TALA I VAIFANUA

Pago Pago - AMERIKA SAMOA

3 TOA SAMOA - FA’AAUAU TAUTUA USCOAST GUARD, US AIR FORCE ADACEMY & US NAVY

Fa’atauto Frank Jr Thomsen - US COAST Guard: O le atali’i o Frank Jr Thompsen ua filifili nei e tautua i le US Coast Guard ma o le tautua fo’i lea o lo’o tautua ai lona tama Frank V. Thomsen i le taimi nei. O le atali’i na mafai ona fa’aatauto aloa’ia e le vaseta a le US Coast Guard o lo’o tiute isi ma sui fo’i sa malaga mai le Ofisa Autu i Hawaii, na fa’atautaia lea o le sauniga mamalu ma le ‘aiga fiafia i le DDW Restaurant i Utulei ia Iulai 19, 2022.

“Ou te mafaia mea uma lava i le fa’amalosi mai o Keriso ia te a’u!” Filipi 4:13 Autu lea o le tautalaga matagofie na fofoga i ai le sui mamalu o le US Coast Guard na auai mo lea sauniga. 

O le a malaga o ia i le masina o Aukuso 2022 ina ia ulufale i le USCoast Guard Boot Camp i Cape May, New Jersey. O Frank Jr Thomsen o se tasi o atali’i sa fa’au’u mai le Pacific Horizons High School i le tausaga a’oga ua mae’a atu, 2021-2022.

Cadet Master Sgt Serena Iona - USAir Force Academy i Colorado Springs: I le toe taliu atu o le tamaitai o a’otauina fa’apitoa i tiute fa’ata’ita’i i le USAirforce Academy i Colorado Springs, ua toe fa’atasi atu nei ina ia suia fo’i ona tiute e feagai ai ma lenei taumafanafana. O lana malologa e tolu vaiaso na toe malaga mai ai lava e asiasi mai i si ona Tina ma le Aiga i Amerika Samoa nei. Ma o le aso Toona’i na toe ulufale ai i lana aoga i Colorado ma ua fa’aauau a’oa’oga fa’ata’ita’i ma ua i ai lona tulaga fou o le Cadet Master Sgt ma ua siitia ai fo’i lona tulaga i lenei tausaga. O le fa’amoemoe maualuga o lea Toa Samoa, toe lua tausaga o aoaoga o feagai ai, pe afai e manuia e mafai ona ausia e ia agava’a e avea ai ma 2nd Lieutenant  mo le USAir Force, i le taimi e fa’au’u mai ai.

O nei tiute ua soloa’i atu e faigaluega ai, o tulaga fa’ata’ita’i ia i totonu o le Fuava’alele a le Malo tele, ma e tatau lava ona matua tinu ma filiga i ai, ina ia ausia le fa’amoemoe maualuga ua fa’atulaga mai.

I sana fa’amatalaga, “Ua fa’afetaia le avanoa na toe fo’i atu ai e asiasi i matua ma aiga, poo fea lava e lele i ai le toloa e ma’au atu lava i le vai sa ola a’e ai. Tau ina ia manuia le tatou malo ma nai o tatou tagata, ma ia mau fo’i le tapua’iga a’o taumafai i nei faiva e aoga ai mo se tautua i le lumana’i. Ua toe fafaga mai le malosi i le loto ma le tino ina ua toe va’ai ma mafuta ma nai aiga uma. Fa’afetai le tapua’i, fa’afetai mo talosaga si’itia ia matou manuia.”

O le masina o Aukuso o le a fa’atautaia ai sauniga ma le ‘aiga tele e fa’amau fa’ailoga ai si’itaga ua i ai le taumafaiga a fanau i lea fo’i USAir Force Academy i Colorado Springs.

Seaman Ruth Tuiolemotu Checks Into - USS Constitution:  Mai Boston Massachussects ia Iulai 20, 2022 ua soloa’i ane ai le tamaitai Seaman Ruth Tuiolemotu mai Malaeloa ina ia auai i le auva’a a le “USS Constitution”.

O le va’a lea o le va’a sili ona umi lana tautua i le Fuava’a a le US Navy ma o lo ua pikia lenei Toa o Samoa i le fuava’a e avea ma se tasi o sui e tautua i luga o le va’a sili ona afu lana tautua i le Fuava’a a le US Navy.

O le USS Constitution o le va’a sili ona matua i le lalolagi o va’ata’u ma o lo’o fa’aauau pea lava ona tautua i le Malo tele o Amerika, o se fa’aeaga sili ua maua e Seaman Ruth Tuiolemotu, ina ua avea o ia ma ali’iva’a o lea Va’atau. Tala’aga o le va’a ua faamauina ai lona sao i le Barbary Wars  ma le taua o le 1812, lea sa matua puipuia ai e lenei va’atau le laina o fuava’a mai le 1797 i le 1855.

I taimi o folauga ma galuega e puipuia ai le saogalemu i le lalolagi sa fa’amauina mai ai e ali’iva’a sa tautua mai i luga o le USS Constitution, e folau solo i latou e fa’amautinoa le saogalemu ma le nofo filemu o le tele o malo o le lalolagi lea e silia ma le 6000,000 tagata i le tausaga e molimauina latou galuega lelei, e taumafai ai ona fa’amasani ma fa’ailoa atu i le to’atele o tagatanuu eseese i o latou malo i le lalolagi, e aoga le Fuava’a i so’o se mea ae maise i le tausiga o le nofolelei ma le nofo filemu o atunuu uma o le lalolagi.

Fa’amalo le tautua, fa’amalo le toa i alo uma o Samoa o lo’o tautua mai i nofoaga o vevesi ma tafa o taua., o outou mama na!

