TALA I VAIFANUA

Pago Pago - AMERIKA SAMOA

MATAUPU FAIGAMALO AMERIKA SAMOA SA FETAUGA’IA I LE FONO “ATOA O SAMOA”

Ua fa’ailoa e se lipoti na tapena mai e le Ofisa o le Kovana ua amata ai feutaga’iga i le va o Samoa na Lua i a latou fonotaga ua fa’aigoaina nei ‘Atoa o Samoa”, na f’a’ato’a fa’auia mai i feso’ota’iga tau emeli lea fo’i fa’alauiloaga o faamaumauga a le Malo i le fa’aiuga o le vaiaso na te’a nei.

I le vaega o tautua mo le Soifua Maloloina o malo e lua, ua talanoaina ai avanoa e mafai ai ona feso’ita’i i ala fa’ainiteneti, TeleHealth ma fesoasoani tau Health Tech e moomia mo togafitiga o gasegase i malo na lua.

Na toe tautalagia e le Minisita o Samoa le sootaga i le va o tatou matagaluega o le Soifua Maloloina ina ia toe fa’aauau, aua ua tele ona aoga i le galulue fa’atasi ai o ia matagaluega mo le taofiofia o le a’afia o tatou tagatanuu i fa’ama’i pipisi atoa fo’i ma ala e mafai ai ona taofiofia le so’ona a’afia vave o tatou tagata a’o le’i mautu mai ala o togafitiga mo nei fa’ama’i.

I le vaega o Turisi ma tautua e fa’alauiloa ai ina ia siitia atili tupe maua mai lea puna’oa. Ua fa’ailoa atu e Amerika Samoa e mafai ona agava’a fo’i Samoa i le to’atele o turisi e mafai ona mua’i uia mai le teritori ma aga’i atu ai mo tafaoga i Samoa, ona o lo’o sootaga sa’o i le Iunaite Setete le tatou teritori. O Samoa o lo’o aofia o se totino o le Pacific Tourism Organization lea e matele ina latou fa’asalalauina fa’alaua’itele le matagofie o Samoa atoa i atunuu tetele fa’avaomalo e aofia ai Europa, Asia ma Amerika fo’i.

Ua fa’amautu mai e malo e lua, o lo’o i ai le mana’omia i tulaga o tagata o i ai tomai ma agava’a eseese i tatou malo e lua. E moomia ona fa’afaigaluega mai nisi mai atunuu tetele ona o lo’o ua sili atu lo latou agava’a i nisi o matata e le o to’atele nisi o tatou malo o lo ua mae’a a’otauina ai. Fa’ailoa e Samoa o lo’o i ai le so’otaga a le Labot Mobility Agreement ua mae’a sainia i le va o Samoa ma Niu Sila ma Ausetalia lea e maua ai avanoa lelei mo aoaoga fa’apitoa mo talavou a Samoa e fia a’otauina i agava’a ma tomai fa’apitoa nei. Ua maua ai fo’i avanoa e faigaluega ai nisi o alo o Samoa i atunuu tetele nei, ia fa’amasani i galuega ma iloa ai faatino tiute tau matata eseese i soo se atunuu ua mae’a avea ma totino o lea fo’i Asosi.

Ua fa’ailoa mai le Samoa Maritime Academy lea e aoao lelei ai tama fanau i Samoa i kosi tau folauga, Inisiia o va’a folau ma fagotaga, ua mafai fo’i ona fa’aulufale ai nisi o alo o Amerika Samoa i lea a’oga e fa’aauupegaina ai i latou i tomai moomia mo e fagogota ma avea ma Ali’iva’a folau.

Ua matauina e le na’o le teritori o lo’o i ai le tulaga moomia mo Faia’oga, faapea fo’i Tausima’i ma Foma’i mo Matagaluega o A’oga ma Matagaluega o Soifua Maloloina i Samoa na lua.

Ua malilie fo’i Amerika Samoa ina ia latou fesoasoani atu i Samoa i nisi o polokalama o lo’o ua mafai ona fa’aulu i a’oga a le fanauiti mo potu a’oga i Samoa. E mafai lava ona mataituina ai le fa’aaogaina fo’i i aoaoga i Samoa. O metotia ia e mafai ona fausia lelei ai polokalama fa’atulaga mo a’oa’oga a le fanau, ae maise lava i le amataga mai o le soifua a’oa’oina o fanauiti.

