TALA I VAIFANUA

Pago Pago - AMERIKA SAMOA

FA’AOPOOPO LE ISI MALIU E AFUA I A’AFIAGA O LE COVID-19 - ATOA LE 33:

O se tina matua e 81 tausaga ua avea nei ma maliu lona 33 e afua mai le Covid-19 i le atunuu. Ua fa’ailoa mai e le ali’i foma’i Dr Abraham Leiato lea e avea ma Sui Pule o Foma’i i le LBJ Medical Center i le fonotaga o le aso Lua na te’a a le Komiti Fa’afoe o le Covid-19. O le tina lea na amata ona fa’ataotolia mai i le falema’i ia Iuni 30, 2022, peita’i o lea ua maliu o ia ia Iulai 12, 2022, ma ua atoa ai nei le to’a 33 oe ua maliliu I aafiaga o le Koviti 19.

Mai le 7 aso talu ai na fa’amauina ai le 317 i latou ua fa’amaonia suega o le Covid-19, mai ia Iulai 11-27, 2022, ma ua iloga ai sina suiga teisi ua maulalo ai lea faitauga mai le faitauga mulimuli i le isi fitu aso na muamua atu e 344.

Ua fa’ailoa mai la e vasega o foma’i o lo ua matauina ua toe oo le teritori i le mea sa latou fa’atalitalia, o le toe si’itia lea o le faitauga o e toe a’afia i le Covid-19 i le tatou teritori, ma ua faapena lava ona oo fo’i i ai isi malo uma o le lalolagi sa lutia muamua atu ia i tatou nei.

E aofia i le vaega o i latou na faamaonia le suega o le Covid-19 o le afioga le Sui Kovana ma lona atali’i ina ua to’ai taunuu mai le Taitaifono mai le faigamalaga i le Manuatele e tatala le Malaeva’alele  i Ofu ma sisi le Fu’a a Manu’a i Ta’u. Na fa’ato’a taliu mai i la’ua nei mai Manu’a i le aso Toona’i ua te’a. Ua fa’ailoa mai e 27 isi sui na po’ia fou i Manu’a i le vaitau tonu lea.

I le taimi nei ua siitia nei le aotelega o i latou ua fa’amauina ua fa’amaonia suega o le Covid-19 i le atunuu i le 7,460 ma ua toe mama uma le to’atele sei vagana ai le to’a 470 o lo’o  fa’anofoesea pea i le taimi nei ona o lo’o i ai lava le verusi.

O lo ua fa’amauina mai fo’i le to’a 9 o i latou o lo’o taofia i le falema’i o le Covid-19 i le LBJ Medical Center.

Mai le malaga o le aso Gafua Iulai 18, 2022 e to’a 10 i latou na fa’amaonia le suega a le Covid-19 ae na’o le 129 le pasese na malaga mai.

Peita’i o le po o le aso Tofi na te’a nei e to’a lima i latou na fa’amaonia le suega a le Covid-19. Mai le Lipoti a le Matagaluega o le Soifua Maloloina ua fa’amauina mai ai le to’a 22 o i latou o lo’o faanofoesea nei i le falema’i i le Malaeva’alele. E ese mai le Covid-19 ua mataituina fo’i e le DOH le gasolo mai o tagata ina ne’i a’afia mai se tasi o le pasese i le Monkeypox lea ua i ai nisi i Hawaii ua fa’amaonia le maua ai, ae o lo’o mama pea i tatou iinei mai lena fa’ama’i e foliga tutua ma le Tanesusu, ae vave tele la le pipisi.

10 ‘TALAVOU SU’E ALA’ UA FA’AU’U &  FA’AILOGA MASTER GUIDE - MATAGALUEGA SISDAC-AS:

Ua mautu nei le to’a 10 o Talavou na a’otauina i tomai fa’apitoa tau Su’e Ala i tulaga o le malosi o le tino ma le lave’ia o nisi i le vaomatua ma le gataifale fa’atasi ai ma le iloa ona toe lavea’i mai le soifua o se tasi ua matapogia poo le tomai CPR.

E aofia i nei a’oa’oga uma lava, ia agava’a le sui e iloa lona ala i le vaomatua, e mafaia ona lavea’ia nisi ua se i le vao. Lavea’i mai nisi ua tau malemo pe tafea atu i le sami. 

