TALA I VAIFANUA

Pago Pago - AMERIKA SAMOA

1,000 MAEA LESITALA ILE DHSS P-EPT POLOKALAMA MEA’AI FANAU A’OGA 

E le’i toe fa’atali matua i le lesitalaina o latou fanau sa a’o’oga i le vaitau ua talia nei ona talosagaina atu mo fa’atupega P-EPT i le aso Tofi ua te’a, ma e mae’a ane galuega i le aso Tofi o le vaiaso ua te’a, i le uluai aso na talia ai talosaga i laina feso’ota’i tafa’ilagi sa talia ai talosaga, ua silia latalata i le 1,000 i latou ua mae’a fa’atumu lelei nei talosaga.

Ua iloa ai nei fo’i, o le matua vave lava ona fa’asolo o talosaga nei, e tusa lava pe o le a talia na’o i latou e fa’auia atu talosaga i laina feso’ota’i tafailagi, ua silafia fo’i e le mamalu o le atunuu ona fa’atutumu talosaga fa’auia i le matagaluega o alamanuia mo tagata lautele.

Ua faaulu atu fo’i ma le fa’asea a Matua, ona ua fa’atuai talosaga a nisi ina ua oomi atu le fa’amau e ulufale ai i a latou fanau sa talosagaina muamua, ae ua te’ena mai a latou talosaga. Ua fa’ailoa mai e le Fa’atonu o le DHSS, Muavaefa’atasi John Suisala, “Ua fa’auia atu lea fa’asea i le matou vaega o siakia lea vaega o le polokalama ina ia toe fa’asa’o, ina ia toe ulufale atu matua nei i le laina lea, ua mafai ona fa’atumu a latou talosaga mo le alamanuia lea mo fanau a’oga.”

Ua faailoa ma fa’amanino atili lea tulaga ma ua fa’aloa mai ai suiga nei e ao ina mataituina e matua pe a fa’atumu a latou vaega ia o le talosaga: I latou na mua’i talosaga mai e fa’aaoga ai le DHSS online i le 2021 e oomi le faamau “look me up” ona vave lava lea o le fa’atumuina o latou talosaga a latou fanau mo le vaega lua o lea alamanuia; I latou na lesitala e fa’aaoga ai talosaga pepa tusitusia i le polokalama 2021 e kiliki i le fa’amau “Register” ma fa’aauau ai le latou talosaga lona lua o lea alamanuia mo fanau na lesitala; Afai o lou alo lea e fou fa’ato’a fa’atumu sana talosaga, e tatau ona fa’atumu mai sana talosaga muamua e fa’aaoga ai le faamau “Register”.

Ua faailoa mai ua mae’a fo’i ona matua’i faamama uma faila o lesitala a le ASDOE i lisi ma lesitala o fanau a’oga ina ia mafai ona fa’amauina ai matua ma matua tausi ina ia vave ona pasia lelei le talosaga fa’aulu mo fanau a’oga ma le fa’atuai ai le talosagaina o nei alamanuia.

Ua fa’ailoa mai o le tele lava o Lesitala ua fa’amauina ai suafa muamua o matua ina ia le fa’atuai ona talia mai talosaga a le fanau a’oga.

E tusa ai ma tulafono mo talosaga faapenei e tasi lava le numera saogalemu e mafai ai ona fa’atumu le talosga e tasi, afai la ua i ai se numera saogalemu ua taumafai ona toe fa’atumu ai se isi talosaga fou, e le toe talia e le polokalama se isi talosaga e faaaoga atu ai le numera saogalemu faalua. O lona uiga e fa’aaoga lava le numera saogalemu a le tamatiti mo le talosaga a le tamaititi e toatasi mo lana talosaga.

Peita’i, o lea ua suia nei ma soloia lea tulafono mo le lesitalaina o fanau, ina ia vave fo’i ona fa’atutumu atu talosaga a le fanau uma a le Matua e to’atasi e fa’aaoga ai le saogalemu o le matua. Mo se fesili telefoni 633-7720.

LIPOTI O MEA FA’ALEAGAINA - ASTCA & MATAGALUEGA O MALAEVA’ALELE MA UAFU:

E tusa ai ma le lipoti o mea fa’aleagaina i le malolosi o matagi, galu maualuluga ma le Malolosi i le atunuu, ua mae’a nei ona fa’aulu mai lipoti o mea na fa’aleagaina ma mea ua mae’a ona toe faaleleia a matagaluega nei e lua a le malo, Le pulega o Uafu ma Malaeva’alele fa’apea ma le ASTCA.

Mai le lipoti a le ASTCA ua fa’ailoa ai, ua vave lava ona toe faaleleia mea na fa’aleagaina uma ona o le malolosi o matagi, maualuluga o galu malolosi na sofa’ia le saogalemu o le talafatai o le atunuu, ma motusia ai nisi o laina o feso’ota’iga. Peita’i o le mea ua le faigofie ona toe fa’aleleia o le taimi nei ua aliali ai le Cable lea e fa’ataoto i Amouli mo feso’ota’iga tau initeneti ma laina o telefoni.

O le aotelega e 13 o laina feso’ota’i o lo’o ta’o’oto i le itu i sisifo o le motu, o lo’o matua lelei lava ma ua fa’apena fo’i le lagomau lelei o le Hawaiki Sumarine Cable, ua le o i ai se a’afiaga o lea itu o le tautua.

