TALA I VAIFANUA

Pago Pago - AMERIKA SAMOA

MAUA FA’ANANA JEROME GREY FAAILOGA TAGATA FATUPESE O LE PASEFIKA

Ua faalauiloa mai e le Pacific Music Awards Trust nisi o sui iloga o le Pasefika ua agava’a mo nisi o fa’ailoga tetele ua maua e i latou fa’ailoga fa’apitoa ua tapena mai e le Manykau Institute of Technology Lifetime Achievement Award, ma ua fa’alauiloa mai ai le suafa o le ali’i fatupese, tusi pese ma usu pese o Fa’anana Jerome Grey.

Ua ofoina mai nei e le Trust le latou fa’amalo ma fa’amanuiaga mo le ali’i pese o Faanana Jerome Grey, “Ona o le tele o lona sao  i le suiga o le soifua o tagata Pasefika e ala i fatuga sa ia tusia ma fatu lea ua afua ai ona fa’amanuiaina o ia i le fa’aailoga faapitoa ua tapena e le ManukauInstitute of Technology Lifetime Award mo le Pacific Music Awards o le 2022.”

“I le taimi la ua tatou fa’aavanoa e fa’atasia ina ia tatou feso’ota’i, tofu sao fa’atasi ma o tatou tagata Pasefika e ala i Pesega, ua tatou fa’afetaia fo’i le avanoa sili ua tatou maua e fa’amanuia ma fa’amalo atu ai i le sao o i latou sa manatunatu ma fatufatu fatuga lelei ma le uiga i o tatou vaitau o soifua fa’atasi ai i le tatou atuvasa.” O se tala lea ua lomia mai le Trust o lo’o una’ia lea fa’aeaga mo atisi musika i le atuvasa.

Ua avea fo’i lea avanoa e fa’alauiloa ai e le Pacific Music Award Trust le latou galuega ua fa’apa’aga nei ma le Creative New Zealand, lea fo’i ua latou saunia le tasi fa’ailoga, le “Creative New Zealand Award.”

E ese mai lea ua i ai fo’i le ofo ua tuuina nai e le Music Producers Guild NZ Aotearoa [MPG] ma le SAE Institute lea ua la’ua ofoina mai le fa’ailloga mo le Best Producer.

E le gata i lea ae ua i ai fo’i le pa’aga ua ofo mai e fesoasoani e saunia le fa’ailoga mo le Tagata Pese Atisi Taito’atasi, lea ua ofo mai e le Arch Angel Records ma le Trust.

FA’ATONU O LE VAEGA FA’AUPUFAI TEMOKALASI AMERIKA SAMOA 

Ua mae’a fono le Komiti Fa’afoe o le Asosi a le Vaega Fa’aupufai a le Temokalasi i Amerika Samoa, ma ua latou filifilia ai le tamaitai talavou o Ms Tiana Trepanier e avea ma latou Fa’atonu Sili i lenei tausaga.

O Trepanier o se tasi na fa’au’u mai Leone High, na ulufale ma fa’apine mai o ia i le Marine Corps i le taimi na tautua ai i le vaega au a le Marine Corp i le maea ai o ana aoaoga maualuluga. E le gata i lea sa sailia fo’i lona Bachelors of Science i le Criminal Justice ma le Master of Science i lea lava mataupu Criminal Justice Administration mai le Iunivesite o Chaminade i Hawaii.

Ua atoa le 10 tausaga o avea Trepaier ma Faia’oga, o se faia’oga i ta’aloga, o se faufautua i fanau a’oga, fa’atasi ai ma le avea ma Pule A’oga mo le Manumalo Academy ma le South Pacific Academy fo’i.

Na faia’oga fo’i o ia i le Criminal Justie i le Argosy University i lona lala sa a’o’oga ai nisi o le tatou atunuu. Ua faia’oga fo’i o ia i lea lava mataupu i le Wayland Baptist University i lona lala i Amerika Samoa nei.

I le taimi nei ua avea nei o ia ma sui e faia Plans & Operations Manager i le Ofisa o le Kovana ma faigaluega fo’i i le Hawaiian Air e na te tautuaina tagata mo a latou fa’afesili e gasolo atu i le Ofisa o lea Kamupani Va’alele.

O ia fo’i o le totino o le Rotaract Club o le Rotary Club i Pago Pago.O le Pule fo’i o le American Samoa Little League mo le ta’aloga Baseball a le fanauiti, ae maise o le sui totino o le Leone High PTA, ma o le sui fo’i o le Workmen’s Compensation Commission a le tatou malo.

“Ina ua avea a’u ma sui totino ua lesita i le Vaega Fa’aupufai a le Temokalasi i le tatou nei Malo, ua ou mautinoa fo’i o latou mataupu ma fuafuaga e fa’aatagia ai fo’i mea ou te fiafia ai e fa’atino. Ua iloga fo’i o tatou sui ua filifilia i lenei vaitau e ta’ita’ia le tatou Malo, ua iloga mai e tele fo’i tautua o loo ua fa’atulaga e i la’ua e tatau ona fa’ataunuu mo le atunuu. Ua la’ua taumafai fo’i ma e a’afia lava o tatou olaga i nei filifiliga ma ni fa’ai’uga uma e feagai ma i la’ua.

