le masina o Oketopa o le tausaga na te’a nei, na ia toe faaoolima ai fo’i i lona to’alua e ala i lona kiki ma ta tu’i ona foliga.

I le ta’usala ai o le ua molia i le solitulafono mama o le faaoolima i le tulaga 3, na ta’utino ai le ua molia e faapea, i se taimi o le masina o Oketopa o le tausaga na te’a nei, na ia fasi ai lona to’alua, ina ua toe tatala atu o ia i tua talu mai le ulua’i mataupu na molia ai o ia e le malo.

Na faatoese le ua molia i le Fa’amasinoga e tusa ai o lana solitulafono, ma ia talosagaina ai se isi avanoa mo ia. Sa ia taua e faapea, talu ai o le ulua’i taimi lea ua aafia ai o ia i le Tulafono, e i ai lona talitonuga e tatau ona tuu atu e le Fa’amasinoga se isi avanoa ia te ia e toe faatonutonu ai lona olaga. 

Na talosaga lana loia fautua i le Fa’amasinoga mo se faasalaga faanofovaavaaia, lea fo’i na lagolago e le Loia a le malo. 

Mo le solitulafono o le faaoolima i le tulaga 3 e pei ona ta’usala ai le ua molia i le tagi muamua a le malo, e 90 lea ua faatonu e le Fa’amasinoga ia e tuli i le Toese i Tafuna, ma totogi le salatupe e $1,000.

O le a faamalumalu lonatuliina o lea faasalaga ae nofovaavaaia o ia mo le 24 masina i lalo o tuutuuga e ao ona ia usita’i i ai. O le a faaaoga aso e 13 na taofia ai o ia i le Toese e fai ma ana faasalaga, ae o le paleni o loo totoe ai o le a faamalumalu lona tuliina.

O le a faamalumalu fo’i e le Fa’amasinoga le $850 o le salatupoe, ae totogi na o le $150.

I le moliga o le faaoolima i le tulaga 3 e pei ona nofosala ai le ua molia, e 90 aso e tuli i le Toese ma le salatupe e $1,000. Ua manatu le Fa’amasinoga e fa’aaoga aso e 12 ia na taofia ai le ua molia i le Toese e fai ma ana faasalaga i lenei mataupu, ae o le paleni o loo totoe ai, o le a faamalumalu lona tuliina. Ua faamalumalu fo’i e le Fa’amasinoga le $850 o le salatupe, se’i vagana ai le $150 e totogi.

Ua manatu le Fa’amasinoga, e nofovaavaaia le ua molia mo le umi e 24 masina, i lalo o tuutuuga, o lona usitai lea i poloaiga uma ua tuuina atu ia te ia.

Ua fautuaina malosi e le Fa’amasinoga le ua molia, ina ia tausi le filemu i totonu o lona aiga ma ia alofa i lana manamea. 

Afai ae toe molia o ia i le faia o sauaga faasaga i lona to’alua i totonu o le 24 masina o lana nofovaavaaia, o le a molia o ia i le solitulafono mamafa, lea e mafai ona faasala ai se tasi i le Toese mo le 5 tausaga, pe faasala i le salatupe e le silia i le $5,000.