Ua malilie mai Samoa e latou te ofoina mai aoaoga fa’apitoa mo Folauga i le sami ma Ave va’alele.

I le tulaga o feso’ota’iga ua malilie Amerika Samoa ina ia latou taumafai e fa’aoo atu tautua a le Hawaiki Cable i isi malo o tulata mai i le teritori  e aofia ai Samoa ma Tonga, ona o le taimi na a’afia ai Tonga i le Mafuie ma le Tsunami sa na’o Amerika Samoa na mafai ona tu atu mo fa’asalalauga vave ma feso’ota’iga ma lea malo. O lea ua manatu ai Amerika Samoa o le a latou taumafai e fa’ataoto atu lea tautua a le Hawaiki Cable i nisi malo uma o le Pasefika.

Ua faalauiloa mai fo’i e Samoa le galuega tumati’e ua fa’atino nei e le Scientific Research Organization of Samoa SROS lea ua mafai ai ona latou gaosia le Uisiki, falaoamata o ituaiga eseese, vaila’au fa’amama lima, ma isi oloa sa taulimaina mo se tofo a tagata o Amerika Samoa.

Na talanoaina fo’i auala lelei e mafai ona fa’amautu ai le toe fa’afo’ia atu o nisi o nofosala ma ta’usalaina i Amerika Samoa i Samoa pe mai Samoa i Amerika Samoa fo’i. Ua fa’amautu fo’i se pemita e fesoasoani tele i le vasega o tagata femalaga’i mo pisinisi i le va o Malo e lua. O le pemita 14 aso ua toe aiaia nei ina ia fa’amautu atili a’o le’i fa’aaogaina mo e malaga mai mo fa’atauga ma toe fo’i vave fa’apea ma e fia ulufale mai mo fa’alvelave ma toe fo’i.

Ua fa’amautu fo’i aiaiga mo e malaga mai e faigaluega mo Kamupani iinei lea e fa’aaogaina mo le Kamupani I’a a le Star Kist, atoa ai ma feutaga’iga Tau Le Gagana Samoa i le va o Malo e lua.

O lo ua talanoaina fo’i le fa’aleleia atili o tautua feso’ota’i a Matagaluega o Uafu ma Malaeva’alele i malo e lua, ae maise lava i le fa’atulagaga o malaga ta’i vaiaso mai Samoa a le “MV Lady Naomi”.

Ua talosagaina mai e Samoa ina ia va’ai mamao Amerika Samoa i se latou sui e tatau ona usufono ma auai i fonotaga a le Pacific Islands Forum, lea e le mafai ai ona i ai se leo o Amerika Samoa e fa’afinaua ai mataupu tau suiga o le tau ma isi uma lava mataupu e mafai ona aoga mo le teritori ona o a’afiaga fa’atas ma isi malo uma i le atuvasa.

MANATUA LE SAO O FITAFITA TUAI I LE TAUA I KOREA - 07-27-1953

O le afioga le Faipule o Amerika Samoa i le Konekeresi Uifa’atali Aumua Amata sa ia fa’ailoa mai lona agaga fa’afetai i le tautua a le vasega o Vetereni ma Fitafita Samoa uma sa tautua mai le tafa o taua i Korea, lea ua fa’amauina loa aso fa’apitoa e taualoa ai i le Iunaite Setete atoa ia Iulai 27 i tausaga ta’itasi.

O le taumafaiga lea sa matua tinou ai se tasi o tamaitai mai Korea lona tupuaga ae o le sui na soifua a’e i eleele o Amerika, Hannah Kim, lea fo’i sa matua ia malaga mai ai i le tatou nei teriori i le 2019, e tausailia o tatou Vetereni uma sa tautua ma fa’atoino tiute fa’afitafita o taua i le vaitau o Iuni - Iulai 1953. 