Peita’i o mataupu lava e sili ona taua i lo’u sui e pei lava ona taua fo’i i le to’atele o tina faigaluega. O le tulaga soifua maloloina, lelei o aoaoga a le fanau, ia gatusa totogi o tama ma tina i so’o se galuega e latou te fa’atinoa, ia fa’ataua le siomaga ma ia mautu le aia tatau mo au filifiliga a e saoloto e faia ai au filifiliga. O mea uma fo’i ia e lalamua ma taua fo’i i fuafuaga a le Vaega Fa’aupufai a le Temokalasi.” O se fa’amatalaga lea a le tamaitai o Tiana Trepanier e tusa ma lona vala’auina fou.

O le susuga le Taitaifono Patrick Reid, sa ia fa’ailoa mai, “Ou te iloa ua matua taua ma agava’a Ms Tiana Trepanier i lona tofiga fou ua tula’i ai nei mo le Vaega Fa’aupufai a le Temokalasi i Amerika Samoa nei. O ia o se Vetereni, o se tina, o le faia’oga, ma ua avea nei o ia ma se tasi e mafai ona u’una’ia le fuafuaga fa’ataoto a le tatou Vaega Fa’aupufai mo le lumana’i.”

Sa ia fa’amanuia atu fo’i le tofiga fou o le tamaitai ma ua ia avatu le fa’amalo i le Komiti Fa’afoe mo le galuega mae’ae’a sa latou filifilia ai lea sui iloga mo le tofiga na sailia se isi e tula’i mai ai e fa’atino.

TOFIA ARLENE PELE SEWELL AVEA PULE O FA’AMAUMAUGA [CIO] BYU HAWAII

Ua fa’amanuiaina fo’i se tasi o alo o Amerika Samoa, le tamaitai o Arlene Pele Sewell i se tasi o tofiga taua i le Iunivesite o le BYU Hawaii, o le tofiga pule lea i fa’amaumauga po’o le Chief Information Officer [CIO].

O le susuga le ali’i Sui Peresetene o le BYU Hawaii, Kevin Schlag, na ia fa’ailoa maia lea tofiga fou ua filifilia ai le alo o Amerika Samoa ma ua fa’afiafiaina le to’atele e silafia lea tamaitai Samoa ona o lona fa’aeaina ua fa’alauiloa mai. Ua mautinoa ua saunia fo’i lea alo o le atunuu e tautua mai i lona tofiga fou ina ia fa’aauau ai misiona aoga o lo’o feagai ai ma le Iunivesite i le mautinoa o si’itia ma aga’i i luma le a’otauina o fanau i ituaiga kosi eseese o lo’o tausailia ai latou agava’a ma tusi pasi maualuluga.

“O le tamaitai o Arlene Pele Sewell ua fetaui lelei ma le tofiga ua tuuina atu ia te ia na te tau’avea ina ia ta’ita’ia a’oa’oga a le fanau a’oga i toma’i mo’omia ma agava’a e saogalemu ai le latou folauga i le taimi nei ma le lumana’i. Ua tele ona agava’a e mautinoa ai o lona filifilia e avea. ma CIO e mafai ai ona fa’aauau ona a’otau le fanau a’oga i so’o se tekonolosi o ituaiga fa’aonaponei ma le lumana’i. Ua matou sauni ma fiafia e galulue fa’atasi ma Arlene Pele e fa’aauau galuega lelei mo fanau a’oga ma le Iunivesite ia mafai ona fa’ataunuu a latou sini ua mae’a fa’atuina mo lenei fo’i vaitausaga.”

“Ua tofia nei Sewell i lona tofiga CIO ae fa’ato’a amata ona faigaluega ai ia Setema 01, 2022, le amataga o le tausaga fa’aletupe o lumana’i nei.”

Ona o lea ua avea nei Sewell ma CIO ae ua tu’ua ai e ia le tofiga sa faigaluega ai o le Project Manager i le itu lava o faamaumauga poo le Information Technology i le Dixie State University ma ua silia ma le 20 tausga o lona silafia i lea fo’i itu o le tautua IT Management, e aofia fa’atasi ai ma le taimi na tula’i ai fo’i i le tatou Teritori o Amerika Samoa i le Kolisi Tuufa’atasi o Amerika Samoa, Blue Sky Communications ma le Children’s Hospital i San Diego.

Ua fa’ailoa e Arlene Pele, “Ua ou fiafia lava e toe fo’i atu e faigaluega i le BYU Hawaii, ma ua maua ai fo’i le avanoa e mafai ai ona toe fa’afo’i se tautua i o tatou tagata i atumotu ma e ui ina tele mea sa uia mai i lenei taumafaiga ae ua fa’afetaia so’o se la’asaga lava sa uia mai ina ia to’ai taunuu mai i lenei fo’i la’asaga fou e tautua ai.”

Sewell sa soifua i lona afio’aga o Utulei, Amerika Samoa, o ona matua o Elama Pele ma Loretta Tupua. Na muai maua lona fa’ailoga Bachelors i Information Systems mai le BYU Hawaii ma lona Master o Science in Information Systems Security mai le Colorado Technical University.