Fesiligia e Faipule mafua’aga ua faavae ai Ofisa Tumaoti e 2 a le malo

Pago Pago - AMERIKA SAMOA

Ua fesiligia e le Komiti o le Faagaioiga o le Malo a le Maota o Sui le mafua’aga autu ua ala ai ona aveese e le faigamalo a Lemanu ma Talauega nisi o tautua ma auaunaga mai nisi o Matagaluega a le malo, ae faavae ai Ofisa Tumaoti e 2 e pei ona i ai i le taimi nei.

O le vaiaso na te’a nei na faia ai le iloiloga a le Komiti a le Maota o Sui, ma maua ai le avanoa o molimau e to’alua a le malo la te faaleoina nisi o faamatalaga e faatatau i lenei mataupu.

O le Taitai o le Ofisa o le Kovana ia Tuimamave Tauapa’i Lapola ma le Taitai o le Ofisa o Sailiga ma Lavea’i, susuga Faamasino Upuese Galoia na fai ma sui o le malo i le iloiloga, ae taitai e le afioga i le Taitaifono o le Komiti, le afioga i le ali’i Faipule ia Faimealelei Anthony Fu’e Allen.

O lenei iloiloga na faatulaga ina ua fesiligia e nisi o afioga i Faipule le mafua’aga ua aveese mai ai e le malo nisi o Ofisa ae tu’u atu i lalo o ni Vaega Tumaoti.

Mo se faataitaiga, ua aveese mai le Falepuipui i Tafuna atoa ai ma le Falepuipui e Taofia ai Fanau laiti (Juvenile Detention Center), ae tu’u atu i lalo o le Pulega Fou ua taua o le Pulega o le Falepuipui, i lalo o le taitaiga a le Pule fou ia Leone Fai’ai.

O le suiga lona 2 e pei ona fesiligia e afioga i Faipule, o le aveese mai lea o le vaega a le EMS, o le Pulega o Fuimui ma le Marine Patrol ae tu’u atu i lalo o le Pulega Fou ua taua o le Pulega o Sailiga ma Lavea’i, i lalo o le talitaiga a le latou Faatonusili tofia ia Faamasino Upuese Galoia.

Na taua e nisi o Faipule le le sa’o o le faaiuga ua faia, i le aveesea mai lea o auaunaga mo le tali atu i faalavelave faafuase’i i le Ofisa o Leoleo.

Saunoa Lua’itaua Gene Pan e faapea, o le matafaioi lava ia a le Ofisa o Leoleo, latou te tali atu i soo se taimi e tula’i mai ai faalavelave faafuase’i e aafia ai le saogalemu ma le soifua manuia o tagata. 

Sa fesiligia fo’i e le Sui Fofoga Fetalai, afioga Fetu Fetui Jr le mafua’aga ua Tumaoti ai le Pulega a le Falepuipui. Saunoa Fetu, o ia o se tasi na malolo litaea mai i le galuega faa Leoleo, e le mafai ona o eseese le Pulega o le Falepuipui ma le Ofisa o Leoleo.

“Afai ae pu’e faapagota le tagata e Leoleo ona ave lea tu’u i le Falepuipui ma vaavaaia ai lea tagata i lalo o le vaavaaiga a Leoleo o le Toese, ae a sola ese le pagota mai le Toese, e tu’u atu le galuega lena i aao o Leoleo latou te faatinoina. Lona uiga, e galulue faatasi lava lala ia e lua i le faatinoina o le latou galuega,” o le saunoaga lea a Fetu.

I le taimi o le iloiloga i le vaiaso na te’a nei, na faailoa ai e Faimealelei i molimau a le malo e faapea, ua le aapa lava le Komiti a le Maota o Sui e valaaulia Loia poo nisi o le faigamalo e tali i fesili a afioga i Faipule, ae ua filifilia i latou la te tuuina mai ni faamatalaga auiliili e tusa ai o uiga ua tuuina mai.

Saunoa Faimealelei e faapea, e le gata i le to’atele o Faipule ua latou fesiligia lenei faaiuga, ae oo lava foi i tagata lautele ma tagata faigaluega mai Ofisa o loo aafia, ua latou fesiligiaina fo’i lenei suiga faanatinati.

O itu e 3 o lo o atugalu i ai le Fono e pei ona faamanino i faasea ma fesili a le atunu’u, soo se faaiuga lava e le lelei ona fai e mafua mai “e le lelei le Pule”, e le gata i lea, o loo fia manino tagata faigaluega poo ai “le Pulega fou o le a tula’i mai i Ofisa nei”, ae pe faapefea fo’i “ona faatupe totogi o tagata faigaluega”.

Na faailoa atili e Faimealelei i molimau a le malo e faapea, na fai muamua fo’i le suiga lenei i le isi nofoaiga ua mavae atu, ina ua aveese mai le EMS mai lalo o le pulega a le Falema’i o le LBJ ae tu’u atu i lalo o le vaavaaiga a le Ofisa o Leoleo.