O le taua lea ua fa’aigoaina o le Armistice Day 07-27 Korean War i tausaga taitasi, ma sa sainia ia aloa’ia ma taualoa e le Iunaite Setete.

“O le taimi lenei e tatau ai ia latou uma o soifua i eleele o le Iunaite Setete ma ona teritori uma ona fa’afetaia fo’i le sao o tatou fitafita o taua i lena vaitau. I le latou tautua toto ma le tautua tuavae, sa latou fa’atinoa i nei vaitau. E to’atele fo’i nisi sa masoe ai ma maumau le soifua talavou i lea taua, o i latou ia ua avea o se taui sili ona maualuga ua avea ona o le tautua fa’afitafita i tafa o vevesi. Fa’afetai mo la outou auaunaga ua o’oo’o ma ua fa’amauina le taua i lo outou ola ua maumau.” 

“O nisi ua a’e manumalo faiva mai tafa o lenei taua, fa’afetai i le Atua ua mafai ona toe mafuta ma aiga pele ma mamae, o lo outou fo’i sao e le fa’agaloina ae fa’afetaia pea. Ia le galo ia i matou la outou fitaituga ina ia nofo filemu atunuu o feso’ota’i fa’avaomalo ma le Malo tele. O se sao taua lea mo le Malo o Amerika mai o tatou tagatanuu o Amerika Samoa ma le tatou faigamalo,” o se tala lea a Uifa’atali. 

“Ia tatou manatua pea tagata uma o lo’o nonofo i Korea i Matu i a taotu talosaga, ina ia suia e le Atua e ona le mana tele o latou loto ma ia tausia pea le filemu e sopoia ai ni tausaga e tele a’o tatou nonofo lelei pea fa’avaomalo.” 

“O le saogalemu ua tatou aeae ai nei, ua afua mai le tautua matavela a tatou Vetereni o taua, ma lenei fo’i vaitau i le soifua tautua o tatou fitafita tiute i lenei vaitau. Tau ina ia alofagia e le Atua o outou faiva ma ia malutia outou uma i a’ao alofa o le ali’i Fa’aola o Iesu i taimi uma. Ua mautinoa le mea lenei, o le saogalemu pea o le aga’i i luma o le soifuaga o tatou tagata i o tatou eleele ma fafo fo’i, e afua mai le toe va’ai i taimi o vevesi nei ma matau se leleiga na fa’avae mai ai, lea na afua ona to’a le tai i finagalo ma maua ai le saogalemu ua tatou o ola ai nei.” 

AVANOA FAIGALUEGA I ALASKA AVIATION WEATHER UNIT

O lo ua i fanua nei le tamaitai Samoa, Carol Ma’afala Baqui, o se tasi ua amata faigaluega i le Alaska Aviation Weather Unit / Anchorage Volcanic Ash Advisory Center i Anchorage Alasaka ma ua i ai le avanoa e na te fa’alauiloa atu ai i so’o se fanau talavou o lo’o sailia sana galuega e amata a’otauina ai pe afai o le a mana’o ai.

“O nei avanoa o lo’o lisia mai le uepesite e mafai ona e talosaga atu ai pe afai ua mae’a lau a’oga maualuga. E te le fefe fo’i fa’apea e mamao le nofoaga o le a e faigaluega ai, ae o loo i ai lava auala e mafai ona e uia e mafai ai ona fa’aleleia lou atamai i lea galuega i taimi uma. E mafai ona maua le fesoasoani i so’o se mea e te amata atu ai, ma o le a fatufatu ai lou atamai e moomia mo le fa’atinoina o ou tiute i lea galuega,” o se tala lea a Baqui. 

 O le a faia lea fa’atasiga i le Night Hawk i le itula e 4:30 i le afiafi, Aso Lulu Aukuso 03, 2022. E mafai ona fa’atasi atu ai matua ma fanau talavou, ua manatu i ni avanoa e mafai ai ona galulue i ni avanoa faigaluega i le Ofisa Va’ai Tau i Anchorage Alaska. 

Pe afai e te fia auai ma ia mautu nisi o fa’afesili ua mafai ona maua Carol Ma’afala Baqui i le uepesite www.usajobs.gov ma le telefoni mo Carol 733-0938.