Peita’i i le 88 o la’ina o feso’ota’iga sa siakia o le falelima i sasa’e ua fa’amauina nei le lolovai o le Cable tele o lo’o taoto i Auasi ona o le malolosi ma le maualuluga o galu na sofa’ia ia laina, ma ua mana’omia ona ave’esea mai le vai lea ua to’a ai. Ua soso’o atu lava ma le fa’aletonu o feso’ota’iga i Amouli lea ua aliali le Cable mo fesoota’iga o taoto ai.

O lo ua mae’a faia le galuega toe tau fa’aleleia o le nofoaga o lea Cable, ae ua tatalia pea galuega toe lipea o le Cable lea.

Ua fa’ailoa mai e le lipoti a le ASTCA. “O le a fa’aauau pea lava galuega a le Paramount e toe fa’aleleia ai le nofoaga o lea Cable ma le ave’esea fo’i o le suavai to’a i le feso’ota’iga o Uaea o feso’ota’iga i Auasi e tatalia ai le toe galuiega lipea i Amouli mo le Cable ua fa’aletonu ai.”

O laina o feso’ota’iga e vave mai ai le fa’ailo mo se fesoasoani e le tatau lava ona lape i le va o Aunuu ma Tutuila. Na mafai ona fa’auia feso’ota’iga e le totogia mo le to’atele o tagata o lo’o aumau i Aunuu i lenei vaitau louloua ina ia le misia lea vaega o le tautua, ia vave mai talosaga mo galuega lavea’i mai so’o se tasi o umia telefoni feavea’i a le ASTCA i Aunuu.

I le va ma le Manu’atele, ua leai ma se lipoti o fa’auia mai o ni mea ua fa’aleagaina ai a le ASTCA.

Mai le matagaluega o Uafu ma Malaeva’alele ua fa’amauina ai le tele o ni mea ma galuega sa fa’atino i malae sese’e i Ofu ma Tafuna i le malaevaalele mo va’alele tetele.

I Ofu i le malaeva’alele fou, sa mae’a lelei ona tapena mo le sese’e atu o le va’alele e tatala aloa’ia ai lea malaeva’alele i le aso Lulu, peita’i e toe alafa’i atu le mamalu o le atumotu i Olosega ma Ofu mo lea fa’amoemoe, ua suia le lalolagi o i ai le malae sese’e lea ona ua toe fa’atumuina le malae sesee’e i le amuamu ma ma’a fa’apea le palapala i itu tupito i sasa’e ma sisifo o le Malaesesee fou.

O le galuega toe fa’amama sa toe alausu i ai le aufaigaluega a le Port Adminisitration sa malaga atu faapea ma ta’ita’i ina ia toe fa’amama le malae sese’e peita’i ua faia lava le faai’uga ale Malo, o le a le sese’e atu se va’alele a le faigamalo, ae o le a malaga a’e le Sui Kovana sa i Ta’u i le va’a pailate a le Matagaluega, e nate tatalaina aloa’ia lea galuega tele a le Malo ma le FAA i Ofu ia Iulai 14, 2022. O le fuafuaga fa’ataoto puipui [B] lena sa fa’agaoioia mo lea fa’amoemoe.

Ua fa’apea fo’i na lipotia mai le taofiga o le toe sese’e mai o se va’alele i le malae sese’e umi mo va’alele tetele se’ia ta le itula e 4:00 i le afiafi o le aso Faraile Iulai 15, 2022 ina ia mautinoa ua mae’a fa’amamaina atoatoa le malaesese’e lea mo le faigamalaga a le va’alele tele a le Hawaiian Air lea na fa’ato’a fa’ataga e sese’e mai i le aso Faraile 9:30i le afiafi.

I Auasi i le Uafu mo va’a laiti la’u pasese mo Aunuu sa lipotia mai ai le fa’aleagaina o le Uafu fou mo va’a laiti i Auasi ona o galu maualuluga ma le malolosi na sofa’ia i lea vaitau i le atunuu.

O ma’a tetele sa fa’asaogalemu ai ma puipuia le Uafu e i ai nisi o na ala tetele ua matua aumaia lava e le galu i uta i le alatele o ta’avale feoa’i i Auasi. Ua iloga ua fa’aleagaina ai le ta o le alatele peita’i ua toe tatalaina nei lava lea Uafu mo femalaga’iga i Aunuu.

O Aunuu i le Uafu o i ai mo va’a laiti, ua faula’i i ai le tele o le otaota ma ma’ama’a faapea fo’i ma’a tetele ua u’una’ia atu i ai e galu malolosi ma le maualuluga ua sofa’ia le saogalemu o lea motu. Ua mae’a ona toe fa’amamaina le tele o lea lapisi sa fela’ua’i atu e galu, peita’i ua moomia lava ona toe asiasia lelei le Uafu lea i Aunuu, ma ua tatau ona fa’atulaga se suesuega maeaea i le saogalemu o le Uafu faapea ma le vainuu mo feoa’iga i lona va ma le Uafu i Auasi.

Ua fa’atulaga le tapunia aloaia o le Malaeva’alele fou i Ofu se’ia paia Iulai 30, 2022 ona fa’ato’a tatala aloa’ia ai lea mo femalaga’iga. O mea uma sa tatau ona toe fa’aleleia i lea malae sese’e ona o le maualuluga o galu ma le malolosi fo’i, ua tatau ona mae’a fa’aleleia i lea vaitaimi ua toina mai.