TALA I VAIFANUA

Pago Pago - AMERIKA SAMOA

MATAUPU FA’AULU E SAMOA - FONOTAGATA “ATOA O SAMOA”

O lea ua fa’aulu mai ai e Samoa sa latou mataupu i le fonotaga na mae’a nei a le “Atoa o Samoa” e mafai ona latou taumafai e fesoasoani mai i le tulaga o faletupe poo faleteu’oa i le teritori.

Ua silafia e le aumalaga mai Samoa ua faitau vaiaso ona tu’ua lea e le ANZ Amerika Samoa Bank le teritori, ma ua atili ai ona moomia lava nisi faletupe fa’avaomalo mo le atunuu lautele aua fefaataua’iga ina ia fa’afaigofie, fa’atasi ai ma le faigata fo’i ona amata teugatupe a nisi e le o i ai ni pepa nofo mau i le teritori, ae o fefa’ataua’iga e fa’afaigofieina pe a mafai ona fa’aaoga teugatupe fa’avaomalo pe a femalaga’i.

I le ulua’i aso o feutaga’iga a le “Atoa O Samoa” na faailoa mai ai e le Minisita o Tupe a Samoa, Mulipola Anarosa Molioo, “E mafai e Amerika Samoa ma Samoa ona aiaia se maliliega e agatonu ai ona fa’afaigofie o fefa’ataua’iga i lo la’ua va, ma ua fa’apena fo’i ona fa’ataoto lelei se fuafuaga e agatonu  ma faigofie ai ona fa’atupe fefaataua’iga nei.”

Ua mautinoa e le aumalaga mai Samoa le tulaga o lo’o feagai ma tagata e le o nisi na soifua a’e i Amerika Samoa, o nesionale ma Sitiseni o Amerika poo i latou ua mae’a nonofo mau iinei, pe a oo ina manatu e tatala ni teugatupe i faletupe iinei. Peita’i o le mamalu lautele lea o lo’o femalaga’i i le tele o taimi mo fefa’ataua’iga. 

O se mataupu lea ua manatu le Minisita o Tupe o le a fa’aauau pea ona latou talanoaina pe a oo fo’i ina malaga atu le aumalaga a Atoa Samoa ia Setema 2022. “E tatau lava ona utagia lelei se fa’ai’uga mautu mo lea tulaga,” o se isi lea manatu o le tamaitai minisita o tupe a Samoa.

Sa ia fa’ailoa fo’i, o le faigata ona mautu lelei o fefa’ataua’iga ma Amerika Samoa, ona ua fa’afaigata i le aufaipisinisi ona fa’atautaia ni a latou teugatupe i faletupe i le teritori, ma ua le mautu ai latou pisinisi e mafai ona tatala ma tautuaina ai le mamalu lautele i Amerika Samoa nei.

“Pe afai e le mafai ona fa’amautuina teugatupe a le tele o pisinisi iinei, ua le faigofie pea lava ona fa’amautu mai fefa’ataua’iga ma Amerika Samoa nei. Ma o le avanoa lelei lenei e mafai ai ona fa’atino lea fo’i tautua mo tagata faipisinisi ma tagata femalaga’i.”

O Samoa e fa ona faletupe ua mae’a fa’atula’ia ai. O le manatu o le tamaitai Minisita, atonu e aoga ona fesoasoani mai i latou i le Teritori e fa’atula’ia ai se tasi o faletupe iinei, ma agaga ina ia maua le auaunaga mo isi sui o lo’o faigata ona tatala teugatupe i le teritori.

Mai le Matagaluega o Fa’ato’aga, Lafumanu ma Faigafaiva lea e Minisita ai le susuga La’auli Leuatea Schmidt, sa ia fa’ailoa ai, “O lo’o ua manatu lava le matou matagaluega ina ia fa’alautele atili ala e fa’aleleia ai le sootaga lenei ma ia aiaia mautu lelei fo’i ala o fefa’ataua’iga o fua o fa’aeleeleaga, Lafumanu ma Faigafaiva i lo tatou va ma le teritori o Amerika Samoa.”

“Pe afai fo’i e moomia e Amerika Samoa se fesoasoani, ua nofosauni lelei le matou fo’i auaunaga e fa’atino so’o se mana’oga i tulaga o fua o fa’aeleeleaga, lafumanu ma faigafaiva. E le o manatu i matou ina ia avea le tautuaina o le atunuu lautele i tulaga o maketi e fa’atauina ai fua o fa’aeleeleaga ae o lo’o matau mai e i latou le tulaga o maketi i fafo ae maise ai Hawaii ma isi setete o Amerika mo a matou oloa gaosi e fia fefa’ataua’i.”

O le ripoti mae’ae’a fo’i e tusa o le latou SROS poo le Fa’alapotopotoga o Suesuega Fa’asaeanisi a Samoa, ua fa’ailoa mai ai i lenei fonotaga le agavaa ua i ai lea itu o le tautua a Samoa, i tulaga o le fa’atinoga o suega o le Covid-19, suega o fuala’au fa’asaina eseese, faia ai suesuega o le DNA, poo le suega o le toto i le tupuaga o le tagata soifua, ma ua gaosia fo’i e i latou le tele o vaila’au fa’amama mo le fa’amamaina o nofoaga ma lima ina ia fa’aititia le a’afia mai siama o fa’ama’i eseese.

FA’AMAUTU TALIMALO SAMOA I LE FONOTAGA “ATOA O SAMOA” - SETEMA 2022

Ua fa’amautu mai nei le isi soso’oga o le fonotaga a le “Atoa O Samoa” o le a fa’aauau lea i Samoa i le amataga foi o le Teuila mo le fa’ailogaina o le 60 tausaga o le malo o Samoa Tuto’atasi. 