O le vala lona lua o le a’oa’oga, ia iloa ona to’afilemu i taimi o fa’afitauli ma faia fa’ai’uga tatau mo le autalavou, ia le vevesi vale ma galo nimo ai ni fa’ai’uga tatau e ao ina faia e lavea’ia ma fa’asaoina ai le soifua.

Ia lelei fo’i ona a’otau i latou i mataupu silisili o le Tusi Pa’ia ma ua tali tutusa lava a’oa’oga nei ma a’oga mo Talavou Mo Iesu poo i latou ua a’oa’o lelei mo tala’iga i le fanua. E le faigofie le a’oga, na amata mai a’oga nei i aso Sa ta’itasi lava mai ia Seteme 19, 2021 ae o lea fa’ato’a faia le su’ega mulimuli mo latou fa’ailoga i le amataga o Iulai 2022.

Mai le to’a 13 na amata maia le aoga ua toa 10 i latou ua faai’uina ma le manuia lenei Kosi Su’e Ala mao se ulua’i taimi lenei ua fa’atautaia ai lenei a’oa’oga taua mo ni tupulaga taua i le matagaluega a le Aso Fitu Samoa Tuto’atasi i Amerika Samoa, ma o se fiafiaga sili lea i matua ma totino uma o le Ekalesia.

I le fa’atulagaga fo’i o lea Ekalesia, afai e le’i ausia muamua e se tasi le tusi pasi lea o le Master Guide, e le mafai ona e tula’i i se tofiga Taiulu o le Autalavou poo se sui fo’i o le laulauatofi mo le Vaega o le Autalavou.

“O le ausia ai e le to’a 10 lenei o le a la’asaga o tomai ma agava’a e mafai ai ona ta’ita’ia le Autalavou, o se mea sili ona lelei ma aoga lea mo le aga’i i uma o le tele o mea e fa’atino mo le Autalavou a le Matagaluega i Amerika Samoa nei. O le to’atele lava sa ta’ita’ia maia lea vaega o le Autalavou i tausaga ua mavae sa sailia ma maua mai o latou fa’ailoga nei mai Samoa, Niu Sila ma Ausetalia. Peita’i o lea ua gafatia e Amerika Samoa ona fa’atautaia le aoaoga taua ma ua maua ai lea seleselega matagofie.” O se tala fiafia lea a le Taitai Toeaina o lo’o tula’i nei i le Elder Matagaluega Manu Amituana’i.

O le susuga le Taitai Matagaluega sa avea ma Faia’oga o le Kosi Sue Ala ma sa fesoasoani i ai fo’i i ai le faletua i a’oa’oga e fa’aaogaina ai komipiuta ma aoaoga fa’apitoa mai le Tusi Pa’ia, ma tomai fa’apitoa o ituaiga nonoa fa’apitoa e mafai ona fa’aaogaina i le tele o galuega eseese ae maise ai lava folauga i luga o va’a, le sisiina fo’i o Fu’a ma isi fe’au masani lava.

O i latou ua aofia i le ulua’i vasega fa’au’u a le Master Guide, ua aofia ai le susuga le Faife’au Fa’atuuai Isaia, Jr Lolesia Filimaua, Fetauo Peniamina, Lemigao Smith, Salvation Koon Wai You, Jr Fesouaina Peniamina, Miracle Mafi, Faleatua Peniamina, Grace Smith ma Segia Peniamina.

FUAFUA E LE OMV-DPS E MAUA LAISENE FA’AVAOMALO - AMERIKA SAMOA IA OKETOPA 2022:

O lo ua seti mai le masina o Oketopa 2022 e tatau ona oo atu i ai ua mae’a mafai ona maua laisene o ave ta’avale i le atunuu e mafai ona talia fa’avaomalo pe a fia fa’aaogaina i a latou femalaga’iga.

O le isi avanoa na soso’o mai e le US Homeland Security o le a fa’amuta mai lea ia Me 2023. Pe afai o le a oo atu lava i ai ae le’i faia lava nei suiga e mo’omia e fa’aleleia ai le Laisene Aveta’avale ina ia talia e fa’aaoga fa’avaomalo, o le a le toe taliaina loa laisene lea e maua i le taimi nei e tatou ave ta’avale. Ua fa’apea fo’i ona le toe talia nei laisene mai Amerika Samoa o se isi Pepa Fa’amaonia o so’o se tasi e umia, pe afai o le a fa’aalia.