5 PASESE MALAGA MAI FA’AMAONIA SUEGA COVID-19

E to’atolu le pasese na malaga mai i le Hawaiian Air i le aso Tofi na te’a na maua ane latou su’ega o le Covid e fa’amaonia le i ai o le verusi Covid-19 i o latou tino. 

Peita’i ua fa’apena fo’i le to’alua o ni sui na malaga mai i le va’a a le “MV Lady Naomi” i le aso Tofi fo’i, ua maua ane e faamaonia fo’i suega mo le Covid-19 sa faia ina ua taunuu mai. O le to’alima lea ua taofia nei e fa’anofo va’ava’aia i le falema’i i le Hangar a le Malaeva’alele i Tafuna.

O le aofai o le pasese a le va’alele na maua ai le to’atolu lea e 236, peita’i o le aofai o le pasese a le va’a MV Lady Naomi na malaga mai Apia i Pago Pago nei na’o le to’a 60 ua fa’atagaina i le taimi nei.

O lo’o ua fa’anofoesea nei le pasese lea ua fa’amauina o i ai le verusi o le Covid-19 mo le lima aso ma e toe faia isi a latou suega pe tumau pea pe ua soloia ae toe fa’aauau i tua i aiga le isi lima aso o le fa’anofoesea.

FONOTAGA A “SAMOA NA LUA” - TALIMALO ASG MA E FAIA I LE KOLISI MAOTA MPH

O lo ua amata gasolo mai i le aso ananafi le au usufono lautogia a Samoa mo le latou ulua’i fonotaga a Samoa na lua, lea sa le toe fa’aauauina ona o le lutia ai o le Usoga i a’afiaga matuia o le Covid-19, talu mai le amataga o le faigamalo fou.

Ua fa’atulaga lenei fonotaga e amatalia i le aso Lulu se’ia pa’ia le aso Faraile ma fa’amae’a ai. O lo ua fa’ailoa mai o le a ta’ita’ia mai lea au usufono a le Malo Tuto’atasi o Samoa e le afioga le Palemia fou Fiame Naomi Mata’afa ma e malaga mai fo’i le Minisita o Fa’ato’aga, Lafu Manu ma Faigafaiva La’auli Leuatea Schimdt, Minisita o Public Enterprises Latiniu Wayne Sooialo, Minisita o Galuega, Feoa’iga ma le Talafatai Olo Fiti Va’ai, Minisita o Tupe Mulipola Anarosa Ale Molioo ma le Minisita o Fa’amasinoga  Valasi Tafito Selesele.

O lo ua fa’ailoa mai o lo’o to’atele fo’i nisi o Pule Sili i Ofisa eseese o le Malo o Samoa o lo’o malaga mai i lea lava ‘au usufono. Ua fa’ailoa mai i se fa’amatalaga mai upega tafa’ilagi a le susuga le Pule o le Aufaigaluega a le Kovana o Amerika Samoa, Tuimavave Tauapai Laupola, “Ua mae’a fa’atulaga le lisi o mataupu e talanoaina i le taimi nei, ma ua nofo sauni fo’i le au usufono a Amerika Samoa e talimalo ma faatino talanoaga i mataupu ua mae’a lisia.”

O lo ua mae’a usuia fo’i le fonotaga a le Kapeneta ina ia talanoaina ai e i latou mea uma e tapena i ai mo talanoaga fa’avaomalo a Samoa na lua, ma o le taimi muamua lenei ua malaga mai ai fo’i le afioga le Tama Aiga i Amerika Samoa talu mai ona fa’atauto ia Aukuso 2021 e avea ma Palemia o le Malo Tuto’atasi o Samoa.

$60,000 MAUA ULUAI POSIVA A FA’ASAO MO LE IUPELI SILIVA

A’o fa’atalitalia le atelega o le toe siva a le Komiti poo le Laulauatofi o le Po Siva a Fa’asao i le afiafi o le aso Faraile i le Hall i Fatuoaiga, ae ua fa’ailoa mai e le tofa Toleafoa Kathryn McCutcheon, “O se tala fa’atusatusa i le tupe ua i ai nei e $57,000. fa’afetai tele lava i le a’ao foa’i ma le agalelei o le mamalu o sui totino uma o le Laumua a Fa’asao ona o le galulue ae maise le mamalu lautele o lo’o ua masi’i mai e sapaia lenei fa’amoemoe.”

O lo ua iloga le matagofie ma ua vave fo’i ona tausaili le vasega o sui Teine Tuai o le Fa’asao ina ia saili a’o lava le taimi, aua o le vaitau lenei i le tausaga a sau, fa’ato’a fa’ataunuu ai lenei fa’amoemoe.

O le fa’amoemoe lea sa fa’atautaia i le afiafi o le aso To’ona’i na te’a nei, ma e iva lelei vaitausaga ua tausaili ai le Asosi a Tamaitai A’oga Tuai a le Fa’asao ina ia amata fa’atulaga ai le fa’amoemoe mo le fa’ailogaina o le latou Iupeli Siliva ia Iulai  20 - 23, 2023.

I le vaitau nei ua tuufa’atasia ai a’oga maualuluga  a le Fa’asao ma Malisi lea e fa’atautaia e le Ekalesia Katoliko Roma i Amerika Samoa poo le Pule’aga Samoa Pago Pago. Ua iloga le fiafia o le vasega o tamaitai a’oga tuai sa auai, ua le toe kea i se mea na’o le talimalo lelei ma alo i fa’afiafiaga ia masa’a atu le tamaoaiga foa’i ma le lima mafola o aiga sa auai ma fa’atumulia ai le latou ulua’i fa’amoemoe.