I le fonotaga na fa’atautaia nei sa le fa’atagaina ai le mamalu o sui fa’asalalau, peita’i ua na’o le vasega lava o sui fa’asalalau a le KVZK TV na talia i totonu i le fonotaga. Ua na’o le taimi lava na amatalia ai le fonotaga sa fa’ataga ai sui fa’asalalau o le nusipepa ma le Leitio, ona fa’atalosagaina loa lea e tu’ua le fonotaga ina ua amata talanoaina mataupu na fa’atulaga mo le fonotaga.

Peita’i e le’i taofia i fafo le vasega o sui fa’asalalau mai Samoa, le Talamua ma le vaega fa’asalalau na malaga mai a Samoa i le fonotaga.

Ua fa’ailoa mai e nei sui fa’asalalau a Samoa Apulu Lance Polu o le Talamua sa ia fa’ailoa maia ua maea faamauina le igoa o nei fonotaga a Samoa na lua o le Atoa o Samoa.

O le igoa lea sa fa’atula’ia atu e Amerika Samoa ma ua amata fa’aaogaina ai i le fonotaga ma fa’aulutala ai fo’i fa’amaumauga i tusitusiga tapena mo le fonotaga ua mae’a nei.

O mataupu sa talanoaina e aofia ai le tulaga o femalaga’iga i le va o Samoa na lua, ae maise ai lava le le fa’aaogaina o le TalofaPass mo femalaga’iga i le va o Amerika Samoa ma isi atunuu uma lava e aofia ai ma Samoa. O lo ua latou fa’atalosagaina ina ia solofua lea sootaga tau femalagaiga.

Ua toe amatalia ona iloilo le pemita 14 aso ina ia fa’aaogaina e tagata faipisinisi ma fa’alavelave i le va o Samoa na lua. Ua tumau pea fo’i feutaga’iga mo fefa’ataua’iga i le va ma Samoa, ma ua fa’aauau ai talanoaga i oloa e fia fa’atau atu a Samoa i maketi i fafo atu o Amerika Samoa i le Iunaite Setete atoa.

Ua fa’apea fo’i ona taumafai e fa’aulu mai oloa gaosia i le SROS Laboratory ina ia fa’atau atu i maketi eseese i le Iunaite Setete atoa pe afai o le a mae’a fa’auia mai i Amerika Samoa.

Na mafai ona fa’aulu mai ituaiga oloa eseese nei i le fonotaga ina ia fa’aaogaina ma fa’ailoa atu ai ni lapata’iga mai le tatou malo i ala e mafai ai ona fa’aleleia atili nei oloa ma tapena mo le fa’atau atu i maleti i le Iunaite Setete pe a mae’a ona pasia lelei aiaiga uma o oloa e fia fa’atau atu i maketi eseese i Meleke.

O le Uisiki ma Uaina, o le falaoamata mai le ulu, ufi ma talo ua mafai ona fa’ameaalofa mai e Samoa ina ia tofoina fo’i e le tatou malo mo se latou  silafia o oloa o lo’o ua mafai ona latou gaosia nei e fia fa’atau atu.

Ua fa’apea fo’i ona fa’ailoa mai e le susuga le Fa’atonu o le Soifua Maloloina, o lo ua moomia lava ona toe fa’aauau le soo masani a latou Matagaluega e Lua mo feutaga’iga aoga tele i fa’ama’i e lutia ai Samoa na Lua.

TOE AMATALIA TAUTUA TALOFA AIRWAYS I LE VA O SAMOA NA LUA

Ua toe amatalia nei le tautua a le Kamupani Va’alele a le Talofa Airways i le va o Apia ma Maerika Samoa nei. Ua amata ona talia pasese mo femalaga’iga i le va o Samoa na lua i le aso 21 Iulai 2022 ma ua mafai fo’i ona totogia pasese mo femalag’aiga i luga o lana feso’ota’i a le Initeneti.

O lo ua amatalia malaga i le aso Gafuna 25 Iulai, 2022 ma ua fa’apea fo’i ona i ai malaga ua fa’atulaga mo Iulai 26, 2022.

Na soloia uma faigamalaga a le Talofa Airways ina ua lutia Samoa na lua i le fa’ama’i Covid-19 ma ua faailoa mai e le Peresetene o le Talofa Airways Toleafoa Jeffery Hunter, “O le toe amatalia o le tautua lautele a le Talofa Airways e pei lava o lea fa’ato’a toe amata ona fa’atula’ia le pisinisi. E faia a’oa’oga mo tagata faigaluega, toe fa’atulaga le nofoaga e faatautaia mai ai le auaunaga, toe amata ona sailia tagata faigaluega ma fa’ataunuu loa faiva e tatau ona fa’atino mo le tautuaina o e femalaga’i i le va o tatou malo e lua.”

“Na fa’afesiligia lava e le to’atele ua masani femalaga’i i le tatou va’alele poo le a le taimi e toe amatalia ai le auaunaga a le tatou Kamupani Va’alele, ia o lea fo’i ua mae’a tapena le tautua ina ia fa’ataunuu le auaunaga o moomia e le mamalu o Samoa uma e fia malaga i sisifo ma toe taliu mai i aiga.”

O lo ua fa’auia mai fo’i le emeli e mafai ona talosagaina ma totogia ai pasese talofaairways.com peita’i o faigamalaga mo Tonga o le a fa’atautaia mulimuli ae o lo’o taofia pea lava i le taimi nei.