O le fa’aaliga lea sa mafai ona talanoaina ma fa’amatuu mai i le fonotaga a le Komiti Fa’apitoa mo le Saogalemu Lautele a le Maota o Sui ma le Saogalemua Fa’alotoifale a le tatou Malo i a latou iloiloga ma sa auai atu ai Terry Letuli le sui Komesina ma le Fa’atonu o le Homeland Security a le tatou malo, Ve’ave’a Samana.

O lo ua mautu le itu o le Ofisa o le a fa’aaogaina mo lea tautua mo le lautele ma ua mautinoa lava e mae’a lelei tapenaga o totoe ia Setema ma amata loa ona pu’ea laisene nei ia Oketopa 2022. Ae le’i oo i lea tulaga e muamua lava ona asia ma pasia lelei e nisi o sui o le Matagaluega o le Puipuiga o le Saogalemu Fa’alotoifale o le Malo tele le tatou itu lea o le tautua a’o le’i pasia e fa’aaoga.

Ua fa’ailoa mai fo’i e le Fa’atonu o le Homeland Security a le tatou Malo Ve’ave’a Samana, “Ua fai lava si leva fo’i o fa’atalia lava e le Homeland Security a le Malo Tele le gafatia loa e le ttpu OMVon pu’ea atu Laisene Aveta’avale nei e taulia i fafo mo fa’amaumauga a nisi ua agava’a ai, e fa’afaigofie ai ona faamautu la itu o le tautua.”

Ua faailoa mai fo’i e le susuga le fa’atonu Ve’ave’a Samana, “Ua atoa le lua tausaga o fa’atalitalia mai lea suiga lelei e le Homeland Security a le Malo tele ia fa’aleleia le tautuaina o tatou ave ta’avale iinei, ina ia ausia ai fo’i lea suiga lelei mo tagata lautele  o le atunuu.”

SUIA LE LAULAUATOFI FOU MO LE FONOTELE - LUA TAUSAGA FA’ATAUTAIA A LE EFKAS:

I le fa’aiuga o le Iloiloina o le Tupe Fa’asoa a le Ekalesia Fa’apotopotoga Kerisiano i Amerika Samoa, sa alofaiva loa lava le mamalu o le au usufono, 690 le aotelega ua fa’atasi mai, ma le isi to’a 340+ o isi sui o lo’o usufono mai fafo i atunu’u fa’avaomalo e i ai Niu Sila ma Ausetalia ma le Iunaitesetete e aofia ma Hawaii.

O sui sa faia i ai le palotaga na talia so’o sui ua filifilia mai e usufono mai matagaluega ta’itasi o le Ekalesia. O lea sa iloga ai le fai si to’atele o sui na aofia suafa i le filifiliga o le Sui Ta’ita’i Fono Fonotele 2023-2024.

E fa’alua ona faia le palotaga ona o le to’atele na’ua o sui na palota i ai le auusufono i le amataga o le palota, ona toe fa’atula’ia lea o le to’afa o sui na maualuluga latou palota mo le ta’amilosaga lona lua o le palota ia ausia e le sui e to’atasi le afa o le aotelega o usufono na palota.

O le to’afa o Sui na toe filifili ai se Sui Taitaifono o le Laulauatofi Fonotele EFKAS na tula’i mai ai Rev. Elder Fa’aeteete Saifoloi, Rev. Elder Tony Hollister, Rev. Elder Afuola ma Tiakono Toeaina Togiola Tulafono.

I le fa’aiuga o le palotaga lea ua tulai mai ai le fa’ai’uga o le palota Re. Elder Fa’aeteete Saifoloi ua avea nei ma Sui Taitaifono o le Laulauafono 2023-2024. O le ta’ita’ifono ua tula’i nei mo lea vaitausaga o le Toeaina lea sa avea ma Sui Taitaifono i le nofoaiga sa fa’atautaia le fonotele i lenei tausaga, Rev Elder Dr Leaitulagi Fa’alevao lea o lo’o galulue ma le faletua i Amouli, Matagaluega a Saole.

I le sailiga o le Teutupe a le EFKAS ua filifilia ai nei le Sui fou le Tiakono Toeaina Ufagafa Ray Tulafono mai le EFKAS i Alofau, Matagaluega a Saole.

Peita’i o le tofi Failautusi Aoao a le Ekalesia ua toe tula’i mai ai nei le toeaina sa galue mai ai fo’i i le nofoaiga ua mae’a, le susuga Rev. Elder Nafatali Faleali’i.