O le tulaga na tula’i mai ai e pei ona saunoa Faimealelei, “e le’i solo lelei lea suiga sa faia. E lei atoa se tausaga talu ona faia lea suiga ae vaaia le feteena’i o faaiuga i mea e tutupu mai. E oo lava fo’i i totonu o tagata faigaluega sa fesiligia fo’i i le tele o taimi”.

Saunoa le afioga a Tuimamave e faapea, o le suiga e pei ona faatino e le faigamalo i le taimi nei, e le o se suiga faanatinati pe faavavevave fo’i e pei ona manatu i ai le to’atele, ae o ni suiga ua silia i le 2 tausaga o faataatitia mai e le faigamalo ina ua faatoa tula’i mai i totonu o le ta’ita’iga o le malo. 

Saunoa Tuimamave e faapea, e 2 tausaga o tapena le faigamalo a le afioga i le ali’i Kovana ia Lemanu P. S Mauga ma le Lutena Kovana ia Talauega Eleasalo Ale mo le tau tu’u faatasia o le polokalame e faavae ai lenei suiga lelei ina ia mautinoa e siitia le auaunaga a le malo mo le atunu’u.

Na vaavaai Taitai o le malo, o le tele lava o tiute ma auaunaga o loo pau lava le mamafa i le Ofisa o Leoleo, ae ua manatu, ua tatau ona aveese mai nisi matafaioi ae taula’i le vaai a le Ofisa o Leoleo i le faatinoina o le latou matafaioi i lalo o le tulafono, o le faamalosia lea o le tulafono mo le puipuiga o le saogalemu lautele.

E le gata i lea, e i ai fo’i funds o loo aga’i mai e faatino ai tautua ma auaunaga faapitoa nei, ae o loo alu uma lava le mamafa e faatino ai isi auaunaga faa leoleo, ae afai e tu maoti lava nei tautua faapitoa, ona mafai fo’i lea ona lava le seleni e faatupe ai la latou tautua i le malo. 

I le tulaga o tagata faigaluega, na faamanino e Tuimamave, e leai se tagata faigaluega e aafia lana galuega poo lona totogi fo’i, ae o le a tumau pea i le tulaga lelei o lo o i ai. Pau le suiga o le a i ai, o le a sui le pulega ma le auala e faatino ai faatonuga, ae tumau lava auaunaga ma tautua masani.

Mo le suiga e aveese mai le EMS, Fuimu ma le Marine Patrol mai le Ofisa o Leoleo, o se tasi lea o fuafuaga na taua e Tuimamave ua leva ona talanoa i ai taitai o le malo ma le afioga i le Komesina o Leoleo, ma ua tali sapaia fo’i e le Komesina lenei suiga.

Ua mae’a fo’i ona faia talanoaga a Taitai o le malo ma le Pulega a le EMS ma le Falema’i o le LBJ, e tusa ai o le suiga ua tula’i mai, ma ua malilie uma i ai itu e 2.

Na faaopoopo le susuga a Galoia i le saunoaga a Tuimamave ma ia taua ai e faapea, e le o suia tiute tauave ma matafaioi faatino a tagata faigaluega, pau le itu lea ua manatu le malo e sui, “o le tagata e alu atu ai le faatonuga. O le a le toe sau i le Komesina o Leoleo, ae o le a alu atu faatonuga uma mo tiute tauave i le Faatonusili fou filifilia”.

Na faamatala e le afioga i le Tamaitai Faipule mai le Itumalo o Fofo ia Andra Tereise Samoa le suiga ua faia e le malo, o se suiga faanatinati ma le faatopetope e aunoa ma se mafua’aga tatau. 

Na fesili Samoa pe aisea ua faanatinati ai lenei suiga ao lea ua toe 3 masina mae’a le tausaga tupe tuai lenei, ona ulufale atu fo’i lea o le malo i le tausaga tupe fou 2023, lea e amata i le aso 1 o Oketopa, 2022.

Na faamanino e Tuimamave, e le o se suiga faanatinati, ae o le suiga ua leva ona fuafua mai e taitai o le malo.

I le tulaga o le paketi ma tupe faaalu, o le a tumau pea le auala o loo totogi ai tagata faigaluega a vaega taitasi nei i le tulaga o loo i ai.

O i latou o loo totogi mai i le paketi a le Ofisa o Leoleo atoa ai ma i latou o loo totogi mai i le paketi a le Falema’i o le LBJ. O le taimi loa e amata ai le tausaga tupe fou 2023 pe a pasia le tala o le tupe, ona aumai loa lea o totogi o tagata faigaluega uma nei e faafoe ma faatautaia atu e le pulega fou o Sailiga ma Lavea’i.